ຕາມ​ຂ່າວ​CRI:ວັນ​ທີ 4 ພະ​ຈິກ,​ໃນ​ພິທີ​ໄຂ​ກອງ​ປະຊຸມ​ສຸດ​ຍອດ​ປັກ​ກິ່ງ​ຂອງ​ເວທີ​ປາ​​ໄສ​ການ​ຮ່ວມ​ມືຈີນ​ອາ​ຟຼິ​ກາ,ທ່ານ​ຫູ​ຈີນ​ທ່າວ ປະທານ​ປະ​ເທດ​ຈີນ​ໄດ້​ກ່າວ​ຄຳປາ​ໄສ,ສະ​ເໜີ​ນະ​ໂຍບາຍ​ແລະ​ມາດ​ຕະ​ການ 8 ດ້ານ​ກ່ຽວ​ກັບ​ການ​ຊຸກຍູ້​ການ​ພົວພັນ​ຄູ່​ຂາ​ຍຸດ​ທະ​ສາດ​ແບບ​ໃໝ່​ລະຫວ່າງ​ຈີນ​ອາ​ຟຼິກາ​ໃຫ້​ຂະ​ຫຍາ​ຍຕົວ.

ມາດ​ຕະ​ການ 8 ຂໍ້​ທີ່​ທ່ານ​ຫູ​ຈີນ​ທ່າວສະ​ເໜີ​ອອກ​ມາ​ນັ້ນ​ມີ:ໜຶ່ງ,​​ເປີດ​ກວ້າງ​ຂະ​ໜາດ​ຂອງການ​ຊ່ວຍ​ເຫຼື​ອ​ແກ່​ອາ​ຟຼິ​ກາ,​ເມື່ອ​ຮອດ​ປີ 2009,​ເຮັດ​ໃຫ້​ຂະໜາດ​ຂອງ​ການຊ່ວຍ​ເຫຼືອ​ແກ່​ປະ​ເທດ​ອາ​ຟຼິກາ​ຂອງ​ຈີນ​ເພີ່ມ​ຂຶ້ນ​ຫຼາຍ​ກວ່າ​ປີ 2006 ໜຶ່ງ​ເທົ່າ;​ສອງ,ພາຍ​ໃນ 3 ປີ​ຂ້າງ​ໜ້າ​ນີ້,​ໃຫ້​ເງິນ​ກູ້​ດອກ​ເບັ້ຍ​ຕ່ຳ 3 ຕື້​ໂດ​ລາ​ແລະ​ເງິນ​ກູ້​ສິນ​ເຊື່ອ​ຝ່າຍ​ຊື້​ດອກ​ເບັ້ຍ​ຕ່ຳສຳລັບການ​ສົ່ງ​ອອກ 2 ຕື້​ໂດ​ລາ​ແກ່​ປະ​ເທດ​ອາ​ຟຼິກາ;ສາມ,​ເພື່ອ​ສົ່ງ​ເສີມ​ແລະ​ສະໜັບສະໜູນ​ວິ​ສາ​ຫະກິດ​ຈີນ​ໄປ​ລົງທຶນ​ຢູ່​ອາ​ຟຼິກາ,ຈະ​ສ້າງ​ກອງ​ທຶນພັດ​ທະນາ​ຈີນ​ອາ​ຟຼິກາ,ຍອດ​ມູນ​ຄ່າ​ຂອງ​ກອງ​ທຶນ​ດັ່ງກ່າວ​ຈະ​ບັນລຸ 5 ຕື້​ໂດ​ລາ​ເປັນ​ກ້າວໆ;ສີ່,ຊ່ວຍ​ສ້າງ​ສູນ​ກອງ​ປະຊຸມ​ສະຫະ​ພາບ​ອາ​ຟຼິກາ;ຫ້າ,ຍົກ​ເລີກ​ໜີ້​ສິນ​ເງິນ​ກູ້​ບໍ່​ມີດ​ອກ​ເບັ້ຍ​ຂອງ​ລັດຖະ​ບານ​ທີ່​ຮອດ​ກຳນົດ​ໃນ​ທ້າຍ​ປີ 2005 ຂອງ​ປະ​ເທດ​ທຸກ​ຍາກ​ທີ່​ຕິດ​ໜີ້​ຫຼາຍ​ແລະ​ປະ​ເທດ​ດ້ອຍ​ພັດ​ທະ​ນາ​ທີ່​ສຸດ​ຂອງ​ອາ​ຟຼິກາທັງ​ໝົດ​ທີ່​ໄດ້​ສ້າງສາຍ​ສຳພັນ​ທາງ​ການ​ທູດ​ກັບ​ຈີນ;ຫົກ,​ໄຂ​ຕະ​ຫຼາດ​ຕໍ່​ອາ​ຟຼິກາ​ຕື່ມ​ອີກ,​ເພີ່ມ​ສິນຄ້າ​ປອດ​ພາສີ​ທີ່​ປະ​ເທດ​ດ້ອຍ​ພັດທະນາ​ທີ່​ສຸດ​ຂອງ​ອາ​ຟຼິກາ​ທີ່​ໄດ້​ສ້າງ​ສາຍ​ສຳ​ພັນ​ທາງ​ການ​ທູດກັບ​ຈີນສົ່ງ​ມາ​ຂາຍ​ຢູ່​ຈີນ​ຈາກ 190 ຊະນິດ​ຂຶ້ນ​ຮອດ 440 ກວ່າ​ຊະນິດ;​ເຈັດ,ພາຍ​ໃນ 3 ປີ​ຂ້າງ​ໜ້າ​ນີ້,ຈະ​ສ້າງ 3 ຫາ 5 ​ເຂດ​ຮ່ວມ​ມື​ດ້ານ​ເສດຖະກິດ​ການ​ຄ້າ​ຢູ່​ປະ​ເທດ​ອາ​ຟຼິກາ;​ແປດ,​ພາຍ​ໃນ 3 ປີ​ຂ້າງ​ໜ້າ​ນີ້,ອົບຮົມ​ຜູ້​ມີ​ຄວາມ​ຮູ້​ຄວາມ​ສາມາດ​ທຸກ​ປະ​ເພດ 15000 ຄົນ​ໃຫ້​ແກ່​ອາ​ຟຼິກາ.