|
ທະນາຄານປະຊາຊົນຈີນຈະສືບຕໍ່ຄວບຄຸມບໍ່ໃຫ້ສິນເຊື່ອເພີ່ມຂຶ້ນຫຼາຍເກີນໄປ
cri
Author: mo
ຕາມຂ່າວCRI：ວັນທີ 2 ສິງຫາ, ຂ່າວສານຊີນຮວາ ຂ່າວສານແຫ່ງຊາດຈີນໄດ້ອອກບົດຄວາມບົດໜຶ່ງທີ່ແຕ່ງໂດຍທະນາຄານປະຊາຊົນຈີນກ່າວເນັ້ນວ່າ, ທະນາຄານກາງຈະສືບຕໍ່ປະຕິບັດນະໂຍບາຍເງິນຕາທີ່ໜັກແໜ້ນ, ຄວບຄຸມບໍ່ໃຫ້ສິນເຊື່ອເພີ່ມຂຶ້ນຫຼາຍເກີນໄປ.
ບົດຄວາມຂຽນວ່າ, ໃນ 6 ເດືອນຕົ້ນປີນີ້, ສິນເຊື່ອຢູ່ຈີນເພີ່ມຂຶ້ນໄວຫຼາຍ, ການລົງທຶນໃນຂະແໜງອະສັງຫາລິມະຊັບເພີ່ມຂຶ້ນໄວໂພດ, ນີ້ຈະເຮັດໃຫ້ຄວາມສ່ຽງດ້ານສິນເຊື່ອການທະນາຄານເພີ່ມຂຶ້ນ.
ບົດຄວາມຊີ້ອອກວ່າ, ເພື່ອສະກັດກັ້ນສິນເຊື່ອເພີ່ມຂຶ້ນໄວເກີນໄປ, ທະນາຄານກາງໄດ້ຍົກອັດຕາດອກເບ້ຍເງິນກູ້ແລະອັດຕາເງິນສຳຮອງອອມສິນຂອງທະນາຄານໃຫ້ສູງຂຶ້ນ, ແລະຮຽກຮ້ອງໃຫ້ທະນາຄານຈຳກັດການປ່ອຍເງິນກູ້ໃຫ້ຂະແໜງອະສັງຫາລິມະຊັບຫຼືຊັບຄົງທີ່ຫຼາຍເກີນໄປ, ແລະເພີ່ມການຄຸ້ມຄອງປ່ອຍເງິນກູ້ສິນເຊື່ອໃຫ້ບໍລິສັດທຸລະກິດທີ່ດິນແລະເຄຫະ. ກ້າວຕໍ່ໄປ, ຈະສົ່ງເສີມການບໍລິໂພກ, ຫຼຸດອັດຕາດອກເບ້ຍອອມສິນ, ເພີ່ມການນຳເຂົ້າ, ສົ່ງເສີມເອກະຊົນລົງທຶນແລະເພີ່ມລະດັບລອຍຕົວອັດຕາແລກປ່ຽນເງິນຕາ, ໃຊ້ມາດຕະການຊຸກຍູ້ລາຍຮັບກັບລາຍຈ່າຍສາກົນໃຫ້ດຸນດ່ຽງກັນ, ເຮັດໃຫ້ສິນເຊື່ອເພີ່ມຂຶ້ນໃຫ້ພໍດ້າມພໍດີ, ສະໜອງສະພາບແວດລ້ອມການທະນາຄານແລະເງິນຕາອັນໝັ້ນທ່ຽງໃຫ້ແກ່ການໝູນວຽນຂອງເສດຖະກິດຈີນ.
|
|
