ອ່ານປຶ້ມໝື່ນເຫຼັ້ມ, ເດີນທາງໝື່ນລີ້
(GMT+08:00) 2012-04-17 16:48:38 cri
ອ່ານປຶ້ມເຮັດໃຫ້ຄົນກ້າວໜ້າ, ອຸດົມໄປດ້ວຍສະຕິປັນຍາ, ແຕ່ອ່ານປຶ້ມກໍ່ຕ້ອງມີວິທີ. ສັງຄົມມະນຸດວິວັດພັດທະນາມາຮອດປະຈຸບັນ, ໄດ້ມີປຶ້ມຫຼວງຫຼາຍຈົນນັບບໍ່ຖ້ວນ, ຄົນຜູ້ໜຶ່ງຕະຫຼອດຊີວິດກໍ່ສາມາດອ່ານໄດ້ແຕ່ສ່ວນນ້ອຍໆທໍ່ນັ້ນ, ສະນັ້ນ, ອ່ານປຶ້ມຕ້ອງເລືອກກ່ອນ. ຄວນເລືອກອ່ານປຶ້ມທີ່ນຳເອົາຄວາມມ່ວນຊື່ນມາໃຫ້ຕົນເອງ, ເມື່ອເປັນແນວນັ້ນ, ການອ່ານປຶ້ມກໍ່ຈະກາຍເປັນເລື່ອງມ່ວນຊື່ນ, ແລະເຮັດໃຫ້ພວກເຮົາໄດ້ຮັບຄວາມຮູ້ໃນເວລາມ່ວນຊື່ນ. ສອງ, ຄວນເລືອກອ່ານປຶ້ມທີ່ເໝາະກັບຕົນເອງ, ປຶ້ມທີ່ມີຊື່ລືນາມທີ່ຄົນທັງຫຼາຍຍ້ອງຍໍນັ້ນ ບໍ່ແນ່ວ່າຈະເໝາະສຳລັບພວກເຮົາໝົດທຸກເຫຼັ້ມ, ຄວນເລືອກເອົາປຶ້ມທີ່ເໝາະກັບອົງປະກອບຄວາມຮູ້ແລະລະດັບຄວາມເຂົ້າໃຈຂອງຕົນເອງ. ສຸດທ້າຍ, ຄວນເລືອກເອົາປຶ້ມອະມະຕະທີ່ດີ, ອ່ານປຶ້ມໜ້ອຍຫຼືຫຼາຍປານໃດບໍ່ໄດ້ພິສູດຫຍັງເລີຍ, ມີແຕ່ປຶ້ມອະມະຕະທີ່ດີໆທີ່ໄດ້ບັນທຶກແນວຄິດອັນດີເລີດຂອງມວນມະນຸດເທົ່ານັ້ນ, ຈຶ່ງສາມາດເຮັດໃຫ້ຄົນກ້າວໜ້າ, ປຶ້ມທີ່ບໍ່ດີ ບໍ່ພຽງແຕ່ບໍ່ສາມາດເຮັດໃຫ້ຄົນສະຫຼາດ ຮູ້ເຫດຮູ້ຜົນ, ບາງເທື່ອຍັງອາດຈະພາໃຫ້ໄດ້ຜົນກົງກັນຂ້າມອີກຊ້ຳ.
ຄຳວ່າໃຫ້ "ອ່ານປຶ້ມໝື່ນເຫຼັ້ມ" ແມ່ນຄຳເຕືອນໃຫ້ຄົນທັງຫຼາຍອ່ານປຶ້ມໃຫ້ຫຼາຍ, ສ່ວນຄຳວ່າ "ເດີນທາງໝື່ນລີ້" ແມ່ນໃຫ້ໄປທ່ຽວຊົມຫຼາຍໆບ່ອນ, ນີ້ແມ່ນສອງດ້ານທີ່ຂາດດ້ານໃດດ້ານໜຶ່ງກໍບໍ່ໄດ້ໃນການສະແຫວງຫາຄວາມຮູ້. ພຽງແຕ່ອ່ານປຶ້ມແມ່ນບໍ່ພໍເທື່ອ, ຍັງຕ້ອງດຳລົງຊີວິດຢ່າງຕັ້ງໜ້າ, ເປີດຫູເປີດຕາ, ເພີ່ມຄວາມຮູ້ເຫັນ, ຮ່ຳຮຽນຈາກຊີວິດການເປັນຢູ່. ຊີວິດກໍ່ແມ່ນພຶດຕິກຳຕົວຈິງ, ເອົາສິ່ງຮຽນຮູ້ຈາກປຶ້ມ ໃຊ້ເຂົ້າໃນພຶດຕິກຳຕົວຈິງ, ສາມາດພິສູດຄວາມຮູ້ທີ່ຮຽນໄດ້ຈາກປຶ້ມ, ພ້ອມກັນນັ້ນ, ເອົາຄວາມຮູ້ທີ່ຮຽນໄດ້ຈາກປຶ້ມມາພິຈາລະນາການປ່ຽນແປງແລະມູນເຫດຂອງເລື່ອງລາວ, ປັບຕົນເອງເລື້ອຍໆ, ມີແຕ່ຜູ້ທີ່ໄດ້ພຽບພ້ອມໄປດ້ວຍຄວາມຮູ້ອັນພຽງພໍແລະປະສົບການອຸດົມສົມບູນທໍ່ນັ້ນ, ຈຶ່ງຈະມີສາຍຕາອັນກວ້າງຂວາງ, ໃນໃຈມີພາບວິວຂອງໂລກອັນໃຫຍ່ໂຕມະໂຫຖານ. ເມື່ອມີພື້ນຖານແບບນີ້ແລ້ວ, ກໍ່ເອົາຄວາມຮູ້ແລະທິດສະດີທີ່ຮຽນມາໄດ້ໃນຊີວິດນັ້ນໄປໃຊ້ເຂົ້າໃນພຶດຕິກຳ, ແນ່ນອນຈະສາມາດປະກອບສ່ວນອັນໃຫຍ່ຫຼວງໃຫ້ແກ່ສັງຄົມ, ພ້ອມທັງບັນລຸຄຸນຄ່າຂອງຕົນແລະໄດ້ຮັບຜົນງານຢ່າງໃດຢ່າງໜຶ່ງ.
