ຕາມ​ຂ່າວສານ​ຊີ​ນຮວາ: ວັນ​ທີ 15 ສິງຫາ, ຢູ່​ທີ່​ປັກ​ກິ່ງ, ທ່ານ​ເຈິ່ງ​ເຜີຍ​ຢຽນ ຮອງ​ນາຍົກລັດຖະມົນຕີຈີນກ່າວ​ວ່າ, ລັດຖະບານ​ຈີນ​ຍິນ​ດີ​ເພີ່ມ​ທະວີ​ການ​ຮ່ວມ​ມື​ກັບ​ປະຊາ​ຄົມ​ໂລກ, ພະຍາຍາມ​ບັນລຸ​ເປົ້າໝາຍ​ພັດທະນາ​ສະຫັດ​ສະ​ວັດ.
​
ໃນ​ເວລາ​ພົບ​ປະ​ທ່ານ​ຊັກສ໌ ທີ່​ປຶກສາ​ພິ​ເສດ​ຂອງ​ເລຂາທິການ​ໃຫຍ່​ສະຫະ​ປະຊາ​ຊາດ​ກ່ຽວ​ກັບ​ເປົ້າໝາຍ​ພັດທະນາ​ສະຫັດ​ສະ​ວັດ​ຢູ່​ທີ່​ປັກ​ກິ່ງ, ທ່ານ​ເຈິ່ງ​ເຜີຍ​ຢຽນ​ກ່າວ​ວ່າ, ລັດຖະບານ​ຈີນ​ຕັ້ງໜ້າ​ຈັດຕັ້ງປະຕິບັດ​ມາດ​ຕະການ 5 ລາຍ​ທີ່ຈີນສະໜັບສະໜູນການ​ພັດທະນາ​ຂອງປະ​ເທດ​ພວມ​ພັດທະນາທີ່ທ່ານ​ຫູ​ຈິນທາວ ປະທານ​ປະ​ເທດ​ຈີນ​ປະກາດ​ໃນ​ກອງ​ປະຊຸມ​ສຸດ​ຍອດ​ຄົບຮອບ 60 ປີ​ຂອງ​ສະຫະ​ປະຊາ​ຊາດ​ປີ 2005, ພ້ອມ​ທັງ​ຫວັງ​ໃຫ້​ປະຊາ​ຄົມ​ໂລກ​ຕັ້ງໜ້າ​ຈັດຕັ້ງປະຕິບັດ​ໝາກຜົນ​ຂອງ​ກອງ​ປະຊຸມ​ສຸດ​ຍອດ​ຄົບຮອບ 60 ປີ​ຂອງ​ສະຫະ​ປະຊາ​ຊາດ, ສ້າງ​ຂອບ​ປະ​ເມີນ​ຄວາມ​ຄືບ​ໜ້າ​ຂອງ​​ເປົ້າໝາຍ​ພັດທະນາ​ສະຫັດ​ສະ​ວັດ​ທີ່​ທ່ຽງ​ທຳ ສົມ​ເຫດ​ສົມ​ຜົນ​ແລະ​ບັງ​ເກີດ​ຜົນ​, ປະ​ເມີນ​ຄວາມ​ຄືບ​ໜ້າ​ຂອງ​ບັນດາ​ປະ​ເທດ​ຢ່າງ​ທັນ​ການ, ຕິດຕາມ​ກວດກາ​ແລະ​ຊຸກ​ຍູ້​ການ​ຮ່ວມ​ມື​ລະຫວ່າງ​ຊາດ​ແລະ​ການຈັດຕັ້ງປະຕິບັດຕາມ​ຄ້ຳ​ໝັ້ນສັນຍາ​ແຫ່ງ​ການ​ຊ່ອຍ​ເຫຼືອພັດທະນາ.

ສອງ​ຝ່າຍ​ຍັງ​ໄດ້​ແລກປ່ຽນ​ຄວາມ​ເຫັນ​ກ່ຽວ​ກັບ​ບັນຫາ​ຕ່າງໆທີ່​ສົນ​ໃຈ​ນຳ​ກັນ​ເຊັ່ນ ​ສະຖານະ​ການ​ເສດຖະກິດ​ມະຫາ​ພາກ​ໃນ​ສະ​ເພາະ​ໜ້າ​ນີ້, ວຽກ​ງານ​ບຳບັດ​ຄວາມທຸກ​ຍາກ, ​ແລະ​ພະລັງງານ​ທີ່​ເກີດ​ໃໝ່​ໄດ້​​ເປັນຕົ້ນ.