ຕາມຂ່າວສານຊິນຮວາ:ໂດຍຕອບສະໜອງຄຳເຊີນຂອງທ່ານອູປາງກົວ ປະທານຄະນະປະຈຳສະພາປະຊາຊົນແຫ່ງຊາດຈີນ,ຕອນບ່າຍວັນທີ7 ສິງຫາ,ຄະນະຜູ້ແຜນສະພາສູງອາເມລິກາເດີນທາງມາຮອດເມືອງກຸ້ຍລິນ ເມືອງພາກໃຕ້ຂອງຈີນ,ເລີ່ມຢ້ຽມຢາມຈີນ.
ຄະນະຜູ້ແທນນຳໂດຍທ່ານເທດ ສິຕີເວັນສ໌ ຮັກສາການແທນປະທານແລະທ່ານເດັນນີວ ອີໂນເຢ ສະມາຊິກສະພາສູງອາເມລິກາ.ໃນໄລຍະຢ້ຽມຢາມຈີນ,ຄະນະຜູ້ແທນສະພາສູງອາເມລິກາກັບສະພາປະຊາຊົນແຫ່ງຊາດຈີນຈະພົບປະກັນຢ່າງເປັນທາງການເທື່ອທີ່ສາມຕາມກົນໄກແລກປ່ຽນສາມປີລະຫວ່າງສະພາຈີນອາເມລິກາ.ສອງຝ່າຍຈະແລກປ່ຽນຄວາມເຫັນກັນກ່ຽວກັບການພົວພັນຈີນອາເມລິກາ,ບັນຫາໄຕ້ຫວັນ,ການຮ່ວມມືດ້ານເສດຖະກິດການຄ້າລະຫວ່າງຈີນອາເມລິກາແລະສະຖາະນການສາກົນແລະພາກພື້ນເປັນຕົ້ນ.ນອກນີ້,ບັນຫາທີ່ກວມໂລກເຊັ່ນພະລັງງານ,ຕ້ານການກໍ່ການຮ້າຍ,ໄຂ້ຫວັດສັດປີກແລະງານກິລາໂອແລມປິກເປັນຕົ້ນກໍ່ຈະກາຍເປັນຫົວຂໍ້ຫາລືກັນຂອງສະມາຊິກສອງສະພາ.
ທ່ານຫູຈີນທ່າວ ປະທານປະເທດຈີນແລະທ່ານອູປາງກົວ ປະທານຄະນະປະຈຳສະພາປະຊາຊົນແຫ່ງຊາດຈີນຍັງຈະແຍກອອກພົບປະແລະເຈລະຈາກັບຄະນະຜູ້ແທນຢູ່ປັກກິ່ງ.
|