ພະຍາຍາມຮັບຜິດຊອບຕໍ່ໂຊກຊະຕາຂອງຕົນ
(GMT+08:00) 2012-03-07 10:38:53 cri
ມີຄົນເວົ້າວ່າ, ຖ້າແມ່ນຄຳ, ບໍ່ວ່າປະໄວ້ບ່ອນໃດ, ມັນກໍ່ຈະສົ່ງແສງເຫຼື້ອມຍິບຫຍັບອອກມາ. ແຕ່ວ່າບາງທີ, ຄຳກໍ່ອາດຈະຖືກຝັງຢູ່ໃນກອງຂີ້ຊາຍ, ສະນັ້ນ ບໍ່ແມ່ນວ່າ ຄຳກ້ອນໜຶ່ງປະໄວ້ບ່ອນໃດ ມັນກໍຈະສົ່ງແສງເຫຼື້ອມອອກມາໄດ້ໝົດ, ເຊັ່ນດຽວກັນ, ຜູ້ທີ່ມີພອນສະຫວັນກໍບໍ່ແມ່ນວ່າຈະໄດ້ຮັບຜົນສຳເລັດດີເລີດໝົດທຸກຄົນ.
ສັງຄົມປະຈຸບັນແມ່ນສັງຄົມທີ່ບໍ່ຂາດຜູ້ມີພອນສະຫວັນ, ແລະກໍ່ແມ່ນສັງຄົມທີ່ເຕັມໄປດ້ວຍການແຂ່ງຂັນ, ພວກເຮົາບໍ່ຄວນມີແຕ່ນັ່ງຖ້າໂອກາດມາຫາພວກເຮົາ, ຈົ່ມນັ້ນຈົ່ມນີ້ຢູ່ທຸກມື້ແມ່ນບໍ່ມີປະໂຫຍດຫຍັງ. ພວກເຮົາຄວນໃຊ້ທ່າທີອັນຕັ້ງໜ້າ, ຮັບຜິດຊອບຕໍ່ໂຊກຊະຕາຂອງຕົນ, ທຳຄວາມພະຍາຍາມເລື້ອຍໄປ, ບໍ່ວ່າສຸດທ້າຍຈະເປັນແນວໃດ, ຢ່າງໜ້ອຍ ເມື່ອຫວນຄືນຊີວິດຂອງຕົນ, ຈຶ່ງຈະບໍ່ເສຍໃຈ.
ໃນຊີວິດຂອງຄົນເຮົາ, ມີປັດໄຈຫຼາຍຢ່າງພວກເຮົາແມ່ນຄວບຄຸມບໍ່ໄດ້, ແຕ່ຢ່າທໍ້ຖອຍໃຈຕໍ່ຊີວິດຂອງຕົນ, ລອງໃຊ້ທ່າທີອັນຕັ້ງໜ້າໄປສະແຫວງຫາຄວາມຝັນຂອງຕົນ, ເຖິງວ່າ ບາງທີ ພະຍາຍາມສຸດຂີດແລ້ວກໍ່ຍັງບໍ່ໄດ້ຜົນ, ແຕ່ວ່າຢ່າງໜ້ອຍ, ພວກເຮົາໄດ້ພະຍາຍາມແລ້ວ, ພວກເຮົາຈະບໍ່ກິນແໜງແຄງໃຈ.
