|
ຕາມຂ່າວສານຊິນຮວາ,ກ່ອນໄປຢ້ຽມຢາມສ.ເກົາຫຼີຢ່າງເປັນທາງການ,ວັນທີ5ເມສານີ້,ຢູ່ທີ່ປັກກິ່ງ,ທ່ານເວິ່ນເຈ່ຍປາວ ນາຍົກລັດຖະມົນຕີຈີນໄດ້ຕ້ອນຮັບການເຂົ້າສຳພາດຂອງສື່ມວນຊົນ19ແຫ່ງຂອງສ.ເກົາຫຼີທີ່ປະຈຳຢູ່ປັກກິ່ງ.
ທ່ານເວິ່ນເຈ່ຍປາວກ່າວວ່າ,ການໄປຢ້ຽມຢາມສ.ເກົາຫຼີແມ່ນເລື່ອງທີ່ທ່ານຄອງຄອຍມາແຕ່ດົນແລ້ວ,ທ່ານຈະນຳເອົາມິດຕະພາບແລະການຮ່ວມມືໄປສ.ເກົາຫຼີ.ໃນເວລາກ່າວເຖິງບັນຫານີວເຄຼຍແຫຼມເກົາຫຼີ,ທ່ານເວິ່ນເຈ່ຍປາວກ່າວວ່າ,ຈີນຫວັງວ່າ,ໃນຂະບວນການຊຸກຍູ້ການເຈລະຈາຫົກຝ່າຍ,ຝ່າຍຕ່າງໆທີ່ກ່ຽວຂ້ອງຈົ່ງເພີ່ມທະວີການປຶກສາຫາລືແລະສົນທະນາກັນ,ສ້າງເງື່ອນໄຂໃຫ້ແກ່ການສ້າງກົນໄກສັນຕິພາບແຫຼມເກົາຫຼີ,ແລ້ວເຮັດໃຫ້ແຫຼມເກົາຫຼີມີຄວາມໝັ້ນຄົງຍາວນານ.ທ່ານກ່າວວ່າ,ໃນທີ່ສຸດ,ບັນຫາແຫຼມເກົາຫຼີຄວນໃຫ້ສອງຝ່າຍເໜືອໃຕ້ແກ້ໄຂໂດຍສັນຕິຢ່າງເປັນເຈົ້ຕົນເອງ,ຈິນຍິນດີສືບຕໍ່ເສີມຂະຫຍາຍບົດບາດຊຸກຍູ້ອັນຕັ້ງໜ້າເພື່ອເລື່ອງນີ້.
ທ່ານເວິ່ນເຈ່ຍປາວຍັງກ່າວວ່າ,ນັບແຕ່ຈີນສ.ເກົາຫຼີສ້າງສາຍສຳພັນທາງການທູດ15ປີມານີ້,ການພົວພັນເສດຖະກິດການຄ້າລະຫວ່າງສອງປະເທດໄດ້ຂະຫຍາຍຕົວຢ່າງວ່ອງໄວ.ພາຍໃຕ້ເບື້ອງຫຼັງຂອງໂລກາວິວັດ,ການພົວພັນເສດຖະກິດການຄ້າລະຫວ່າງສອງປະເທດໄດ້ເຂົ້າສູ່ໄລຍະໃໝ່ທີ່ເປີດກວ້າງ,ຍົກຄຸນນະພາບໃຫ້ສູງຂຶ້ນແລະພ້ອມກັນຮັບມືກັບສິ່ງທ້າທາຍຕ່າງໆ.
|
