ຕາມ​ຂ່າວສານ​ຊິນ​ຮວາ: ​ເວລາ 15 ​ໂມງ 30 ນາທີ​ຂອງ​ວັນ​ທີ 2 ສິງຫາ​ເວລາ​ປັກ​ກິ່ງ,ຢູ່​ສູນ​ຍິງ​ສົ່ງ​ດາວ​ທຽມ​ຈິ​ວຊວນ​ພາກ​ຕາ​ເວັນ​ຕົກ​ຂອງຈີນ​,ໄດ້​ຍິງ​ສົ່ງ​ດາວ​ທຽມ​ທົດ​ລອງ​ວິທະຍາສາດ​ເຕັກນິກ​ແບບ​ກັບ​ຄືນ​​ໄດ້ໜ່ວຍ​ທີ 21 ຢ່າງ​ສຳ​ເລັດ​ຜົນ.

ດາວ​ທຽມ​ໜ່ວຍ​ນີ້​ແມ່ນ​ໃຊ້​ລູກ​ສອນ​ໄຟ​ຍານ​ສົ່ງ"ຊາງ​ເຈີງ​ເລກ​ສອງ​ຄ."ຍິງສົ່ງ​ຂຶ້ນສູ່​ທ້ອງຟ້າ. ​ຕົວ​ເລກ​ທີ່​ສົ່ງ​ຄືນມາ​ພາຍຫຼັງ​ລູກ​ສອນ​ໄຟ​ຍິງ​ສົ່ງ​ອອກ​ໄປ​ປະມານ 20 ນາທີ​ແລ້ວ​ສະ​ແດງ​ໃຫ້​ເຫັນ​ວ່າ,ດາວ​ທຽມ​ໄດ້​ເຂົ້າສູ່​ໂຄ​ຈອນ​ທີ່​ກຳນົດ​ໄວ້​ກ່ອນ​ຢ່າງ​ສະດວກ,ການ​ຍິງ​ສົ່ງ​​ສຳ​ເລັດ​ຜົນ​ຢ່າງ​ເຕັມ​ເມັດ​ເຕັມ​ໜ່ວຍ.

ດາວ​ທຽມ​ໜ່ວຍ​ນີ້​​ແມ່ນ​ໃຊ້​ສຳລັບຄົ້ນຄວ້າ​ວິທະຍາສາດ,​ສຳຫຼວດ​ດິນ​ແດນ​ແຫ່ງ​ຊາດ,​ວັດ​ແທກ​​ແຕ້ມ​ແຜນ​ທີ່,ການ​ທົດ​ລອງ​ວິທະ​ຍາສາດ​​ເຕັກນິກ​ອະວະກາດ​ເປັນຕົ້ນ.