|
ຄວາມຕ້ອງການພະລັງງານຂອງຈີນເພີ່ມຂຶ້ນຈະບໍ່ເປັນການຂົ່ມຂູ່ຄວາມປອດໄພທາງພະລັງງານຂອງໂລກ
cri
Author: MO
ຕາມຂ່າວCRI：ໃນງານຊຸມນຸມນັກຂ່າວທີ່ກອງປະຊຸມປະຈຳປີຂອງສະພາປະຊາຊົນແຫ່ງຊາດຈີນຈັດຂຶ້ນໃນວັນທີ 7 ມີນານີ້, ທ່ານມາຂາຍ ປະທານຄະນະກຳມະການການພັດທະນາແລະການປະຕິຮູບແຫ່ງລັດຈີນກ່າວວ່າ, ຄວາມຕ້ອງການພະລັງງານຂອງຈີນເພີ່ມຂຶ້ນຈະບໍ່ເປັນການຂົ່ມຂູ່ຕໍ່ຄວາມປອດໄພຂອງພະລັງງານໂລກ.
ທ່ານເວົ້າວ່າ, ຄຽງຄູ່ກັບເສດຖະກິດຂອງຈີນພັດທະນາຢ່າງວ່ອງໄວ, ໂດຍສະເພາະແມ່ນເຂົ້າສູ່ໄລຍະພັດທະນາຫັນເປັນອຸດສາຫະກຳແລະຫັນເປັນຕົວເມືອງໄວເຂົ້າ, ຄວາມຕ້ອງການພະລັງງານໄດ້ເພີ່ມຂຶ້ນໄວແທ້. ແຕ່ໃນຫຼາຍປີມານີ້, ຈີນໄດ້ອາໄສກຳລັງຂອງຕົນແກ້ໄຂບັນຫາພະລັງງານ, ນີ້ແມ່ນຍ້ອນວ່າຈີນບໍ່ພຽງແຕ່ແມ່ນປະເທດທີ່ໃຊ້ພະລັງງານຫຼາຍ, ທັງແມ່ນປະເທດທີ່ຜະລິດພະລັງງານຫຼາຍອີກ. ຈີນມີຊັບພະຍາກອນຖ່ານຫີນອຸດົມສົມບູນ, ການບຸກເບີກນ້ຳມັນເຊື້ອໄຟ ອາຍແກັສທຳມະຊາດ ແລະພະລັງງານທີ່ເກີດໃໝ່ໄດ້ມີກຳລັງບົ່ມຊ້ອນອັນໃຫຍ່ຫຼວງ, ການປະຢັດພະລັງງານຂອງຈີນກໍມີກຳລັງບົ່ມຊ້ອນອັນມະຫາສານ.
|
|
