|
ປະຈຸບັນນີ້,ປະຊາຊົນຈີນພວມປະເຊີນກັບບັນຫາທີ່ວ່າ ຄ່າປິ່ນປົວພະຍາດນັບມື້ນັບແພງຂຶ້ນ.ປິ2005,ບົດລາຍງານສຳຫຼວດການບໍລິການດ້ານສາທາລະນະສຸກແຫ່ງຊາດຄັ້ງທີ3ທີ່ປະກາດໂດຍກະຊວງສາທາລະນະສຸກຈີນໄດ້ເປີດເຜີຍວ່າ,ຢູ່ຈີນ,ມີປະຊາຊົນໃນຕົວເມືອງເກືອບເຄິ່ງໜຶ່ງເປັນພະຍາດແລ້ວບໍ່ໄປກວດຢູ່ໂຮງໝໍ,ແລະມີປະຊາຊົນຕົວເມືອງເກືອບ30%ເປັນພະຍາດໜັກແລ້ວບໍ່ຢາກນອນໂຮງໝໍ.
ອົງການປົກຄອງທຸກຂັ້ນຂອງຈີນກຳລັງຄົ້ນຄວ້າວິທີແກ້ໄຂບັນຫາດັ່ງກ່າວຢ່າງຕັ້ງໜ້າ.ປີ 2005,ອົງການປົກຄອງຄຸ້ມໄຫຕ້ຽນນະຄອນປັກກິ່ງໄດ້ສ້າງຕັ້ງໂຮງໝໍສາທາລະນະຫຼັງໜຶ່ງທີ່ເກັບຄ່າປິ່ນປົວຖືກ ເຊິ່ງເອີ້ນວ່າໂຮງໝໍຊ້າງຕີ້,ເພື່ອປົວແປງເງື່ອນໄຂປິ່ນປົວພະຍາດຂອງຄົນທີ່ມີລາຍໄດ້ຕ່ຳແລະຜ້ານກາງ.ໂຮງໝໍຫຼັງນີ້ໄດ້ເລີ່ມບໍລິການມາເກືອບປີໜຶ່ງແລ້ວ,ໄດ້ຮັບຄວາມຊົມເຊີຍຈາກປະຊາຊົນຕົວເມືອງໃນແຫ່ງນັ້ນ.
ນາງເກີມີງອ້ຽນມາຈາກຊົນນະບົດຂອງເມືອງຈົງກິງ ພາກຕາເວັນຕົກຂອງຈີນ,ຫ້າປີກ່ອນ,ນາງມາເຮັດວຽກຢູ່ປັກກິ່ງ,ເວລາບໍ່ດົນ,ນາງກໍຖືກກວດພົບວ່າເປັນພະຍາດມະເຮັງເລືອດ.ໃບເກັບເງິນຄ່າປິ່ນປົວທີ່ໂຮງໝໍເອົາໃຫ້ນັ້ນເຮັດໃຫ້ນາງຮູ້ສຶກທົນຮັບບໍ່ໄດ້.ນາງເວົ້າວ່າ:"ຂ້ອຍຖາມວ່າ,ຕ້ອງເສຍເງິນເທົ່າໃດ?ນາຍໝໍບອກວ່າ,8ພັນຢວນ,ຂ້ອຍໄດ້ຍິນແລ້ວຕື່ນ ຕົກໃຈ,ນ້ຳຕາໄຫຼອອກກັບບາດ."
ນາງເກີມີງອ້ຽນບໍ່ກ້າໄປໂຮງໝໍອີກຍ້ອນຄ່າປິ່ນປົວທີ່ແພງຫຼາຍ,ມີແຕ່ອາໄສການອ່ານປື້ມກ່ຽວກັບມະເຮັງເລືອດໃນເຮືອນ.ເມື່ອເວລາຜ່ານໄປສອງປີແລ້ວ,ອາການພະຍາດຂອງນາງໜັກໜ່ວງກວ່າເກົ່າ.ເວລານັ້ນ,ນາງເກີມີງອ້ຽນໄປໂຮງໝໍອີກ,ແຕ່ຄ່າປິ່ນປົວໄດ້ແພງກວ່າສອງປີຜ່ານມານັ້ນອີກ.ນາງເວົ້າວ່າ:"ນາຍໝໍບອກວ່າ,ຕ້ອງກຽມເງິນ3ໝື່ນຢວນເພື່ອນອນຢູ່ໂຮງໝໍ,ເວລານັ້ນ,ຂ້ອຍໄດ້ຍິນແລ້ວກໍເວົ້າກັບຕົນເອງວ່າ,ເມືອບ້ານດີກວ່າ,ບໍ່ຕ້ອງປົວມັນລະ,ໄປຫາເງິນຫຼາຍປານນັ້ນມາແຕ່ໃສ?"
ອາການພະຍາດຂອງນາງເກີມີງອ້ຽນໜັກໜ່ວງຂຶ້ນເລື່ອຍໆ.ດຽວນີ້,ມີແຕ່ການຜ່າຕັດປ່ຽນໄຂຄໍ່ຈຶ່ງຈະກູ້ຊີວິດຂອງນາງໄດ້.ເປັນແຕ່ບຸນ,ນ້ອງຊາຍຂອງນາງມີຈຸລັງລຳຕົ້ນສ້າງເລືອດທີ່ເໝາະກັບນາງ,ແລະມີແຕ່ນາງເກີມີງອ້ຽນໄດ້ຮັບການຜ່າຕັດປ່ຽນໄຂຄໍ່ເທົ່ານັ້ນ,ຈຶ່ງມີໂອກາດທີ່ມີຊີວິດຕໍ່ໄປ.ແຕ່ວ່າ,ຄ່າປິ່ນປົວໄດ້ເພີ່ມຂຶ້ນຫຼາຍເທົ່າ,ຕ້ອງການ4ຫາ5ແສນຢວນ.
ຫຼາຍຄົນກໍ່ມີປະສົບການຄືກັນກັບນາງເກີມີງອ້ຽນ:ໃນຍາມເປັນພະຍາດ,ບໍ່ໄດ້ໄປກວດຢູ່ໂຮງໝໍແຕ່ຫົວທີ,ເຮັດໃຫ້ອາການພະຍາດຄ່ອຍໆໜັກລົງ,ໃນທີ່ສຸດ,ຕ້ອງເສຍເງິນຫຼາຍພິລຶກເພື່ອປິ່ນປົວພະຍາດ.ເຮັດແນວໃດຈຶ່ງຈະສາມາດຫຼີກເວັ້ນບໍ່ໃຫ້ເລື່ອງແບບນີ້ເກີດຂຶ້ນຕໍ່ໄປ?ທ່ານຢູສຽວຊິ່ນ ຜູ້ລິເລີ່ມຜູ້ໜຶ່ງຂອງໂຮງໝໍຊ້າງຕີ້ບອກນັກຂ່າວວ່າ,ອົງການປົກຄອງສ້າງຕັ້ງໂຮງໝໍສາທາລະນະທີ່ເກັບຄ່າປິ່ນປົວຖືກຕໍ່ປະຊາຊົນ,ມີຈຸດປະສົງສະໜອງສິ່ງຄ້ຳ ປະກັນການປິ່ນປົວພະຍາດອັນພື້ນຖານໃຫ້ແກ່ປະຊາຊົນໃນຕົວເມືອງ,ເຮັດໃຫ້ຄົນທຸກຍາກກໍ່ສາມາດປົວພະຍາດໄດ້.
ເພື່ອຈຸດປະສົງດັ່ງກ່າວ,ປີ2005,ທ່ານຢູສຽວຊ່ຽນ ຫົວໜ້າພະແນກສາທາລະນະສຸກຄຸ້ມໄຫຕ້ຽນໃນຄາວນັ້ນກັບທ່ານອື່ນໆໄດ້ລິເລີ່ມສ້າງຕັ້ງໂຮງໝໍຊ້າງຕີ້ ໂຮງໝໍສາທາລະນະທີ່ເກັບຄ່າປິ່ນປົວຖືກຫຼັງທຳອິດຂອງປັກກິ່ງ.ໂຮງໝໍໃໝ່ຫຼັງນີ້ຕັ້ງຢູ່ຄຸ້ມໄຫຕ້ຽນຂອງປັກກິ່ງ,ເຊິ່ງເປັນບ່ອນທີ່ມີສິ່ງອຳນວຍຄວາມສະດວກໃນການປິ່ນປົວພະຍາດອ່າວຄົບຖ້ວນ,ຢູ່ແຫ່ງນີ້,ມີຫຼາຍໂຮງໝໍມີມາດຕະຖານສາກົນ,ແຕ່ຄ່າປິ່ນປົວພະຍາດທີ່ແພງພິລຶກ,ເຮັດໃຫ້ຊາວກະສິກອນຫຼາຍແສນຄົນແລະຜູ້ທຸກຍາກໃນຕົວເມືອງໜຶ່ງໝື່ນກວ່າຄົນທີ່ດຳລົງຊີວິດຢູ່ບໍລິເວນ ນີ້ທົນຮັບບໍ່ໄດ້.
ແນວຄິດທຸລະກິດຂອງໂຮງໝໍຊ້າງຕີ້ຕ່າງກັນກັບໂຮງໝໍສາທາລະນະແບບທຳມະດາ.ທຳມະດາແລ້ວ,ອົງການປົກຄອງລົງທຶນໜ້ອຍທີ່ສຸດຕໍ່ໂຮງໝໍສາທາລະນະ,ຄື ລາຍຈ່າຍ90%ຕ້ອງໄດ້ມາຈາກຄົນປ່ວຍ,ສະນັ້ນໂຮງໝໍຕ້ອງດຳເນີນທຸລະກິດຕາມກົນໄກຕະຫຼາດ.ແຕ່ໂຮງໝໍຊ້າງຕີ້ໄດ້ທົດລອງເສັ້ນທາງທີ່ຕ່າງໝູ່,ຄື ໃນໂຮງໝໍໃໝ່ຫຼັງນີ້,ບໍ່ພຽງແຕ່ລາຍໄດ້ຂອງນາຍໝໍຈ່າຍໂດຍການເງິນສາທາລະນະໂດຍກົງເທົ່ານັ້ນ,ຕົ້ນທຶນຄົງທີ່ທັງໝົດ ຕົວ ຢ່າງຄືຄ່າເຊົ່າທີ່ດິນ ອຸປະກອນປິ່ນປົວພະຍາດເປັນຕົ້ນລ້ວນແຕ່ຈ່າຍໂດຍອົງການປົກຄອງ,ບໍ່ຕ້ອງໃຫ້ໂຮງໝໍຊອກຫາເອງ.
ຍ້ອນມີການເກື້ອກູນຈາກອົງການປົກຄອງ,ເຮັດໃຫ້ຄ່າສາລະພັດຂອງໂຮງໝໍຊ້າງຕີ້ຖືກກວ່າໂຮງໝໍອື່ນໆ.ພາຍຫຼັງໂຮງໝໍຊ້າງຕີ້ເລີ່ມບໍລິການໄດ້ສີ່ເດືອນ,ຕຽງຄົນເຈັບກໍບໍ່ພໍ,ເພາະວ່າມີຄົນເຈັບນັບມື້ນັບຫຼາຍມາປົວພະຍາດຢູ່ໂຮງໝໍຫຼັງນີ້,ໃນນັ້ນມີຫຼາຍຄົນແມ່ນຍ້າຍມາຈາກໂຮງໝໍທີ່ມີຊື່ສຽງຂອງຄຸ້ມໄຫຕ້ຽນ.ພະແນກທີ່ມີຄົນຫຼາຍກວ່າໝູ່ແມ່ນພະແນກ ປະດຸງຄັນ,ພາຍຫຼັງໂຮງໝໍປະກາດຮັບໃຊ້ປະຊາກອນເຄື່ອນທີ່ແລ້ວ,ພຽງແຕ່ສີ່ເດືອນ,ຈຳນວນເດັກເກີດໃໝ່ຢູ່ໂຮງໝໍຊ້າງຕີ້ກໍໄດ້ຫຼາຍເປັນທີສອງໃນຄຸ້ມໄຫຕ້ຽນ.
ອົງການປົກຄອງຄຸ້ມໄຫຕ້ຽນປັກກິ່ງໄດ້ຕົກລົງວ່າ,ຖ້າວ່າໂຮງໝໍສາທາລະນະທີ່ບໍ່ມີກຳໄລຫຼັງນີ້ດຳເນີນວຽກງານໄປຢ່າງສະດວກ,ຄຸ້ມໄຫຕ້ຽນຈະຕັ້ງໂຮງໝໍເກັບຄ່າຖືກອີກຕື່ມສອງຫຼັງຕາມຮູບແບບດັ່ງກ່າວ,ໂຮງໝໍສອງຫຼັງນີ້ຈະບໍລິການຄົນຕ່າງຖິ່ນທີ່ມາເຮັດວຽກຢູ່ປັກກິ່ງແລະປະຊາຊົນຜູ້ມີລາຍໄດ້ຕ່ຳ.ແຜນການດັ່ງກ່າວໄດ້ຮັບການຢຶນຢັນແລະສະໜັບສະໜູນຈາກກະຊວງສາທາລະນະສຸກຈີນ,ຢູ່ຫຼາຍທ້ອງຖິ່ນຂອງຈີນພວມທົດລອງສ້າງຕັ້ງໂຮງໝໍແບບນີ້.
ຄຽງຄູ່ກັບຈຳນວນຄົນເຈັບທີ່ມາປົວພະຍາດຢູ່ໂຮງໝໍຊ້າງຕີ້ເພີ່ມຂຶ້ນ,ບາງຄົນເປັນຫ່ວງວ່າ ຖ້າວ່າໂຮງໝໍບໍ່ໄດ້ກຳໄລຈາກຄົນເຈັບ,ໂຮງໝໍຍັງຈະຄົງຕົວຢູ່ໄດ້ບໍ່?ໂຮງໝໍຫຼັງນີ້ຈະດຳເນີນວຽກງານໄປໄດ້ດົນປານໃດ.ກ່ຽວກັບຄວາມເປັນຫ່ວງດັ່ງກ່າວ,ທ່ານນາງວາງລີງ ຫົວ ໜ້າໂຮງໝໍຊ້າງຕີ້ກ່າວວ່າ,ພາຍຫຼັງຕົ້ນທຶນຄົງທີ່ຂອງໂຮງໝໍຊ້າງຕີ້ຈ່າຍໂດຍການເງິນອົງການປົກຄອງແລ້ວ,ເຫຼືອແຕ່ຕົ້ນທຶນໝູນວຽນຈຳນວນໜຶ່ງ ຄື ຄ່ານ້ຳ ຄ່າໄຟຟ້າເປັນຕົ້ນເທົ່ານັ້ນ,ໂດຍຄຽງຄູ່ກັບຄົນເຈັບເພີ່ມຫຼາຍຂຶ້ນ,ພາວະຫາບແບກຂອງໂຮງໝໍຈະຜ່ອນເບົາລົງຄືກັນ."ເມື່ອມີ1ພັນຮອດ1500ຄົນມາປົວພະຍາດທຸກມື້ແລ້ວ,ໂຮງໝໍພວກເຮົາກໍຈະຈ່າຍຄ່າໃຊ້ຈ່າຍຕ່າງໆໄດ້."
ຕາມການສະເໜີ,ປະຈຸບັນນີ້,ໂຮງໝໍຊ້າງຕີ້ຍັງແມ່ນໂຮງໝໍຊັ້ນສອງ,ຍັງບໍ່ມີຄວາມສາມາດກອບກູ້ ປິ່ນປົວພະຍາດຮ້າຍແຮງຈຳນວນໜຶ່ງໄດ້ເທື່ອ,ແຕ່ໃນຕໍ່ໄປ,ໃນໂຮງໝໍຊັ້ນສາມ ເຊິ່ງເປັນໂຮງໝໍທີ່ມີລະດັບສູງກວ່າຊັ້ນສອງນັ້ນກໍຈະມີໂຮງໝໍເກັບຄ່າຖືກຫຼືຕຽງຄົນເຈັບລາຄາຖືກ,ການເງິນສາທາລະນະຈະລົງທຶນຫຼາຍກວ່າເກົ່າໃນບັນຫາປົວພະຍາດຂອງປະຊາຊົນຜູ້ມີລາຍໄດ້ຕ່ຳ.
|
