|
ປີນີ້, ຈີນມີຫວັງຈະເກັບກ່ຽວທັນຍາຫານລະດູຮ້ອນໄດ້ຫຼາຍ
cri
Author: MO
ຕາມຂ່າວຈາກໜັງສືພິມເຢິນມິນຢື້ປ້າວຂອງຈີນ, ວັນທີ 10 ມິຖຸນາ, ທ່ານຕູ້ຊີງລີນ ລັດຖະມົນຕີກະຊວງກະສິກຳຈີນເຜີຍໃຫ້ຮູ້ວ່າ, ເມື່ອວິນິໄສຕາມສະພາບເກັບກ່ຽວທັນຍາຫານລະດູຮ້ອນແລະດິນຟ້າອາກາດໃນປັດຈຸບັນແລ້ວເຫັນວ່າ, ປີນີ້, ຈີນມີຫວັງຈະເກັບກ່ຽວທັນຍາຫານລະດູຮ້ອນໄດ້ຫຼາຍ.
ທ່ານຕູ້ຊິງລິນແນະນຳວ່າ, ປີນີ້, ເນື້ອທີ່ປູກທັນຍາຫານລະດູຮ້ອນຂອງຈີນໄດ້ເພີ່ມຂຶ້ນຢ່າງໜັກແໜ້ນ, ກະວ່າ, ເນື້ອທີ່ເຂົ້າເບຼຄຸນນະພາບດີຈະກວມເຄິ່ງໜຶ່ງຂຶ້ນໄປຂອງເນື້ອທີ່ເຂົ້າເບຼທັງໝົດ. ພ້ອມກັນນັ້ນ, ທ່ານກ່າວເນັ້ນວ່າ, ທັນຍາຫານລະດູຮ້ອນກວມຜົນຜະລິດທັນຍາຫານໃນໝົດປີພຽງປະມານ 1/5 , ການຜະລິດທັນຍາຫານສ່ວນຫຼາຍໂຮມສູນຢູ່ລະດູໃບໄມ້ຫຼົ່ນ.
ຈີນແມ່ນປະເທດຜະລິດແລະບໍລິໂພກທັນຍາຫານຫຼາຍໃນໂລກ, ເນື້ອທີ່ປູກທັນຍາຫານກວມ 20% ຂຶ້ນໄປຂອງເນື້ອທີ່ທັງໝົດຂອງໂລກ, ປີກາຍນີ້, ຜົນຜະລິດທັນຍາຫານຂອງຈີນໄດ້ລື່ນກາຍ 480 ຕື້ກິໂລ. ໃນຫຼາຍປີມານີ້, ລັດຖະບານຈີນໄດ້ວາງນະໂຍບາຍແລະມາດຕະການຕ່າງໆເຊັ່ນ ຮັກສາດິນປູກຝັງ ຫຼຸດຫຼືຍົກເວັ້ນອາກອນກະສິກຳເປັນຕົ້ນ, ໄດ້ປຸກລະດົມຄວາມຫ້າວຫັນຂອງຊາວນາຈີນໃຫ້ປູກທັນຍາຫານ.
|
|
