ຄວາມຮັກແມ່ນຫຍັງ(ໂດຍ: ທ່ານສັງຂານ ຈຸງຄຳພັນ)
—ຫາກທ່ານຜິດຖຽງກັບຄົນຮັກ ແຕ່ໃນຕອນເຊົ້າມື້ຕໍ່ມາ ລາວຍັງໂທມາສະແດງຄວາມເປັນຫ່ວງທ່ານໃນເລື່ອງຕ່າງໆປົກກະຕິຄືທຸກວັນທີ່ຜ່ານມາ ທັ້ງໆທີ່ລາວແລະທ່ານຍັງບໍ່ທັນເຊົາຄຽດໃຫ້ກັນ. ນັ້ນລະ ຮຽກວ່າ: ຄວາມເອົາໃຈໃສ່.
—ຫາກຄົນຮັກຂອງທ່ານຍອມປະວຽກທີ່ສຳຄັນຫຼາຍຂອງລາວບຶດໜຶ່ງ ເພື່ອມາເຮັດໃນສິ່ງທີ່ທ່ານຂໍຮ້ອງ, ນັ້ນລະ ຮຽກວ່າ: ຄວາມເອົາໃຈໃສ່.
—ຄົນເຮົາບາງຄົນກໍ່ຕ້ອງການມີໃຜຜູ້ໜຶ່ງຄອຍໃຫ້ຄວາມເອົາໃຈໃສ່ເປັນຂອງທຳມະດາ ຫາກທ່ານຕ້ອງເດີນທາງໄກ ທ່ານຈະຮູ້ສຶກອົບອຸ່ນໃຈທີ່ສຸດ ຖ້າຄົນຮັກຂອງທ່ານໂທມາ ແລ້ວຖາມວ່າ "ຮອດແລ້ວບໍ່?" "ການເດີນທາງສະດວກສະບາຍບໍ່?" "ປອດໄພດີບໍ່?" ຫຼື "ເມື່ອຍບໍ່?"
—ຫາກທ່ານຕ້ອງປະຕິບັດວຽກງານສຳຄັນ, ບໍ່ວ່າຈະເປັນການເຮັດວຽກໃນຫ້ອງການ ຫຼື ການຮຽນ ທ່ານຈະຮູ້ສຶກອົບອຸ່ນທີ່ສຸດ ຖ້າຄົນຮັກຂອງທ່ານຈື່ໄດ້ແລະໂທມາບອກວ່າ "ໂຊກດີເດີ້! ຂ້ອຍຈະຄອຍເປັນກຳລັງໃຈໃຫ້"
—ຫາກທ່ານຂັບລົດໄປຄົນດຽວ ທ່ານຈະຮູ້ສຶກອົບອຸ່ນແລະມີຄວາມສຸກໃຈທີ່ສຸດ ຖ້າຄົນຮັກຂອງທ່ານໂທມາ ແລ້ວບອກວ່າ "ຂັບລົດລະວັງແດ່ເດີ້! ຄ່ອຍໄປຄ່ອຍມາເດີ້!"
—ຫາກທ່ານບໍ່ສະບາຍ ທ່ານຈະຮູ້ສຶກອົບອຸ່ນແລະມີກຳລັງໃຈທີ່ສຸດ ຖ້າຄົນຮັກຂອງທ່ານໂທມາເຕືອນໃຫ້ທ່ານ ຢ່າລືມກິນຢາແລະພັກຜ່ອນຫຼາຍໆ.
—ຄວາມເອົາໃຈໃສ່ ກັບຄວາມເກງໃຈ ຄ້າຍຄືກັນໃນຫຼາຍໆດ້ານ, ເພາະທ່ານອາດຄິດວ່າ ຍິ່ງຢູ່ນຳກັນຫຼືໃກ້ຊິດສະໜິດສະໜົມກັນຫຼາຍເທົ່າໃດ ກໍ່ບໍ່ຈຳເປັນເກງໃຈກັນຫຼາຍຄືກັບຄົນທີ່ຫາກໍ່ຮັກກັນ, ແຕ່ຜູ້ຂຽນບໍ່ຄຶດແນວນັ້ນ ແຕ່ຄິດວ່າ: ຍິ່ງຄົນເຮົາສະໜິດສະໜົມກັນຫຼາຍເທົ່າໃດ, ຄວນຍິ່ງເກງໃຈຊຶ່ງກັນແລະກັນ. ເພາະຄວາມເກງໃຈເປັນຄຸນສົມບັດທີ່ດີແລະເປັນບໍ່ເກີດຂອງຄວາມສຳພັນທີ່ຍືນຍົງ.
—ບັດນີ້, ທ່ານຄົງຈະເຫັນແລ້ວຕິວ່າ ມັນບໍ່ແມ່ນເລື່ອງຍາກເລີຍທີ່ທ່ານຈະສະແດງຄວາມເອົາໃຈໃສ່ໃຜບາງຄົນ. ແຕ່ວ່າ, ມື້ນີ້, ທ່ານໄດ້ເອົາໃຈໃສ່ຄົນຮັກຂອງທ່ານແລ້ວບໍ່?
