|
ຕາມຂ່າວCRI:ຈີນຈະສືບຕໍ່ອີງຕາມຫຼັກການ ເປັນເຈົ້າການ,ຄວບຄຸມໄດ້ແລະ ຄ່ອຍເປັນຄ່ອຍໄປ, ປັບປຸງລະບອບອັດຕາແລກປ່ຽນລອຍຕົວທີ່ມີການຄຸ້ມຄອງ, ເສີມຂະຫຍາຍບົດບາດພື້ນຖານຂອງ ການສະໜອງກັບຄວາມຕ້ອງການຂອງຕະຫຼາດໃນການຈໍ່ຕົວຂອງອັດຕາແລກປ່ຽນເງິນຢວນ,ຈະຮັກສາອັດຕາແລກປ່ຽນຂອງເງິນຢວນໃຫ້ໝັ້ນທ່ຽງໂດຍພື້ນຖານໃນລະດັບທີ່ສົມເຫດສົມຜົນແລະດຸນດ່ຽງກັນ.ຄະນະກຳມະການນະໂຍບາຍເງິນຕາຂອງທະນາຄານປະຊາຊົນຈີນໄດ້ແຈ້ງຂ່າວດັ່ງກ່າວໃນກອງປະຊຸມປະຈຳໄຕມາດທີ1ທີ່ໄດ້ຈັດຂຶ້ນໃນຫວ່າງມໍ່ໆນີ້.
ກອງປະຊຸມດັ່ງກ່າວຊີ້ອອກວ່າ,ເມື່ອເບິ່ງຈາກສະພາບກວມລວມແລ້ວ,ສະຖານະການເສດຖະກິດຂອງຈີນໃນປັດຈຸບັນແມ່ນດີຫຼາຍ,ແຕ່ຍັງປະເຊີນກັບບັນຫາຕ່າງໆ ເຊັ່ນ,ອົງປະກອບບໍ່ສົມເຫດສົມຜົນ,ຮູບການເຕີບໂຕຂອງເສດຖະກິດຊະຊາຍແລະລາຍຮັບລາຍຈ່າຍສາກົນບໍ່ດຸນດ່ຽງກັນເປັນຕົ້ນ.ກອງປະຊຸມເຫັນວ່າ,ຈີນຄວນສີບຕໍ່ເພິ່ມທະວີແລະປັບປຸງການດັດສົມມະຫາພາກໃຫ້ສົມບູນຂຶ້ນ,ຕັ້ງໜ້າເປີດກວ້າງຄວາມຕ້ອງການບໍລິໂພກພາຍໃນປະເທດ,ຄວບຄຸມການລົງທຶນຊັບສິນຄົງທີ່ຢ່າງສົມເຫດສົມຜົນ,ອອກແຮງປັບປຸງອົງປະກອບເສດຖະກິດແລະຫັນປ່ຽນຮູບການເຕີບໂຕ,ຊຸກຍູ້ລາຍຮັບລາຍຈ່າຍສາກົນໃຫ້ມີທ່ວງທ່າສົມເຫດສົມຜົນໃນຂັ້ນພື້ນຖານ,ເຮັດໃຫ້ເສດຖະກິດແຫ່ງຊາດພັດທະນາທັງດີທັງໄວ.
ກອງປະຊຸມຍັງໄດ້ຄົ້ນຄວ້າທ່ວງທ່ານະໂຍບາຍແລະມາດຕະການເງິນຕາຂອງຈີນໃນໄລຍະຕໍ່ໄປ,ເຫັນວ່າ,ຈີນຄວນສືບຕໍ່ປະຕິບັດນະໂຍບາຍເງິນຕາທີ່ໝັ້ນທ່ຽງ,ຮັກສາລາຄາໜັກແໜ້ນ,ຄວບຄຸມການເພິ່ມການກູ້ເງິນສິນເຊື່ອຢ່າງສົມເຫດສົມຜົນ,ປັບປຸງອົງປະກອບການກູ້ເງິນສິນເຊື່ອໃຫ້ດີຂຶ້ນ.
|
