|
|
 |
| (GMT+08:00)
2006-12-18 18:44:51
|
 |
|
ກອງປະຊຸມໄລຍະທີສອງຂອງການເຈລະຈາ 6 ຝ່າຍຮອບທີ 5 ກ່ຽວກັບບັນຫາອາວຸດນິວເຄຼຍໃນແຫຼມເກົາຫຼີເລີ່ມຈັດຂຶ້ນ
cri
Author: da
ຕາມຂ່າວCRI: ກອງປະຊຸມໄລຍະທີສອງຂອງການເຈລະຈາ 6 ຝ່າຍຮອບທີ 5 ກ່ຽວກັບບັນຫານິວເຄຼຍແຫຼມເກົາຫຼີໄດ້ເລີ່ມຈັດຂຶ້ນຢູ່ປັກກິ່ງໃນຕອນເຊົ້າວັນທີ 18 ທັນວານີ້.
ທ່ານອູຕ້າເຫວີຍ ລັດຖະມົນຕີຊ່ວຍວ່າການກະຊວງການຕ່າງປະເທດຈີນ,ທ່ານກິມເກກວນ ລັດຖະມົນຕີຊ່ວຍວ່າການກະຊວງການຕ່າງປະເທດສ.ປ.ປເກົາຫຼີ,ທ່ານຄຼິສໂຕເປີ ຮິວ ຜູ່ຊ່ວຍລັດຖະມົນຕີກະຊວງການຕ່າງປະເທດອາເມລິກາ,ທ່ານຊູນຢົງວູ ຜູ່ຕາງໜ້າພິເສດເພື່ອວຽກງານຄວາມໝັ້ນຄົງແລະສັນຕິພາບໃນແຫຼມເກົາຫຼີຂອງກະຊວງການຕ່າງປະເທດແລະການຄ້າສ.ເກົາຫຼີ,ທ່ານເຄນີຊີໂຣ ຊາຊາອີ ຫົວໜ້າກົມອາຊີແລະໂອຊຽນນີຂອງກະຊວງການຕ່າງປະເທດຍີ່ປຸ່ນແລະທ່ານເຊີເກ ຣາຈົຟ ເອກອັກຄະລັດຖະທູດຣັດເຊຍປະຈຳຈີນຕ່າງກໍໄດ້ນຳພາຄະນະຜູ່ແທນປະເທດຕົນເຂົ້າຮ່ວມພິທີໄຂກອງປະຊຸມ. ທ່ານອູຕ້າເຫວີຍ ປະທານຂອງການເຈລະຈາຮອບນີ້ເປັນຜູ່ຈັດພິທີໄຂກອງປະຊຸມແລະກ່າວຄຳປາໄສ.
ທ່ານອູຕ້າເຫວີຍເວົ້າວ່າ,ກອງປະຊຸມຄັ້ງນີ້ມີຄວາມໝາຍສຳຄັນທີ່ສືບຕໍ່ຈາກເທື່ອກ່ອນ. ກອງປະຊຸມຕົ້ນຕໍຈະຫາລືແລະກຳນົດມາດຕະການລະອຽດເພື່ອປະຕິບັດ"ຖະແຫຼງການຮ່ວມຂອງການເຈລະຈາ 6 ຝ່າຍຮອບທີ 4"ທີ່ຮັບຮອງໃນເດືອນກັນຍາປີກາຍນັ້ນຢ່າງຮອບດ້ານ ພ້ອມດ້ວຍການເຄື່ອນໄຫວທີ່ຝ່າຍຕ່າງໆຕ້ອງປະຕິບັດໃນໄລຍະເລີ່ມຕົ້ນ.
ທ່ານອູຕ້າເຫວີຍກ່າວເນັ້ນວ່າ,ຝ່າຍຈີນຄອງຄອຍຄະນະຜູ່ແທນຂອງປະເທດຕ່າງໆຈົ່ງເສີມຂະຫຍາຍສະຕິປັນຍາທາງການເມືອງ,ສະແດງໃຫ້ເຫັນຄວາມຕັດສິນໃຈແລະຄວາມກ້າຫານທາງການເມືອງ,ສ້າງອະນາຄົດທີ່ຕ່າງຝ່າຍຕ່າງມີຜົນປະໂຫຍດໃນຂະບວນການເພີ່ມທະວີຄວາມໄວ້ເນື້ອເຊື່ອໃຈເຊິ່ງກັນແລະກັນ,ປະກອບສ່ວນໃໝ່ເຂົ້າໃນການບັນລຸໃຫ້ແຫຼມເກົາຫຼີປອດນິວເຄຼຍ,ຫັນການພົວພັນລະຫວ່າງປະເທດທີ່ກ່ຽວຂ້ອງໃຫ້ເປັນປົກກະຕິ,ແລະສ້າງສະຖານະການໃໝ່ຂອງອາຊີຕາເວັນອອກສຽງເໜືອທີ່ກົມກຽວກັນ.
|
|
|
