ທ່ານສີຈິ້ນຜິງພົບປະນາຍົກລັດຖະມົນຕີລາວແລະຜູ້ນຳທ່ານອື່ນໆຂອງອາຊຽນ
ມື້ດຽວກັນ, ທ່ານສີຈິ້ນຜິງຍັງໄດ້ພົບປະທ່ານຫງວຽນເຕິນຢຸງ,ນາຍົກລັດຖະມົນຕີຫວຽດນາມແລະທ່ານກິດຕິຣັດ ນະຣະນອງ,ຮອງນາຍົກລັດຖະມົນຕີໄທ.
ໃນເວລາພົບປະທ່ານຫງວຽນເຕິນຢຸງ, ທ່ານສີຈິ້ນຜິງກ່າວວ່າ, ປະເທດອາຊີໃນປະຈຸບັນໄດ້ປະເຊີນໜ້າກັບສິ່ງທ້າທາຍໃໝ່ອັນຂ້ຽວຂາດ,ໜ້າທີ່ອັນດັບໜຶ່ງແມ່ນ ຮ່ວມກັນປົກປັກຮັກສາສະຖຽນລະພາບແລະທ່ວງທ່າພັດທະນາທີ່ຫາຍາກໂດຍຜ່ານການລົງເລິກການຮ່ວມມືບົນຈິດໃຈທີ່ຮ່ວມແຮງກັນ.ຜູ້ນຳສອງປະເທດໄດ້ກ້າວເຖິງຂັ້ນມີຄວາມຮັບຮູ້ຄືກັນທີ່ສຳຄັນຫຼາຍຢ່າງກ່ຽວກັບບັນຫາທະເລຈີນໃຕ້, ສອງຝ່າຍຄວນປະຕິບັດຕາມຫຼັກການຢ່າງເໝາະສົມ.
ທ່ານຫງວຽນເຕິນຢຸງກ່າວວ່າ, ການຮ່ວມມືກັບຈີນແມ່ນຢູ່ໃນຖານະບູລິມະສິດຂອງວຽກງານການຕ່າງປະເທດຂອງຫວຽດນາມ.ຫວຽດນາມຍິນດີພະຍາຍາມຢ່າງສູງ, ຕັ້ງອົກຕັ້ງໃຈອົບຮົມບົ່ມສ້າງແລະປົກປັກຮັກສາການພົວພັນມິດຕະພາບລະຫວ່າງຫວຽດນາມຈີນ.
ຫວຽດນາມແລະຈີນມີທັດສະນະຕ່າງກັນໃນບັນຫາທະເລຈີນໃຕ້, ແຕ່ສອງຝ່າຍຄວນພິຈາລະນາແລະຍົກສູງດ້ານຍຸດທະສາດ, ບົນຈິດໃຈທີ່ເປັນສະຫາຍແລະເປັນອ້າຍນ້ອງກັນ,ຜ່ານການເຈລະຈາແລະປຶກສາຫາລືກັນ, ແລະແກ້ໄຂຄວາມຂັດແຍ່ງກັນຢ່າງເໝາະສົມ, ບໍ່ໃຫ້ບັນຫາດັ່ງກ່າວກະທົບກະເທືອນເຖິງການພົວພັນລະຫວ່າງສອງປະເທດ.ໃນເວລາພົບປະທ່ານກິດຕິຣັດ ນະຣະນອງ,ຮອງນາຍົກລັດຖະມົນຕີໄທ, ທ່ານສີຈິ້ນຜິງກ່າວວ່າ,ຈີນຍິນດີຮ່ວມກັນກັບໄທຂຸດຄົ້ນຄວາມສາມາດບົ່ມຊ້ອນຕື່ມອີກ,ຊຸກຍູ້ໃຫ້ການພົວພັນລະຫວ່າງສອງປະເທດຂະຫຍາຍຕົວເລື້ອຍໆ. ທ່ານສີຈິ້ນຜິງໄດ້ສະແດງຄວາມຍ້ອງຍໍຊົມເຊີຍຕໍ່ໄທ ທີ່ໄດ້ໃຫ້ການສະໜັບສະໜູນຈີນແລະມີການປະສານງານເປັນຢ່າງດີ ໃນການສືບສວນແລະມ້າງຄະດີລູກເຮືອຈີນທີ່ຖືກຄາດຕະກຳຢູ່ຕາມລຳແມ່ນ້ຳຂອງທີ່ເກີດຂຶ້ນໃນວັນທີ5ຕຸລາປີ2011, ຈີນຍິນດີຮ່ວມກັບໄທ, ຊຸກຍູ້ການຮ່ວມມືດ້ານຍຸດຕິທຳລະຫວ່າງສີ່ປະເທດຈີນ, ໄທ,ລາວແລະມຽນມາຢ່າງໜັກແໜ້ນ,ຮ່ວມກັນປົກປັກຮັກສາຄວາມປອດໄພຢູ່ຕາມລຳແມ່ນ້ຳຂອງ.
ທ່ານກິດຕິຣັດກ່າວວ່າ, ໃນໄລຍະທີ່ໄທເປັນປະເທດປະສານງານລະຫວ່າງຈີນກັບອາຊຽນ,ໄທຍິນດີເພີ່ມທະວີການປະສານງານແລະປະສານສົມທົບກັບຈີນ, ເພື່ອທຳຄວມພະຍາຍາມຂະຫຍາຍການພົວພັນລະຫວ່າງຈີນອາຊຽນ.
