ການຫຼໍ່ຫຼອມ
(GMT+08:00) 2012-06-07 11:15:09 cri
ຢູ່ຕໍ່ໜ້າຄວາມຫຼົ້ມແຫຼວແລະຄວາມຫຍຸ້ງຍາກ, ມີຄົນ 2 ປະເພດ, ປະເພດໜຶ່ງຢ້ານຄວາມຫຼົ້ມແຫຼວ, ພະຍາຍາມຫຼົບຫຼີກ, ຄືກັບເຫຼັກກ້ອນນັ້ນໃນນິທານດັ່ງກ່າວ, ສຸດທ້າຍກໍຖືກຄວາມຫຍຸ້ງຍາກລຳບາກເອົາຊະນະ. ເຫຼັກທີ່ເຂົ້າຂີ້ໝ້ຽງສົ່ງກັບຄືນໂຮງງານຫຼໍ່ຫຼອມໃໝ່ໄດ້, ແຕ່ຊີວິດຂອງຄົນເຮົາແມ່ນເອົາໃໝ່ບໍ່ໄດ້. ຍັງມີຄົນອີກປະເພດໜຶ່ງ, ພັດກ້າຫັນປະເຊີນໜ້າສູ້ກັບຄວາມຫຼົ້ມແຫຼວ, ຍິ່ງຕໍ່ສູ້ທໍ່ໃດ ກໍຍິ່ງກ້າຫານ, ແລະເອົາຊະນະມັນໃນທີ່ສຸດ, ຄົນປະເພດນີ້ຈຶ່ງສາມາດກາຍເປັນຄົນເກັ່ງ. ຈີນຍັງມີຄວາມເວົ້າຄວາມໜຶ່ງທີ່ຄົນທັງຫຼາຍມັກເວົ້າເລື້ອຍໆ, ນັ້ນກໍຄື: "吃得苦中苦，方为人上人", ໝາຍຄວາມວ່າ, ຜູ້ທີ່ສາມາດອົດທຸກທົນຍາກແລະຜ່ານຜ່າອຸປະສັກແລະຄວາມທຸກທໍລະມານອັນໃຫຍ່ຫຼວງທີ່ຄົນທຳມະດາອົດບໍ່ໄດ້ນັ້ນ, ຈຶ່ງແມ່ນຜູ້ທີ່ຈະໄດ້ຮັບຜົນສຳເລັດອັນໃຫຍ່ຫຼວງ.
ເຫຼັກກ້ອນນ້ອຍ, ຢາກກາຍເປັນເຫຼັກກ້າທີ່ດີ, ຕ້ອງຜ່ານການຫຼໍ່ຫຼອມໃນເຕົາໄຟແລະການທຸບຕີດ້ວຍຄ້ອນເຫຼັກ, ຫີນແກ້ວມໍລະດົກຈະກາຍເປັນແກ້ວທີ່ລ້ຳຄ່າກໍ່ຕ້ອງຜ່ານການເຈຍລະໄນຢ່າງລະອຽດປານີດ, ຄົນກໍ່ຄືກັນ, ຕ້ອງຜ່ານການເຝິກຝົນຫຼໍ່ຫຼອມໃນຊີວິດ, ຈຶ່ງຈະໄດ້ຮັບຜົນສຳເລັດ. ຊີວິດຈະສົມບູນງົດງາມຫຼາຍສີຫຼາຍສັນ, ບໍ່ພຽງແຕ່ຕ້ອງມີດິນດຳນ້ຳຊຸ່ມ, ຍັງຕ້ອງມີຟ້າຝົນລົມແດງ, ບໍ່ພຽງແຕ່ຕ້ອງມີຄວາມສະດວກສະບາຍ, ຍັງຕ້ອງມີຄວາມຫຍຸ້ງຍາກລຳບາກ. ສະນັ້ນ, ບໍ່ຕ້ອງຢ້ານຄວາມຫຼົ້ມແຫຼວແລະຄວາມຫຍຸ້ງຍາກລຳບາກໃນຊີວິດ, ເພາະສິ່ງເຫຼົ່ານີ້ລ້ວນແຕ່ແມ່ນຫຼັກສູດທີ່ຕ້ອງຮຽນໃນຊີວິດຂອງເຮົາ, ມີແຕ່ຕໍ່ສູ້ກັບສິ່ງທ້າທາຍເຫຼົ່ານີ້ຢ່າງກ້າຫານແລະເອົາຊະນະມັນແລ້ວ, ພວກເຮົາຈຶ່ງຈະສາມາດຮຽນຈົບຈາກໂຮງຮຽນແຫ່ງຊີວິດໄດ້.
