|
ຕາມຂ່າວ cri: ວັນທີ 14 ກໍລະກົດຢູ່ທີ່ປັກກິ່ງ, ທ່ານເວິນເຈຍປາວ ນາຍົກລັດຖະມົນຕີຈີນໄດ້ພົບປະທ່ານໂຮນາມຮົງ ຮອງນາຍົກລັດຖະມົນຕີ ທັງເປັນລັດຖະມົນຕີກະຊວງການຕ່າງປະເທດແລະການຮ່ວມມືສາກົນຂອງກຳປູເຈຍທີ່ມາຢ້ຽມຢາມ. ສອງຝ່າຍໄດ້ແລກປ່ຽນຄວາມເຫັນກ່ຽວກັບການພົວພັນລະຫວ່າງສອງຝ່າຍ ບັນຫາສາກົນແລະພາກພື້ນທີ່ສົນໃຈນຳກັນ.
ທ່ານເວິນເຈຍປາວຊົມເຊີຍທ່ານໂຮນາມຮົງມາຢ້ຽມຢາມ, ຫວັງຢາກຊຸກຍູ້ການພົວພັນຮ່ວມມືດ້ວຍໄມຕີຈິດລະຫວ່າງສອງປະເທດໃຫ້ຂະຫຍາຍຕົວຕື່ມອີກ.
ໂດຍຕອບສະໜອງການເຊື້ອເຊີນຂອງທ່ານຫຼີຈ້າວຊິງ ລັດຖະມົນຕີການຕ່າງປະເທດຈີນ, ທ່ານໂຮມນາມໄດ້ເດີນທາງມາຮອດປັກກິ່ງໃນວັນທີ 13 ກໍລະກົດ, ເລີ່ມຢ້ຽມຢາມຈີນຢ່າງເປັນທາງການ. ຕອນເຊົ້າວັນທີ 14 ກໍລະກົດ, ທ່ານຫຼີຈ້າວຊິງໄດ້ພົບປະໂອລົມກັບທ່ານໂຮນາມຮົງ. ທ່ານຫຼີຈ້າວຊິງກ່າວວ່າ, ຝ່າຍຈີນຍິນດີເພີ່ມທະວີການໄປມາຫາສູ່ກັນກັບກຳປູເຈຍໃນຂັ້ນສູງ, ລົງເລິກການຮ່ວມມືດ້ານເສດຖະກິດການຄ້າ, ຊຸກຍູ້ການຮ່ວມມືດ້ວຍໄມຕີຈິດທີ່ຕ່າງຝ່າຍຕ່າງມີຜົນປະໂຫຍດລະຫວ່າງສອງປະເທດໃຫ້ຂະຫຍາຍໄປໜ້າຢ່າງບໍ່ຢຸດຢັ້ງ. ທ່ານໂຮມນາມຮົງໄດ້ກ່າວລື້ມວ່າ ກຳປູເຈຍຈະສືບຕໍ່ປະຕິບັດນະໂຍບາຍຈີນດຽວ.
ຕອນຄ່ຳມື້ດຽວກັນ, ທ່ານຖາງເຈຍສວນ ທີ່ປຶກສາແຫ່ງລັດຈີນກໍ່ໄດ້ພົບປະທ່ານໂຮນາມຮົງ.
|
