ຕາມ​ຂ່າວCRI: ກອງ​ປະຊຸມໄລຍະ​ທີ 3 ຂອງການ​ເຈລະຈາ 6 ຝ່າຍຮອບ 5 ກ່ຽວ​ກັບ​ບັນຫາ​ນິວ​ເຄຼຍ​ແຫຼມ​ເກົາຫຼີ​ຈັດ​ຂຶ້ນ​ຢູ່​ປັກ​ກິ່ງ​ໃນ​ຕອນ​ບ່າຍ​ວັນ​ທີ 8 ກຸມພາ​ນີ້,ປະຈຸ​ບັນ ວຽກ​ງານ​ກະ​ກຽມ​ຕ່າງໆ​ໄດ້​ສຳ​ເລັດ​ແລ້ວ.ກ່ອນ​ປະຊຸມ ຝ່າຍ​ຕ່າງໆ​ລ້ວນ​ແຕ່​ຫວັງ​ໃຫ້ການ​ເຈລະຈາ​ຄັ້ງນີ້ຈະ​ໄດ້​ຮັບຜົນ.

ວັນ​ທີ 8 ກຸມພານີ້ ທ່ານ​ຄຼິສ​ໂຕ​ບ​ເຟີ ຮິ​ວ ຫົວໜ້າ​ຄະນະ​ຜູ່​ແທນ​ອາ​ເມ​ລິ​ກາ​ກ່າວ​ວ່າ,ນີ້​ແມ່ນ​ການ​ເຈລະຈາ​ສຳຄັນ​ທີ່​ສຸດ.ການ​ເຈລະຈາ 6 ຝ່າຍ​ຄວນ​ບັນລຸ​ເປົ້າໝາຍ​ໃຫ້​ແຫຼ​ມ​ເກົາຫຼີ​ປອດ​ນິວ​ເຄຼຍ,ຝ່າຍ​ຕ່າງໆ​ພວມ​ພະຍາຍາມ​ແກ້​ໄຂ​ຮາກ​ເຫງົ້າຂອງບັນຫາ​ຈຳນວນ​ໜຶ່ງ.

ມື້​ດຽວ​ກັນ ທ່ານ​ຊາ​ຊາ​ອີ ​​ເຄນີຊີ​ໂຣ ຫົວໜ້າ​ຄະນະ​ຜູ່​ແທນ​ຍີ່ປຸ່ນກໍ​ກ່າວ​ວ່າ,​ເປົ້າໝາຍ​ຕົ້ນຕໍ​ຂອງ​ການ​ເຈລະຈາ​​ເທື່ອນີ້​ແມ່ນ​ປະຕິບັດ​​ຖະ​ແຫຼ​ງການ​ຮ່ວມ​ຂອງ​ການ​ເຈລະຈາ 6 ຝ່າຍ​ຮອບ 4 .

ຕອນ​ບ່າຍ​ວັນ​ທີ 8 ກຸ​ມພາ ທ່ານ​ຊູນ​ຢົງ​ອູ ຫົວໜ້າ​ຄະນະ​ຜູ່​ແທນ​ສ.​ເກົາຫຼີກ່າວ​ວ່າ,ການ​ເຈລະຈາ 6 ຝ່າຍ​ພວມ​ຢູ່​ໃນ​ໄລຍະ​ສຳຄັນ,ການ​ເຈລະຈາ​ເທື່ອ​ນີ້​ຄວນ​ຈາກ​ໄລຍະການ​ໃຫ້​ຄຳ​ໝັ້ນສັນຍາ​ຕໍ່​​ຄຳ​ໝັ້ນສັນຍາ ​ເຂົ້າສູ່​ໄລຍະ​​ກະທຳ​ຕໍ່​​ກະທຳ.

ວັນ​ທີ 8 ກຸມພາ ກ່ອນ​ຈະ​ເດີນທາງ​ມາ​ປັກ​ກິ່ງ ທ່ານ​ກິມກູ​ຍກວນ ຫົວໜ້າ​ຄະນະ​ຜູ່​ແທນ​ສປປ​ເກົາຫຼີ ລັດຖະມົນຕີ​ຊ່ວຍວ່າການ​ກະຊວງ​ການ​ຕ່າງປະ​ເທດ​ໄດ້​ກ່າວ​ຢູ່​ພຽງ​ຢາງ​ວ່າ,ສປປ​ເກົາຫຼີ​ຫວັງ​ໃຫ້ການ​ເຈລະຈາຈະ​ໄດ້​ຮັບ​ຜົນ.​ແຕ່​ວ່າ,ຈະ​ໄດ້​ຮັບ​ຜົນ​ຫຼື​ບໍ່​ ບໍ່​ແມ່ນ​​ຂຶ້ນ​ກັບຝ່າຍ​ສປປ​ເກົາຫຼີ,ຫາກ​ແມ່ນ​ຢູ່​ນຳ​ຝ່າຍ​ອາ​ເມ​ລິ​ກາ.