ຕາມ​ຂ່າວ​CRI:ວັນ​ທີ 5 ພະຈິກ,ກອງ​ປະຊຸມ​ສຸດ​ຍອດ​ປັກ​ກິ່ງ​ຂອງ​ເວທີ​ປາ​ໄສ​ການ​ຮ່ວມ​ມື​ຈີນ​ອາ​ຟຼິກາ​ໄດ້​ຈັດ​ກອງປະຊຸມ​ໂຕະມົນ,ຕົ້ນຕໍ​ໄດ້​ຫາລື​ຖະ​ແຫຼ​ງການ​ກອງ​ປະຊຸມ​ສຸດຍອດ​ແລະ​ແຜນ​ດຳ​ເນີນ​ງານ​ໃນ 3 ປີ​ຂ້າງ​ໜ້າ​ນີ້.

ກອງ​ປະ​ຊຸມ​ແບ່ງ​ເປັນ​ສອງ​ຂັ້ນຕອນ,ທ່ານ​ຫູ​ຈີນ​ທ່າວ ປະທານ​ປະ​ເທດ​ຈີນ​​ເຊິ່ງ​ເປັນ​ປະ​ເທດ​ປະ​ທານ​ຂອງ​ເວທີ​ປາ​ໄສ​ເທື່ອ​ນີ້​ແລະ​ທ່ານ​ເມ​ເລ​ສ໌ ​ເຊ​ນາວີ ນາຍົກ​ລັດຖະ​ມົນຕີ​ເອຕີ​ໂອ​ປີ​​ເຊິ່ງ​​ເປັນ​ປະ​ເທດ​ປະທານ​ຮ່ວມ​ຕ່າງ​ໄດ້​ນັ່ງ​ເປັນ​ປະທານ.

ເພື່ອ​ຊຸກຍູ້​ການ​ພົວພັນ​ຄູ່​ຂາ​ຍຸດ​ທະ​ສາດ​ແບບ​ໃໝ່​ລະ​ຫວ່າງ​ຈີນ​ອາ​ຟຼິກາ​ໃຫ້​ຂະຫຍາຍ​ຕົວ,ວັນ​ທີ 4 ພະຈິກ,​ໃນ​ພິທີ​ໄຂ​ກອງ​ປະຊຸມ​ສຸດ​ຍອດ,ທ່ານ​ຫູ​ຈີນ​ທ່າວ​ໄດ້​ປະກາດ​ມາດ​ຕະ​ການ​​ໃໝ່ 8 ຂໍ້​ຂອງ​ຈີນ​ເພື່ອ​ເພີ່ມ​ທະວີ​ການ​ຮ່ວມ​ມື​ລະຫວ່າງ​ຈີນ​ອາ​ຟຼິກາ.ຈະຈັດ​ຕັ້ງ​ປະ​ຕິບັດ​ມາດ​ຕະການ​ເຫຼົ່າ​ນີ້​ຢ່າງ​ລະ​ອຽດ​ແນວ​ໃດນັ້ນ​ຈະເປັນ​ເນື້ອ​ໃນ​ສຳຄັນ​ຂອງ​ຖະ​ແຫຼ​ງການ​ກອງ​ປະຊຸມ​ສຸດ​ຍອດ​ເທື່ອ​ນີ້​ແລະ​ແຜນ​ດຳ​ເນີນ​ງານ​ໃນ 3 ປີ​ຂ້າງ​ໜ້າ​ນີ້.

ຕອນ​ທ່ຽງວັນ​ທີ 5 ພະ​ຈິກ,ກອງ​ປະຊຸມ​ນັກທຸລະ​ກິດຈີນ​ອາ​ຟຼິກາ​ຄັ້ງ​ທີ 2 ​ໄດ້​ອັດ​ລົງ, 11 ວິ​ສາ​ຫະກິດ​ແລະ​ຫົວ​ໜ່ວຍ​ຂອງ​ຝ່າຍ​ຈີນກັບ​ລັດ​ຖະບານ​ແລະ​ວິ​ສາ​ຫະກິດ​ຂອງ​ປະ​ເທດ​ອາ​ຟຼິກາ​ໄດ້​ເຊັນ​ສັນຍາ​ຮ່ວມ​ມື 16 ສະບັບ,ຍອດມູນ​ຄ່າມີ​ເກືອບ 1 ຕື້ 900 ລ້ານ​ໂດ​ລາ.