|
ເຈົ້າໜ້າທີ່ຈີນກ່າວວ່າ, ຈີນບໍ່ໄດ້ປະຕິບັດນະໂຍບາຍໃຫ້ວັດທະນະທຳຊົນເຜົ່າສ່ວນໜ້ອຍຫັນເປັນອັນດຽວກັນ
cri
Author: mo
ຕາມຂ່າວCRI: ວັນທີ 21 ກັນຍາຢູ່ທີ່ປັກກິ່ງ, ທ່ານຕ່ານຈູ່ອາງປັ່ນ ຮອງຫົວໜ້າຄະນະກຳມະການວຽກງານຊົນເຜົ່າແຫ່ງຊາດຈີນກ່າວວ່າ, ຈີນບໍ່ໄດ້ປະຕິບັດນະໂຍບາຍໃຫ້ວັດທະນະທຳຊົນເຜົ່າສ່ວນໜ້ອຍຫັນເປັນອັນດຽວກັນ.
ໃນເວລາຕອບບັນຫາຂອງນັກຂ່າວຢູ່ກອງປະຊຸມຂ່າວທີ່ຫ້ອງການຖະແຫຼງຂ່າວຂອງລັດຖະບານຈີນຈັດຂຶ້ນ, ເຈົ້າໜ້າທີ່ເຜົ່າຕິເບດຜູ້ນີ້ເວົ້າວ່າ, ນະໂຍບາຍຊົນເຜົ່າຂອງຈີນແມ່ນສ້າງຢູ່ບົນພື້ນຖານທີ່ສະເໝີພາບ ເຄົາລົບ ສາມັກຄີແລະຊ່ອຍເຫຼືອເຊິ່ງກັນແລະກັນ. ກົດໝາຍຕ່າງໆຂອງຈີນເຊັ່ນ "ລັດຖະທຳມະນູນ" ແລະ"ກົດໝາຍວ່າດ້ວຍການປົກຄອງຕົນເອງໃນເຂດຊົນເຜົ່າສ່ວນໜ້ອຍ"ເປັນຕົ້ນລ້ວນແຕ່ໄດ້ກຳນົດຢ່າງຈະແຈ້ງວ່າ, ຫ້າມດູໝິ່ນຊົນເຜົ່າ, ເຄົາລົບວັດທະນະທຳຂອງບັນດາຊົນເຜົ່າ, ສະໜັບສະໜູນຊົນເຜົ່າສ່ວນໜ້ອຍພັດທະນາວັດທະນະທຳທີ່ມີສີສັນພິເສດຂອງຊົນເຜົ່າຕົນ, ພັດທະນາແລະນຳໃຊ້ພາສາແລະຕົວໜັງສືຂອງຊົນເຜົ່າຕົນ.
ທ່ານຕ່ານຈູ່ອາງປັ່ນເວົ້າວ່າ, ໃນ 50 ກວ່າປີມານີ້, ຈີນໄດ້ເກັບໂຮມໜັງສືຊົນເຜົ່າສ່ວນໜ້ອຍລ້ານກວ່າຊະນິດ, ແລະພິມຈຳໜ່າຍ 5 ພັນກວ່າຊະນິດ. ນອກນັ້ນ, ພາສາແລະຕົວໜັງສືຂອງຊົນເຜົ່າສ່ວນໜ້ອຍໄດ້ຮັບການນຳໃຊ້ຢ່າງກວ້າງຂວາງສົມຄວນໃນປື້ມ ໜັງສືພິມ ວິທະຍຸ ຮູບເງົາແລະໂທລະພາບ. ປັດຈຸບັນ, ຢູ່ຈີນ, ສະເພາະແຕ່ໜັງສືພິມແລະວາລະສານທີ່ໃຊ້ຕົວໜັງສືຊົນເຜົ່າກໍໄດ້ລື່ນກາຍ 320 ຊະນິດ.
|
|
