ຕາມຂ່າວສານຊິນຮວາ:ອາທິດນີ້,ໃນເວລາຕອບຄຳຖາມຂອງນັກຂ່າວທາງໂທລະສັບ,ທ່ານລິວຈ້ຽນຊ່າວ ໂຄສົກກະຊວງການຕ່າງປະເທດຈີນກ່າວວ່າ,ໃນຖານເປັນຊ່ອງທາງສົນທະນາຮ່ວມມືເພື່ອຄວາມປອດໄພຫຼາຍຝ່າຍທາງການທີ່ສຳຄັນທີ່ສຸດໃນພາກພື້ນອາຊີປາຊີຟິກ,ເວທີປາໄສພາກພື້ນອາຊຽນໄດ້ເສີມຂະຫຍາຍບົດບາດອັນຕັ້ງໜ້າໃນດ້ານຕ່າງໆຄືເພີ່ມທະວີຄວາມໄວ້ເນື້ອເຊື່ອໃຈກັນ,ໂຮມຄວາມຮັບຮູ້ທີ່ຄືກັນໃນດ້ານການຮ່ວມມື,ຊຸກຍູ້ການຮ່ວມມືສົນທະນາກັນເປັນຕົ້ນ.
ທ່ານລິວຈ້ຽນຊ່າວກ່າວວ່າ,ທ່ານຫຼີຈ້າວຊິ່ງ ລັດຖະມົນຕີການຕ່າງປະເທດຈີນຈະນຳພາຄະນະໄປກົວລາລຳເປີຂອງມາເລເຊຍໃນວັນທີ26ຫາວັນທີ28 ກໍລະກົດ,ເພື່ອເຂົ້າຮ່ວມກອງປະຊຸມລັດຖະມົນຕີການຕ່າງປະເທດຂອງອາຊຽນກັບຈີນຍີ່ປຸ່ນແລະສ.ເກົາຫຼີຄັ້ງທີ7,ກອງປະຊຸມບໍ່ເປັນທາງການຂອງລັດຖະມົນຕີການຕ່າງປະເທດຂອງອາຊຽນກັບປະເທດສົນທະນາ,ແລະກອງປະຊຸມລັດຖະມົນຕີການຕ່າງປະເທດຂອງເວທີປາໄສພາກພື້ນອາຊຽນຄັ້ງທີ13.ໃນໄລຍະໄຂກອງປະຊຸມ,ທ່ານຫຼີຈ້າວຊິງລັດຖະມົນຕີການຕ່າງປະເທດຈີນຈະຈັດການພົບປະສອງຝ່າຍກັບລັດຖະມົນຕີການຕ່າງປະເທດຂອງບາງປະເທດຕາມຮີດຄອງ.ຝ່າຍຈີນຄອງຄອຍແລກປ່ຽນຄວາມເຫັນກັບບັນດາຝ່າຍກ່ຽວກັບບັນຫາສາກົນແລະພາກພື້ນທີ່ສົນໃຈນຳກັນ,ຫວັງໃຫ້ສົນທະນາກັນເພື່ອເພີ່ມທະວີຄວາມເຂົ້າໃຈກັນແລະໄວ້ເນື້ອເຊື່ອໃຈກັນລະຫວ່າງບັນດາປະເທດ,ຊຸກຍູ້ການຮ່ວມມືດ້ານຄວາມປອດໄພຂອງພາກພື້ນ,ພ້ອມກັນປົກປັກຮັກສາສັນຕິພາບແລະສະຖຽນລະພາບຂອງພາກພື້ນ.
|