ບົດສໍາພາດຂອງທ່ານ ອ່ອນສີ ບຸດສີວົງສັກ ປະທານສະມາຄົມອຸດສາຫະກໍາຕັດຫຍິບລາວ(VDO)
ທ່ານຜູ້ຊົມ, ເມື່ອເວົ້າເຖິງວຽກງານອຸກສາຫະກໍາຕັດຫຍິບລາວກໍ່ເປັນອີກຂະແໜງການໜື່ງທີ່ສາມາດສ້າງຊື່ສຽງໃຫ້ແກ່ຄົນລາວ ແລະຍັງເປັນອີກຂະແໜງການໜື່ງທີ່ເປັນສີໄມ້ລາຍມືຂອງຄົນລາວ ແລະກໍ່ຕິດພັນກັນຄົນລາວມາຕັ້ງແຕ່ດົນນານ ແລະກໍ່ສ້າງຊື່ສຽງໃຫ້ແກ່ຄົນລາວບໍ່ວ່າສັງຄົມລາວກໍ່ຄືຕະຫຼາດໂລກ.
ເນື່ອງໃນໂອກາດທີ່ປະເທດລາວຈະໄດ້ຮັບເປັນສະມາຊິກອົງການການຄ້າໂລກໃນມໍ່ໆນີ້, ຫຼາຍທ່ານກໍຢາກຮູ້ວ່າ, ຕໍ່ກັບອຸດສາຫະກໍາຕັດຫຍິບລາວຈະມີຄວາມກຽມພ້ອມແນວໃດ? ຕໍ່ບັນຫາດັ່ງກ່າວ, ມື້ນີ້, ລັດຕະນະຈະພາທ່ານມາຫາຄໍາຕອບຈາກຜູ້ທີ່ມີປະສົບການມາຫຼາຍກວ່າ 17 ປີ ເຊິ່ງກໍແມ່ນປະທານສະມາຄົມອຸດສະຫະກໍາຕັດຫຍິບລາວ ແລະຂະນະນີ້, ເພິ່ນກໍໄດ້ນັ່ງຢູ່ກັບພວກເຮົາເປັນທີ່ຮຽບຮ້ອຍແລ້ວ. ສະບາຍດີ ກ່ອນອື່ນກໍຕ້ອງຂໍອະນຸຍາດຂໍຖາມວ່າ ທ່ານມີຄວາມຄິດເຫັນແນວໃດຕໍ່ອົງການການຄ້າໂລກຈະຮັບເອົາປະເທດລາວເຂົ້າເປັນສະມາຊິກໃໝ່ໃນວັນທີ 26 ຕຸລານີ້?
ທ່ານອ່ອນສີ: ກອ່ນອື່ນຂ້າພະເຈົ້າກໍ່ຂໍສະແດງຄວາມດີໃຈເປັນຢ່າງຍິ່ງທີ່ອົງການການຄ້າໂລກໄດ້ໃຫ້ກຽດປະເທດລາວ, ໄດ້ຮັບເຂົ້າເປັນສະມາຊິກຂອງອົງການດັ່ງກ່າວ, ພ້ອມກັນນັ້ນ, ກໍ່ຂໍສະແດງຄວາມຂອບໃຈຕໍ່ບັນດາປະເທດຄູ່ສັນຍາທີ່ໃຫ້ໂອກາດ ສປປ ລາວເຂົ້າໃນເວທີສາກົນກໍ່ຄືໃນອົງການການຄ້າໂລກຄັ້ງນີ້, ພ້ອມກັນນີ້, ຂ້າພະເຈົ້າກໍ່ສະແດງຄວາມຂອບອົກຂອບໃຈມາຍັງອົງການຈັດຕັ້ງລັດຖະບານລາວທີ່ກ່ຽວຂ້ອງທີ່ໄດ້ທຸ້ມເທຄວາມສາມາດ ແລະຄວາມກ້າຫານໃນການກະກຽມເຂົ້າເປັນສະມາຊິກນີ້ໃນຫຼາຍປີຜ່ານມາແລະກໍໄດ້ຮັບຜົນສໍາເລັດ, ອັນນີ້ແມ່ນຄວາມທະນົງໃຈຂອງຂ້າພະເຈົ້າ.
