|
|
 |
| (GMT+08:00)
2006-12-18 20:40:42
|
 |
|
ຝ່າຍຈີນຮຽກຮ້ອງຝ່າຍຕ່າງໆຈົ່ງພະຍາຍາມໃຫ້ໄດ້ຮັບໝາກຜົນຢ່າງຕັ້ງໜ້າໃນການເຈລະຈາ 6 ຝ່າຍ
cri
Author: da
ຕາມຂ່າວCRI: ກອງປະຊຸມໄລຍະທີສອງຂອງການເຈລະຈາ 6 ຝ່າຍຮອບທີ 5 ກ່ຽວກັບບັນຫານິວເຄຼຍແຫຼມເກົາຫຼີໄດ້ເລີ່ມຈັດການປະຊຸມຄົບຄະນະເປັນຄັ້ງທຳອິດຢູ່ປັກກິ່ງໃນວັນທີ 18 ທັນວານີ້. ໃນກອງປະຊຸມ ທ່ານອູຕ້າເຫວີຍ ປະທານຄະນະຜູ່ແທນຈີນເວົ້າວ່າ,ຄະນະຜູ່ແທນຈີນຍິນດີພ້ອມກັນກັບຄະນະຜູ່ແທນຂອງປະເທດຕ່າງໆ,ເຂົ້າຮ່ວມການເຈລະຈາແລະການປຶກສາຫາລືດ້ວຍທ່າທີອັນຕັ້ງໜ້າ ຄ່ອງແຄ້ວແລະຕິດແທດຕົວຈິງ,ທຳຄວາມພະຍາຍາມທີ່ມີລັກສະນະສ້າງສັນເພື່ອໃຫ້ການເຈລະຈາຄັ້ງນີ້ໄດ້ຮັບໝາກຜົນອັນຕັ້ງໜ້າ.
ທ່ານອູຕ້າເຫວີຍຊີ້ອອກວ່າ, "ຖະແຫຼງການຮ່ວມຂອງການເຈລະຈາ 6 ຝ່າຍຮອບທີ 4 " ທີ່ຮັບຮອງໃນເດືອນກັນຍາປີກາຍນີ້ໄດ້ເຕົ້າໂຮມຄວາມຮັບຮູ້ທີ່ເປັນເອກະພາບກັນຂອງຝ່າຍຕ່າງໆ,ແມ່ນຖະແຫຼງການການເມືອງຂອງ 6 ຝ່າຍກ່ຽວກັບເປົ້າໝາຍລວມທີ່ໃຫ້ແຫຼມເກົາຫຼີປອດນິວເຄຼຍ,ແມ່ນເອກະສານໂຄງການດຳເນີນງານທີ່ຝ່າຍຕ່າງໆຕ້ອງປະຕິບັດຕາມ. ວຽກງານຕໍ່ໄປແມ່ນປະຕິບັດຕາມຖະແຫຼງການຮ່ວມຕາມຫຼັກການທີ່ວ່າ"ການເຄື່ອນໄຫວແບບຕ່າງຝ່າຍຕ່າງປະຕິບັດ".
ຫົວໜ້າຄະນະຜູ່ແທນຂອງສ.ເກົາຫຼີ ຣັດເຊຍ ອາເມລິກາ ສປປເກົາຫຼີແລະຍີ່ປຸ່ນໄດ້ສະແດງຄວາມຊົມເຊີຍຕໍ່ການເຈລະຈາ 6 ຝ່າຍຈັດຂຶ້ນຄືນໃໝ່.ຝ່າຍຕ່າງໆກ່າວຢ້ຳວ່າຈະສືບຕໍ່ປະຕິບັດຕາມຄຳໝັ້ນສັນຍາໃນ"ຖະແຫຼງການຮ່ວມຂອງການເຈລະຈາ 6 ຝ່າຍຮອບທີ 4",ຍຶດໝັ້ນຜ່ານຈາກການສົນທະນາແລະປຶກສາຫາລືກັນ,ເພື່ອບັນລຸໃຫ້ແຫຼມເກົາຫີຼປອດນິວເຄຼຍດ້ວຍສັນຕິວິທີ,ເຮັດໃຫ້ການພົວພັນລະຫວ່າງປະເທດຕ່າງໆທີ່ກ່ຽວຂ້ອງກັບຄືນສູ່ສະພາບປົກກະຕິ,ແລະເຮັດໃຫ້ພາກພື້ນອາຊີຕາເວັນອອກສຽງເໜືອມີຄວາມສະຫງົບຖາວອນ. ຝ່າຍຕ່າງໆຍັງກ່າວວ່າ,ຄວນກຳໂອກາດ,ພະຍາຍາມເຮັດໃຫ້ການເຈລະຈາຄັ້ງນີ້ໄດ້ຮັບໝາກຜົນອັນຕັ້ງໜ້າ ໂດຍອີງຕາມນ້ຳໃຈທີ່ມຸ່ງໜ້າໄປສູ່ອະນາຄົດ ຄ່ອງແຄ້ວແລະຕິດແທດຕົວຈິງ.
|
|
|
