ຢູ່ນຳກັນກັບຄົນແບບໃດ ມັນສຳຄັນຫຼາຍ
(GMT+08:00) 2014-09-09 10:52:39 cri
ໃນຊີວິດ, ເຈົ້າຢູ່ນຳກັນກັບຜູ້ໃດ ມັນສຳຄັນຫຼາຍ, ມັນຈະປ່ຽນແປງເສັ້ນທາງແຫ່ງການເຕີບໂຕຂອງເຈົ້າ, ຫຼືຕັດສິນວ່າເຈົ້າສາມາດໄດ້ຮັບຜົນສຳເລັດຫຼືບໍ່.
ຢູ່ນຳກັນກັບຄົນແບບໃດ, ເຈົ້າກໍ່ຈະມີຊີວິດແບບນັ້ນ. ຢູ່ນຳກັນກັບຄົນດຸໝັ່ນ, ເຈົ້າກໍ່ບໍ່ຫ່ອນຈະຂີ້ຄ້ານ, ຢູ່ນຳກັນກັບຄົນທີ່ມັກເຫັນໄປໃນແງ່ດີ, ເຈົ້າກໍ່ບໍ່ຫ່ອນຈະໂສກເສົ້າຢູ່ສະເໝີ. ຢູ່ນຳກັນກັບຄົນສະຫຼາດ, ເຈົ້າບໍ່ຫ່ອນຈະເປັນຄົນທຳມະດາ, ຢູ່ນຳກັນກັບຜູ້ເຫັນກວ້າງມອງໄກ, ເຈົ້າກໍ່ບໍ່ຫ່ອນຈະສາຍຕາສັ້ນ.
ນັກວິທະຍາສາດເຫັນວ່າ: ມວນມະນຸດຈະຖືກສະພາບແວດລ້ອມກະທົບ. ການກະທົບທີ່ຕັ້ງໜ້າ, ຈະເຮັດໃຫ້ເຮົາເຕັມໄປດ້ວຍພະລັງ, ມີທ່າທີຕັ້ງໜ້າ, ເພີ່ມຄວາມສາມາດໃຫ້ເຮົາ. ຖ້າເຮົາໃກ້ກັບຄົນທີ່ມັກເຫັນໄປໃນແງ່ຮ້າຍ, ເຂົາເຈົ້າຈະເຮັດໃຫ້ຄວາມຝັນເຮົາຄ່ອຍໆຫາຍໄປ, ເສຍພະລັງແລະທ່າທີຕັ້ງໜ້າໂດຍບໍ່ຮູ້ສຶກຕົວ.
ເຮົາຄວນເລືອກຢູ່ນຳກັນກັບຄົນທີ່ມັກເຫັນໄປໃນແງ່ດີຫຼາຍກວ່າ, ເພາະວ່າ, ຄົນທີ່ມັກເຫັນໄປໃນແງ່ດີ ເໝືອນດັ່ງດວງຕາເວັນ, ລາວໄປໃສ ກໍ່ຈະນຳເອົາແສງສະຫວ່າງໄປບ່ອນນັ້ນ, ສ່ວນຄົນທີ່ມັກເຫັນໄປໃນແງ່ຮ້າຍ ເໝືອນດັ່ງດວງເດືອນ, ທຸກມື້ແມ່ນບໍ່ຄືກັນ, ປ່ຽນແປງໄວປານອາກາດ, ຄາດຄະເນບໍ່ໄດ້.
ມີຄົນເວົ້າວ່າ: ດຳລົງຊີວິດໃນໂລກນີ້, ມີເລື່ອງໂຊກດີ 3 ຢ່າງ, ຄື: ໜຶ່ງ, ໃນເວລາຮຽນຢູ່ໂຮງຮຽນ, ສາມາດພົບອາຈານທີ່ດີ, ສອງ, ໃນເວລາເຮັດວຽກ, ສາມາດພົບຫົວໜ້າທີ່ດີ, ສາມ, ໃນເວລາສ້າງຄອບຄົວ, ສາມາດພົບຄົນຮັກທີ່ດີ. ບາງທີ, ຮອຍຍີ້ມຂອງເຂົາເຈົ້າ, ຄຳຢື້ຢາມຖາມຂ່າວຄຳໜຶ່ງທີ່ອົບອຸ່ນຂອງເຂົາເຈົ້າ, ກໍ່ອາດຈະນຳເອົາກຳລັງແຮງໃຈໃຫ້ເຮົາ, ພາໃຫ້ຊີວິດເຮົາເກີດມີຄວາມແຕກຕ່າງ, ປ່ຽນແປງສະພາບການທີ່ບໍ່ດີໄດ້.
ສ່ວນເລື່ອງບໍ່ເປັນໂຊກກໍ່ແມ່ນ: ຢູ່ຄຽງຂ້າງເຮົາ, ຂາດຄົນທີ່ບໍ່ຕັ້ງໜ້າ, ບໍ່ດຸໝັ່ນ, ຂາດຄົນທີ່ມີສາຍຕາເຫັນກວ້າງມອງໄກ, ເຮັດໃຫ້ຊີວິດເຮົາຈືດຈາງຫຼາຍ, ບໍ່ມີສີສັນ.
ຈີນມີສຸພາສິດຄຳໜຶ່ງທີ່ເວົ້າວ່າ: 近朱者赤，近墨者黑，ແປວ່າໃກ້ກັນກັບສີແດງ, ຕົວເອງກໍ່ຖືກຍ້ອມເປັນສີແດງ, ໃກ້ກັນກັບສີດຳ, ຕົວເອງກໍ່ຈະຄ່ອຍໆກາຍເປັນສີດຳ, ສະນັ້ນ, ເລືອກຢູ່ໃກ້ກັນກັບຄົນແບບໃດ, ເປັນເລື່ອງທີ່ສຳຄັນຫຼາຍ.
