|
ທ່ານຫູຈີນທາວກ່າວວ່າ, ຈີນເດັດດ່ຽວສະໜັບສະໜູນຂະບວນການສັນຕິພາບຮອບດ້ານຂອງຊູດັງ
cri
Author: m
ຕາມຂ່າວ CRI: ວັນທີ 19 ກໍລະກົດນີ້, ຢູ່ທີ່ປັກກິ່ງ, ທ່ານຫູຈີນທາວ ປະທານປະເທດຈີນກ່າວວ່າ, ຝ່າຍຈີນເດັດດ່ຽວສະໜັບສະໜູນຂະບວນການສັນຕິພາບຮອບດ້ານຂອງຊູດັງ, ຍິນດີປະກອບສ່ວນອັນຕັ້ງໜ້າເພື່ອສະຖຽນລະພາບ, ການສ້າງສາປະເທດຄືນໃໝ່ແລະການພັດທະນາຂອງຊູດັງ.
ໃນເວລາພົບປະທ່ານຊາວາ ຄີ ມາຢາດິດ ຮອງປະທານາທິບໍດີຜູ້ທີໜຶ່ງຂອງຊູດັງ, ທ່ານຫູຈີນທາວກ່າວວ່າ, ຫວ່າງກ່ອນນີ້ບໍ່ດົນ, ລັດຖະບານຊູດັງກັບສະຫະພາບອາຝຼິກາແລະສະຫະປະຊາຊາດໄດ້ບັນລຸຄວາມເຫັນເອກະສັນກັນກ່ຽວກັບການແຕ່ງທະຫານຮັກສາສັນຕິພາບປະສົມປະຈຳຢູ່ເຂດດາຟູ, ໄດ້ຮັບຄວາມຊົມເຊີຍຈາກປະຊາຄົມໂລກ. ສະພາບຕົວຈິງໄດ້ຢັ້ງຢືນວ່າ, ກົນໄກສົນທະນາປະສານສົມທົບແລະຮ່ວມມືລະຫວ່າງ 3 ຝ່າຍ, ຄື: ລັດຖະບານຊູດັງ, ສະຫະພາບອາຝຼິກາແລະສະຫະປະຊາຊາດແມ່ນກົນໄກອັນບັງເກີດຜົນເພື່ອແກ້ໄຂບັນຫາດາຟູ. ປະຊາຄົມໂລກຄວນຈັບໂອກາດທີ່ດີໃນສະເພາະໜ້າ, ຊຸກຍູ້ການເຄື່ອນໄຫວຮັກສາສັນຕິພາບແລະຂະບວນການການເມືອງຢ່າງສະໝ່ຳສະເໝີກັນ. ຝ່າຍຈີນຈະເສີມຂະຫຍາຍບົດບາດທີ່ມີລັກສະນະສ້າງສັນເພື່ອເລື່ອງນີ້ຄືແຕ່ເກົ່າເມືອຫຼັງ.
ທ່ານຊາວາ ຄີ ມາຢາດິດຂອບໃຈນຳລັດຖະບານຈີນທີ່ໄດ້ແຕ່ງຕັ້ງຜູ້ແທນພິເສດກ່ຽວກັບບັນຫາດາຟູແລະໄດ້ໃຫ້ການຊ່ອຍເຫຼືອມະນຸດສະທຳແກ່ເຂດດາຟູ, ທ່ານກ່າວວ່າ, ລັດຖະບານຊູດັງຈະອອກແຮງຊຸກຍູ້ແກ້ໄຂບັນຫາດາຟູດ້ວຍຊ່ອງທາງການເມືອງ.
|
|
