|
ທ່ານຫູຈີນທາວ ປະທານປະເທດຈີນຈະເດີນທາງໄປຢ້ຽມຢາມ 8 ປະເທດອາຝຼິກາ
cri
Author: m
ຕາມຂ່າວ CRI: ວັນທີ 23 ມັງກອນນີ້, ຢູ່ທີ່ປັກກິ່ງ, ທ່ານລິວຈ້ຽນຊ່າວ ໂຄສົກກະຊວງການຕ່າງປະເທດຈີນປະກາດວ່າ, ໂດຍຕອບສະໜອງຄຳເຊີນຂອງປະທານາທິບໍດີ 8 ປະເທດ ຄື: ກຳເມີລຸນ, ລີເບລີອາ, ຊູດັງ, ຊຳບີ, ນາມີບີ, ອາຟຼິກາໃຕ້, ໂມຊຳບິກແລະເຊແຊນ, ແຕ່ວັນທີ 30 ມັງກອນຫາວັນທີ 10 ກຸມພາ, ທ່ານຫູຈີນທາວ ປະທານປະເທດຈີນຈະໄປຢ້ຽມຢາມ 8 ປະເທດອາຟິຼກາດັ່ງກ່າວທາງລັດຖະກິດ.
ໃນໄລຍະຢ້ຽມຢາມ, ທ່ານປະທານຫູຈີນທາວຈະພົບປະເຈລະຈາກັບຜູ້ນຳປະເທດຕ່າງໆ, ແລກປ່ຽນຄວາມເຫັນກ່ຽວກັບການເພີ່ມທະວີການພົວພັນຮ່ວມມືກັນດ້ວຍໄມຕີຈິດລະຫວ່າງຈີນກັບ 8 ປະເທດຕື່ມອີກແລະບັນຫາທີ່ສອງຝ່າຍສົນໃຈນຳກັນ.
ທ່ານລິວຈ້ຽນຊ່າວເວົ້າວ່າ, ການໄປຢ້ຽມຢາມເທື່ອນີ້ມີຈຸດປະສົງເພື່ອເພີ່ມທະວີມິດຕະພາບມູນເຊື້ອລະຫວ່າງຈີນກັບອາຟຼິກາຕື່ມອີກ, ປະຕິບັດ ໝາກຜົນຂອງກອງປະຊຸມສຸດຍອດປັກກິ່ງທີ່ຈັດຂຶ້ນໃນເດືອນພະຈິກປີກາຍນີ້, ເປີດກວ້າງການຮ່ວມມືທີ່ຕິດແທດຕົວຈິງລະຫວ່າງສອງຝ່າຍ, ຊຸກຍູ້ໃຫ້ພັດທະນາພ້ອມກັນ, ເຮັດໃຫ້ມາດຕະການແລະນະໂຍບາຍ 8 ຂໍ້ຂອງລັດຖະບານຈີນເພື່ອເພີ່ມທະວີການຮ່ວມມືກັບອາຟຼິກາທີ່ທ່ານປະທານຫູຈີນທາວປະກາດໃນກອງປະຊຸມສຸດຍອດປະກົດຜົນເປັນຈິງໃຫ້ປະເທດອາຟຼິກາໄດ້ຮັບຜົນໂດຍໄວ.
|
|
