ທ່ານ ດຣ. ທອງລຸນ ສີສຸລິດ ມີຄວາມໝັ້ນໃຈຕໍ່ກອງປະຊຸມສຸດຍອດອາເຊັມຄັ້ງທີ 9 ຈະໄດ້ສຳເລັດຜົນຢ່າງຈົບງາມ ແລະຂອບໃຈການສະໜັບສະໜຸນຂອງຈີນ
（ທ່ານດຣ.ທອງບຸນ ສີສຸລິດ ໃຫ້ສຳພາດຕໍ່ນັກຂ່າວ cri ແລະຂ່າວສານຊີນຮວາ）
ຕາມຂ່າວCRI: ວັນທີ 3 ພະຈິກນີ້, ໃນເວລາໃຫ້ສຳພາດຕໍ່ນັກຂ່າວວິທະຍຸສາກົນແຫ່ງປະເທດຈີນຫຼືCRI ແລະຂ່າວສານຊີນຮວານັ້ນ, ທ່ານ ດຣ. ທອງລຸນ ສີສຸລິດ, ຮອງນາຍົກລັດຖະມົນຕີ ທັງເປັນລັດຖະມົນຕີວ່າການກະຊວງການຕ່າງປະເທດລາວກ່າວວ່າ, ເພື່ອຕ້ອນຮັບກອງປະຊຸມສຸດຍອດອາເຊັມຄັ້ງທີ 9, ສປປລາວໄດ້ມີການກະກຽມຢ່າງເຕັມສ່ວນ, ກອງປະຊຸມເທື່ອນີ້ຈະໄດ້ຮັບຜົນສຳເລັດຢ່າງຈົບງາມແນ່ນອນ.
ທ່ານທອງລຸນ ສີສຸລິດກ່າວວ່າ, ໃນກອງປະຊຸມສຸດຍອດອາເຊັມຄັ້ງທີ9ທີ່ລາວເປັນ ເຈົ້າພາບ, ພວກເຮົາໄດ້ເຮັດຫຼາຍສິ່ງຫຼາຍຢ່າງເພຶ່ອກະກຽມກອງປະຊຸມຄັ້ງນີ້, ການກະກຽມນີ້ໄດ້ໃຊ້ເວລາປີໜຶ່ງຫົກເດືອນຈຶ່ງໄດ້.ຂ້າພະເຈົ້າຄິດວ່າ,ກອງປະຊຸມຄັ້ງນີ້ ໄດ້ມີການກະກຽມເປັນຢ່າງດີ, ເນື້ອໃນກອງປະຊຸມລວມທັງບັນດາຫົວຂໍ້ກອງປະຊຸມ, ເນື້ອໃນຂອງການປຶກສາຫາລືລະຫວ່າງຜູ້ນຳຂອງບັນຫາສະມາຊິກອາເຊັມທີ່ມາຈາກສອງທະວີບ,ຂ້າພະເຈົ້າຄິດວ່າ,ຈະເປັນປະໂຫຍດຫຼາຍທີ່ສຸດ,ໃຫ້ແກ່ການຮັດແໜ້ນສາຍພົວພັນລະຫວ່າງສອງທະວີບ. ແລະຈະເປັນປະໂຫຍດຫຼາຍທີ່ສຸດທີ່ວ່າຜູ້ນຳສອງທະວີບພ້ອມກັນປຶກສາຫາລືບັນຫາສຳຄັນໆ,ທີ່ກ່ຽວຂ້ອງກັບສະພາບການໃນປະຈຸບັນນີ້,ຂອງໂລກກໍ່ຄືສອງທະວີບ.
ທ່ານ ດຣ. ທອງລຸນ ສີສຸລິດກ່າວວ່າ, ໃນຖານເປັນປະເທດເຈົ້າພາບຈັດກອງປະຊຸມສຸດຍອດອາເຊັມຄັ້ງນີ້ມີຄວາມໝາຍສຳຄັນຕໍ່ປະເທດລາວ.ທ່ານກ່າວວ່າ:"ສຳລັບລາວຈະໄດ້ຫຍັງແດ່ຈາກກອງປະຊຸມຄັ້ງນີ້, ຂ້າພະເຈົ້າຄຶດວ່າ, ກ່ອນອື່ນໝົດ, ຜູ້ນຳບັນດາປະເທດທີ່ມາເຂົ້າຮ່ວມກອງປະຊຸມຈະເຫັນນະໂຍບາຍ, ການພັດທະນາ, ນະໂຍບາຍການຕ່າງປະເທດ,ທີ່ສະເໝີຕົ້ນສະເໝີປາຍຂອງສປປລາວ, ທີ່ລາວພວມກ້າວຂຶ້ນ,ລາວພວມກ້າວໄປສູ່ການຂະຫຍາຍ ການຮ່ວມມື, ການເຊື່ອມໂຍງເຂົ້າກັບສາກົນຂຶ້ນເປັນຢ່າງດີ, ກໍ່ໂຊກດີກ່ອນກອງປະຊຸມອາເຊັມຄັ້ງນີ້,ສປປລາວໄດ້ຜ່ານການຕົກລົງຂອງສະພາບໍລິຫານຂອງອົງການການຄ້າໂລກ, ຮັບເອົາລາວເຂົ້າເປັນສະມາຊິກອົງການການຄ້າໂລກໃນວັນທີ26ເດືອນແລ້ວນີ້, ຂ້າພະເຈົ້າຄຶດວ່ານີ້ເປັນໂອກາດອັນດີທີ່ສາມາດເຮັດໃຫ້ຜູ້ນຳແລະປະຊາຊົນຂອງສອງທະວີບອາຊີແລະເອີຣົບມາເຫັນປະເທດລາວ,ທີ່ມີສະຖຽນລະພາບ,ມີຄວາມໝັ້ນຄົງ,ແລະມີເສດຖະກິດທີ່ພວມຂະຫຍາຍຕົວເລື້ອຍໆ, ຈາກນັ້ນກໍ່ຄຶດວ່າ,ເປັນໂອກາດດີທີ່ຈະສືບຕໍ່ໄດ້ຮັບການສະໜັບສະໜູນຈາກປະເທດເພື່ອນມິດ, ທັງເປັນການດຶງດູດການທ່ອງທ່ຽວ, ການລົງທຶນຂອງຕ່າງປະເທດ, ທີ່ເຂົ້າມາປະເທດລາວ, ນັບມື້ນັບຫຼາຍຂຶ້ນ, ໃນອະນາຄົດ. "
