ສ້າງຄວາມໝັ້ນໃຈໃຫ້ຕົນເອງ
(GMT+08:00) 2014-01-22 20:56:48 cri
ອີກອັນໜຶ່ງ, ເຖິງວ່າໃນໂລກນີ້ບໍ່ມີຜູ້ໃດເກັ່ງທຸກຢ່າງ, ແຕ່ໝົດທຸກຄົນກໍ່ມີຈຸດດີຈຸດເດັ່ນຂອງຕົນ, ຊອກຮູ້ຈຸດເດັ່ນຂອງຕົນໃຫ້ຫຼາຍຂຶ້ນ, ແລະສະແດງມັນອອກມາ, ເມື່ອໄດ້ຮັບຄຳຍ້ອງຍໍຈາກຜູ້ອື່ນແລ້ວ, ຄວາມເຊື່ອໝັ້ນຕົນເອງກໍ່ຈະຄ່ອຍໆສູງຂຶ້ນ.
ນອກນັ້ນ, ວິທີສຳຄັນອີກອັນໜຶ່ງກໍ່ແມ່ນການຮ່ຳຮຽນ. ນອກຈາກຮຽນຈາກປຶ້ມແລ້ວ, ຍັງສາມາດຮຽນນຳຄົນແລະສິ່ງແວດລ້ອມອ້ອມຕົວຕື່ມອີກ, ປະສົບການແຫ່ງຄວາມສຳເລັດຜົນຫຼືເສຍໄຊ, ລ້ວນແຕ່ສາມາດຖອດຖອນເອົາບົດຮຽນທີ່ລ້ຳຄ່າໄດ້. ຜ່ານຈາກການຊອກຮູ້, ສາມາດສະສົມຄວາມຮູ້ແລະປັນຍາຫຼາຍ, ວິໄສທັດກໍ່ຈະກວ້າງກວ່າຜູ້ອື່ນ, ຄວາມເຊື່ອໝັ້ນຕົວເອງກໍ່ຈະເພີ່ມຂຶ້ນ.
ຢາກມີຄວາມໝັ້ນໃຈ, ຍັງຕ້ອງກ້າຄິດກ້າທຳ. ພື້ນຖານຂອງຄວາມໝັ້ນໃຈແມ່ນຄວາມສາມາດ, ພື້ນຖານສຳຄັນແຫ່ງຄວາມສາມາດແມ່ນບົດຮຽນ, ສ່ວນບົດຮຽນແມ່ນມາຈາກການທົດລອງແລະການກະທຳຕົວຈິງ. ບົດຮຽນທີ່ສຳເລັດຜົນຈະນຳມາຄວາມໝັ້ນໃຈໂດຍກົງແລະຄວາມມ່ວນຊື່ນໃນໃຈ, ສ່ວນບົດຮຽນທີ່ຫຼົ້ມແຫຼວກໍ່ສາມາດຊ່ວຍພວກເຮົາຫຼີກເວັ້ນອຸປະສັກທີ່ເຄີບພົບພໍ້ໃນເມື່ອກ່ອນນັ້ນບົນເສັ້ນທາງກ້າວໄປສູ່ອະນາຄົດ. ເວົ້າຈາກຄວາມໝາຍດ້ານນີ້ແລ້ວ, ການເຮັດຕົວຈິງໃຫ້ຫຼາຍ, ແມ່ນຊ່ອງທາງອັນສຳຄັນເພື່ອຍົກສູງຄວາມໝັ້ນໃຈ.
ນອກຈາກຊ່ອງທາງຕ່າງໆດັ່ງກ່າວແລ້ວ, ຍັງມີວິທີເລັກໆນ້ອຍໆບາງຢ່າງເພື່ອຍົກສູງຄວາມໝັ້ນໃຈ, ຄື: ລອງຝຶກຍິ້ມໃສ່ໜ້າແວ່ນ, ຍີ້ມໃສ່ຕົນເອງ, ຢ່າເບື່ອໜ່າຍຫຼືຖືເບົາຕົນເອງ; ເວລາຍ່າງ ຢ່າກົ້ມໜ້າ, ເຊິ່ງຈະສ້າງບຸກຄະລິກທີ່ດີໃນສາຍຕາຂອງຜູ້ອື່ນ, ຕົນເອງກໍ່ຈະຮູ້ສຶກມີຄວາມໝັ້ນໃຈໄປໃນຕົວ; ອີກອັນໜຶ່ງ, ໃຫ້ຮູ້ຍ້ອງຍໍຜູ້ອື່ນຫຼາຍແດ່ ເຊິ່ງຈະເຮັດໃຫ້ຜູ້ອື່ນມັກເຮົາ, ຄວາມມັກຂອງຜູ້ອື່ນກໍ່ເພີ່ມຄວາມໝັ້ນໃຈຂອງເຮົາໄດ້; ການໝັ່ນອອກກຳລັງກາຍກໍ່ສຳຄັນຄືກັນ, ມັນບໍ່ພຽງແຕ່ເຮັດໃຫ້ເຮົາສົດຊື່ນ, ມີສຸຂະພາບແຂງແຮງແລະຮູບຊົງທີ່ດີງາມເທົ່ານັ້ນ, ຍັງສາມາດສ້າງພະລັງແຮງທີ່ດີຕື່ມອີກ.
ຜູ້ທີ່ມີຄວາມເຊື່ອໝັ້ນຕົນເອງຢ່າງແທ້ຈິງ, ຈະນຳມາຜົນສະທ້ອນດ້ານບວກຕໍ່ຄົນອ້ອມຂ້າງ, ມີການປະຕິບັດຕົນທີ່ພໍດີພໍງາມ, ມີຫຼັກໝັ້ນຂອງຕົນເອງທັງບໍ່ສ້າງຄວາມຮູ້ສຶກທີ່ຢູ່ໃນທ່າໄດ້ປຽບຕໍ່ຜູ້ອື່ນຕະຫຼອດ, ສາມາດຮັກສາຄວາມສຳພັນທີ່ດີກັບຜູ້ອື່ນ. ຄວາມໝັ້ນໃຈທີ່ເໝາະສົມ ສາມາດຊ່ອຍໃຫ້ທ່ານເຂົ້າສັງຄົມດີກວ່າເກົ່າ ແລະສ້າງຊີວິດອັນດີງາມ.
ການສ້າງຄວາມໝັ້ນໃຈແມ່ນຫົວຂໍ້ຕະຫຼອດຊີວິດ, ຫວັງວ່າຂໍ້ສະເໜີຕ່າງໆທີ່ແນະນຳມານັ້ນຈະມີຜົນດີຕໍ່ທ່ານບໍ່ຫຼາຍກໍ່ໜ້ອຍ, ຫວັງວ່າ, ເມື່ອທ່ານມີຄວາມໝັ້ນໃຈຕໍ່ຕົວເອງຫຼາຍກວ່າເກົ່າແລ້ວ, ທ່ານຈະໄດ້ຮັບຜົນສຳເລັດຫຼາຍກວ່າເກົ່າເທິງເວທີຊີວິດຂອງຕົນ.
