|
ເສດຖະກິດແຫ່ງຊາດແລະສັງຄົມຈີນໃນປີ2006ພັດທະນາເປັນຢ່າງດີ
cri
ຕາມຂ່າວCRI,ວັນທີ29ມັງກອນນີ້,ຢູ່ທີ່ປັກກິ່ງ,ທ່ານຈູ່ຫົງເຢິນ ຮອງຫົວໜ້າກົມເສດຖະກິດຂອງຄະນະກຳມະການການພັດທະນາແລະການປະຕິຮູບແຫ່ງລັດຈີນກ່າວວ່າ,ປີ2006,ເສດຖະກິດແຫ່ງຊາດຈີນເຕີບໂຕອ່າວໄວ ມີປະສິດທິຜົນດີສົມຄວນ,ການປັບປຸງອົງປະກອບອຸດສາຫະກຳໄດ້ມີບາດກ້າວໃໝ່.
ທ່ານຈູ່ຫົງເຢິນກ່າວວ່າ,ປີ2006,ເສດຖະກິດແຫ່ງຊາດຈີນໄດ້ພັດທະນາໄປຕາມທິດທີ່ການດັດສົມຄວບຄຸມມະຫາພາກກຳນົດໄວ້ລ່ວງໜ້າ,ຈັງຫວະເຕີບໂຕຂອງການລົງທຶນໄດ້ຊ້າລົງທຸກເດືອນ,ການລົງທຶນດ້ານອະສັງຫາລິມະຊັບໃນໝົດປີ2006ໄດ້ເພີ່ມຂຶ້ນ24%,ເມື່ອທຽບກັບປີ2005ແລ້ວໄດ້ຫຼຸດລົງໜ້ອຍໜຶ່ງ.ຂະແໜງການຜະລິດອຸປະກອນຈຸດໜັກແລະຂະແໜງການໄຮເທັກໄດ້ພັດທະນາໄວຂຶ້ນ,ວຽກງານປະຢັດພະລັງງານໄດ້ເພີ່ມທະວີຂຶ້ນ,ການອະນຸລັກສິ່ງແວດລ້ອມແລະການກໍ່ສ້າງຊີວະພາບໄດ້ຮັບການຊຸກຍູ້ຢ່າງຕັ້ງໜ້າ, ການປະຕິຮູບໂຄງປະກອບເສດຖະກິດໄດ້ຮັບການຊຸກຍູ້ຢ່າງໜັກແໜ້ນ,ການພັດທະນາເສດຖະກິດໄດ້ມີຊີວິດຊີວາຂຶ້ນຕື່ມ.
ທ່ານຈູ່ຫົງເຢິນກ່າວວ່າ,ປີນີ້,ຈີນຈະສືບຕໍ່ເພີ່ມທະວີແລະບູລະນະການດັດສົມຄວບຄຸມມະຫາພາກໃຫ້ສົມບູນຂຶ້ນ,ລົງເລິກປັບປຸງອົງປະກອບເສດຖະກິດແລະຫັນປ່ຽນຮູບການເຕີບໂຕຂອງເສດຖະກິດ,ເພີ່ມທະວີການປະຢັດຊັບພະຍາກອນແລະອະນຸລັກສິ່ງແວດລ້ອມ,ເນັ້ນໜັກການພັດທະນາເສດຖະກິດຂອງຊົນນະບົດ,ແລະຊຸກຍູ້ໃຫ້ເສດຖະກິດຂອງເຂດຕ່າງໆພັດທະນາຢ່າງກົມກຽວກັນ.
|
|
