|
ຕາມຂ່າວCRI: ວັນທີ 1 ກັນຍາຢູ່ທີ່ປັກກິ່ງ, ທ່ານຫວງຈູ ຮອງນາຍົກລັດຖະມົນຕີຈີນໄດ້ເຈລະຈາກັບທ່ານນາຈິບ ຮອງນາຍົກລັດຖະມົນຕີມາເລເຊຍທີ່ມາຢາມຈີນ.
ທ່ານຫວງຈູເວົ້າວ່າ, ການເພີ່ມທະວີການຮ່ວມມືກັນດ້ວຍໄມຕີຈິດກັບອາຊຽນແມ່ນຂອດສຳຄັນຂອງນະໂຍບາຍການຕ່າງປະເທດອ້ອມຂ້າງຂອງຈີນ. ການພົວພັນລະຫວ່າງຈີນກັບອາຊຽນໄດ້ກ້າວເຂົ້າສູ່ໄລຍະໃໝ່ທີ່ຂະຫຍາຍຕົວຢ່າງຮອບດ້ານແລ້ວ. ຝ່າຍຈີນຊົນເຊີຍໃນລະດັບສູງຕໍ່ຄວາມພະຍາຍາມອັນຕັ້ງໜ້າແລະສ່ວນປະກອບອັນສຳຄັນຂອງຝ່າຍມາເລເຊຍເຮັດໃຫ້ເພື່ອຂະຫຍາຍການພົວພັນລະຫວ່າງຈີນກັບອາຊຽນໃນເວລາດົນນານມານີ້, ຈີນຍິນດີພ້ອມກັນກັບປະເທດອາຊຽນເຊິ່ງລວມທັງມາເລເຊຍ, ຊຸກຍູ້ສັນຕິພາບ ສະຖຽນລະພາບແລະຄວາມຈະເລີນຮຸ່ງເຮືອງຂອງພາກພື້ນຕົນ.
ທ່ານນາຈິບກ່າວວ່າ, ລັດຖະບານມາເລເຊຍເອົາໃຈໃສ່ໃນລະດັບສູງຕໍ່ການຂະຫຍາຍການພົວພັນການຄ້າກັບຈີນ, ໂດຍສະເພາະແມ່ນຍິນດີເພີ່ມທະວີການຮ່ວມມືລະຫວ່າງສອງປະເທດໃນຂົງເຂດພະລັງງານ.
|
