|
ທ່ານຖາງເຈ່ຍຊວນກ່າວວ່າ ຫວັງໃຫ້ອາເມລິກາຢ່າສົ່ງສັນຍານຜິດໃດໆໃຫ້ອິດທິກຳລັງແບ່ງແຍກທີ່ໃຫ້ໄຕ້ຫວັນເປັນເອກະລາດ
cri
ຕາມຂ່າວCRI,ວັນທີ4ມີນານີ້,ທ່ານຖາງເຈ່ຍຊວນ ທີ່ປຶກສາແຫ່ງລັດຈີນກ່າວວ່າ,ການເຄື່ອນໄຫວແບ່ງແຍກໃຫ້ໄຕ້ຫວັນເປັນເອກະລາດແມ່ນການຂົ່ມຂູ່ທີ່ໜັກໜ່ວງທີ່ສຸດຕໍ່ສັນຕິພາບແລະສະຖຽນລະພາບຂອງພາກພື້ນຊ່ອງແຄບໄຕ້ຫວັນໃນປະຈຸບັນ,ຫວັງໃຫ້ຝ່າຍອາເມລິກາປະຕິບັດຕາມຄຳໝັ້ນສັນຍາ,ຢ່າສົ່ງສັນຍານຜິດໃດໆໃຫ້ອິດທິກຳລັງແບ່ງແຍກໄຕ້ຫວັນ,ພ້ອມກັນຮັກສາສັນຕິພາບແລະ ສະຖຽນລະພາບຂອງຊ່ອງແຄບໄຕ້ຫວັນ,ແລະຮັກສາການພົວພັນຈີນອາເມລິກາ.
ໃນເວລາພົບປະທ່ານຈອນ ເນໂກຼພອນທ໌ ລັດຖະມົນຕີຊ່ວຍວ່າການປະຈຳກະຊວງການຕ່າງປະເທດອາເມລິກາ,ທ່ານຖາງເຈ່ຍຊວນກ່າວວ່າ,ໃນຫຼາຍປີມໍ່ໆມານີ້,ການພົວພັນຈີນອາເມລິກາໝັ້ນທ່ຽງໃນດ້ານກວມລວມແລະໄດ້ຮັບມີການຄືບໜ້າໃໝ່ເລື້ອຍໆ,ປະຈຸບັນພວມປະເຊີນກັບໂອກາດດີທີ່ຈະຂະຫຍາຍຕົວຕື່ມອີກ.ສອງຝ່າຍຄວນຕັ້ງໜ້າປະຕິບັດຕາມຄວາມຮັບຮູ້ຮ່ວມກັນທີ່ສຳຄັນຂອງປະມຸກລັດສອງປະເທດ,ຮັບຮູ້ແລະປະຕິບັດຕໍ່ກັນຢ່າງຖືກຕ້ອງແລະພາວະວິໄສ,ເພີ່ມທະວີຄວາມໄວ້ເນື້ອເຊື່ອໃຈດ້ານຍຸດທະສາດໃຫ້ຫຼາຍຂຶ້ນເລື້ອຍໆ,ເປີດກວ້າງແລະລົງເລິກການໄປມາຫາສູ່ກັນແລະຮ່ວມມືກັນໃນຂົງເຂດຕ່າງໆ,ຊຳລະແກ້ໄຂຄວາມຂັດແຍ່ງແລະບັນຫາທີ່ສະດຸ້ງໄວຢ່າງເໝາະສົມ,ຊຸກຍູ້ການພົວພັນຮ່ວມມືທີ່ມີລັກສະນະສ້າງສັນລະຫວ່າງຈີນກັບອາເມລິກາໃຫ້ຂະຫຍາຍຕົວໄປໜ້າຢ່າງຕໍ່ເນື່ອງ ປອດໃສແລະໝັ້ນທ່ຽງ.
ທ່ານເນໂກຼພອນທ໌ກ່າວວ່າ,ຝ່າຍອາເມລິກາຄອງຄອຍສືບຕໍ່ຮັກສາການແລກປ່ຽນກັບຈີນໃນລະດັບຕ່າງໆແລະຂົງເຂດຕ່າງໆ,ເຮັດແບບນີ້ສອດຄ່ອງກັບຜົນປະໂຫຍດຂອງອາເມລິກາ.ອາເມລິກາປະຕິບັດນະໂຍບາຍຈີນດຽວຢ່າງເດັດດ່ຽວ,ແລະເຄົາລົບຖະແຫຼງການຮ່ວມສາມສະບັບລະຫວ່າງຈີນກັບອາເມລິກາ.
|
|
