ຕາມຂ່າວ CRI: ວັນທີ 4 ກໍລະກົດ ຢູ່ຄຸນມິງ ເມືອງພາກໃຕ້ຂອງຈີນ ໃນເວລາທ່ານເວີນເຈຍປາວ ນາຍົກລັດຖະມົນຕີຈີນພົບປະທ່ານບຸນຍັງ ວໍລະຈິດ ນາຍົກລັດຖະມົນຕີລາວທີ່ມາເຂົ້າຮ່ວມກອງປະຊຸມຜູ້ນຳຄັ້ງທີ 2 ຂອງການຮ່ວມມືທາງເສດຖະກິດຂອງອະນຸພາກພື້ນແມ່ນ້ຳຂອງນັ້ນ ທ່ານເວີນເຈຍປາວກ່າວວ່າ,ຈີນຍິນດີຊຸກຍູ້ການຮ່ວມມືທາງເສດຖະກິດການຄ້າລະຫວ່າງຈີນກັບລາວ,ສົ່ງເສີມແລະສະໜັບສະໜູນວິສາຫະກິດຈີນໄປດຳເນີນການຮ່ວມມືທີ່ຕ່າງຝ່າຍຕ່າງມີຜົນປະໂຫຍດດ້ວຍຫຼາຍຮູບການຢູ່ລາວ.
ທ່ານເວີນເຈຍປາວເວົ້າວ່າ,ຝ່າຍຈີນຍິນດີອີງຕາມຫຼັກການທີ່"ສະເໝີພາບ,ຕ່າງຝ່າຍຕ່າງມີຜົນປະໂຫຍດ,ສະແຫວງໝາກຜົນຕົວຈິງ,ໃຊ້ຫຼາຍຮູບການພ້ອມກັນພັດທະນາ",ຊຸກຍູ້ການຮ່ວມມືທາງເສດຖະກິດການຄ້າລະຫວ່າງສອງປະເທດ. ທ່ານກ່າວເນັ້ນວ່າ,ຝ່າຍຈີນຈະສືບຕໍ່ສະໜອງການຊ່ອຍເຫຼືອທາງເສດຖະກິດເຕັກນິກໃຫ້ແກ່ລາວຕາມຄວາມສາມາດຂອງຕົນ.
ທ່ານບຸນຍັງເວົ້າວ່າ,ລັດຖະບານແລະປະຊາຊົນລາວຂໍສະແດງຄວາມຂອບໃຈຝ່າຍຈີນທີ່ໄດ້ໃຫ້ການສະໜັບສະໜູນຊ່ອຍເຫຼືອແກ່ຝ່າຍລາວມາເປັນເວລາຍາວນານ. ທ່ານເວົ້າວ່າ,ຝ່າຍລາວຫວັງໃຫ້ສອງປະເທດເປີດກວ້າງຂົງເຂດຮ່ວມມື,ຊົມເຊີຍວິສາຫະກິດຈີນໄປລົງທຶນຢູ່ລາວຫຼາຍກວ່າເກົ່າ,ເຂົ້າຮ່ວມການບຸກເບີກພັດທະນາໄຟຟ້ານ້ຳຕົກ,ກະສິກຳແລະຊັບພະຍາກອນບໍ່ແຮ່ຂອງລາວ.
ທ່ານເວີ່ນເຈຍປາວພົບປະທ່ານຟານວັນຂ້າຍ ນາຍົກລັດຖະມົນຕີຫວຽດນາມ
ມື້ດຽວກັນ ທ່ານເວີ່ນເຈຍປາວຍັງໄດ້ພົບປະທ່ານຟານວັນຂ້າຍ ນາຍົກລັດຖະມົນຕີຫວຽດນາມແລະທ່ານໂຊວິນ ນາຍົກລັດຖະມົນຕີມຽນມາ.
ທ່ານເວີ່ນເຈຍປາວພົບປະທ່ານທ່ານໂຊວິນ ນາຍົກລັດຖະມົນຕີມຽນມາ
ໃນການພົບປະເຫຼົ່ານີ້,ທ່ານເວີນເຈຍປາວໄດ້ກ່າວເຖິງການຮ່ວມມືຂອງອະນຸພາກພື້ນແມ່ນ້ຳຂອງ,ທ່ານເວົ້າວ່າ,ຝ່າຍຈີນເອົາໃຈໃສ່ນຳບົດບາດສຳຄັນຂອງອະນຸພາກພື້ນແມ່ນ້ຳຂອງໃນການບັນລຸການພັດທະນາແລະຄວາມຈະເລີນຮຸ່ງເຮືອງຂອງພາກພື້ນ,ແລະມີຄວາມໝັ້ນໃຈເຕັມປ່ຽມຕໍ່ອະນາຄົດຂອງການຮ່ວມມືອະນຸພາກພື້ນ. ຝ່າຍຈີນຈະສືບຕໍ່ຍຶດໝັ້ນນະໂຍບາຍການຕ່າງປະເທດຕໍ່ປະເທດອ້ອມຂ້າງທີ່"ມີໄມຕີຈິດຕໍ່ປະເທດໃກ້ຄຽງ,ຖືປະເທດໃກ້ຄຽງເປັນເພື່ອນມິດ",ເດີນຕາມເສັ້ນທາງທີ່ຮ່ວມມືແບບຕ່າງຝ່າຍຕ່າງໄດ້ຮັບຜົນປະໂຫຍດນຳກັນ,ບັນດາປະເທດໃນອະນຸພາກພື້ນ,ພ້ອມກັນປະກອບສ່ວນເພື່ອການພັດທະນາຮອບດ້ານຂອງພາກພື້ນຕົນແລະການຍົກລະດັບຊີວິດການເປັນຢູ່ຂອງປະຊາຊົນໃຫ້ສູງຂຶ້ນ.
|
