ຕາມ​ຂ່າວສານ​ຊີ​ນຮວາ:​ແຕ່​ຕົ້ນ​ປີ​ນີ້ມາ,ຈີນ​ໄດ້​ໃຊ້​ນະ​ໂຍບາຍ​ແລະ​ມາດ​ຕະການ​ຕ່າງໆ,ຊຸກຍູ້​​ການ​ສ້າງສາ​ລະບົບ​ບໍລິການ​ສາທາລະນະ​ໃນ​ສັງຄົມ​ໃຫ້​ໄວ​ເຂົ້າ,ວຽກ​ງານສັງຄົມ​ໄດ້​ຮັບ​ການ​ພັດທະນາ​ຢ່າງ​ວ່ອງ​ໄວ.

ແຕ່​ຕົ້ນ​ປີ​ນີ້ມາ,ການ​ປະຕິ​ຮູບ​ກົນ​ໄກ​ຮັບປະກັນ​ຄ່າ​ໃຊ້​ຈ່າຍ​ໃນດ້ານ​ການ​ສຶກສາ​ພາກ​ບັງຄັບ​ຢູ່​ຊົນນະບົດ​ຈີນ​ໄດ້​ມີ​ການ​ຄືບ​ໜ້າ​ຢ່າງຮອບດ້ານ,ໄດ້​​ເຮັດໃຫ້ນັກຮຽນ​ປະຖົມ​ແລະ​ມັດທະຍົມ​ໃນຊົນນະບົດ​ເກືອບ 150 ລ້ານ​ຄົນ​ໄດ້​ຮັບຜົນ​ປະ​ໂຫຍ​ດ​​.

ວຽກ​ງານເປີດ​ກວ້າງ​ຂອບ​ເຂດການຮ່ວມ​ມື​ປິ່ນປົວຢູ່​ຊົນນະບົດ​ແບບ​ໃໝ່​ຂອງ​ຈີນ​ໄດ້​ມີ​ການ​ຄືບ​ໜ້າ​ຢ່າງ​ວ່ອງ​ໄວ.ນັບ​ມາ​ຮອດ​ທ້າຍ​ເດືອນ​ມີນາ​ປີ​ນີ້,ຊາວ​ກະສິກອນ​ທົ່ວ​ປະ​ເທດ​ມີ 86% ​ໄດ້​ເຂົ້າ​ຮ່ວມ​ການ​ຮ່ວມ​ມື​ປິ່ນປົວ​ແລ້ວ,​ໄດ້​ສຳ​ເລັດ​ເປົ້າ​ໝາຍ​ໝົດ​ປີ​ກ່ອນ​ເວລາ​ກຳນົດ.

ນອກ​ນີ້,ລະ​ບອບ​ໃຫ້​ລາງວັນ​ຊ່ວຍ​ເຫຼືອ​ຄອບ​ຄົວ​ທີ່​ມີ​ລູກ​ຜູ້​ດຽວ​ໄດ້​​ເຜີຍ​ແຜ່ພາຍ​ໃນ​ຂອບ​ເຂດ​ທົ່ວ​ປະ​ເທດ​ໂດຍ​ພື້ນຖານ.ລະບົບ​ກອບ​ກູ້​ຊ່ວຍ​ເຫຼືອ​ໃນ​ສັງຄົມ​ຕົວ​ເມືອງ​ແລະ​ຊົນນະ​ບົດ​ກໍ່ສົມບູນ​ຂຶ້ນ​ຢ່າງ​ບໍ່​ຢຸດ​ຢັ້ງ.ນັບ​ມາ​ຮອດທ້າຍ​​ເດືອນມິຖຸນາ​ປີ​ນີ້,ເມື່ອ​ທຽບ​ໃສ່​ໄລຍະ​ດຽວ​ກັນຂອງປີ​ກາຍ,ຜູ້​ໄດ້​ຮັບ​ການຄ້ຳປະກັນຊີວິດການ​ເປັນ​ຢູ່​ລະດັບຕ່ຳ​ສຸດຢູ່​ຊົນນະບົດ​ໄດ້​ເພີ່ມ​ຂຶ້ນ 116%;ຜູ້​ໄດ້​ຮັບ​ການ​ຄ້ຳປະກັນ​ຊີວິດການ​ເປັນ​ຢູ່​ລະດັບຕ່ຳ​ສຸດ​ຢູ່​ຕົວ​​ເມືອງ​ໄດ້​ເພີ່ມ​ຂຶ້ນ 0,3%.

ຜູ້​ຮັບຜິດຊອບ​ຄະນະ​ກຳມະການ​ກາ​ນ​ພັດ​ທະນາ​ແລະ​ການ​ປະຕິ​ຮູບ​ແຫ່ງ​ລັດ​ຈີນ​ກ່າວ​ວ່າ,​ໃນ 6 ​ເດືອນ​ທ້າຍ​ປີ​ນີ້,ລັດຖະບານ​ຈີນ​ຈະ​ໃຊ້​ມາດ​ຕະການ​ຕື່ມ​ອີກ,ຊຸກຍູ້​ວຽກ​ງານ​ສັງຄົມ​ຕ່າງໆ​ເຊັ່ນ​ການ​ສຶກສາ ສາທາລະນະ​ສຸກ​ແລະ​ວັດທະນະທຳ​ເປັນ​ຕົ້ນ​ໃຫ້​ພັດທະນາ​​ໄວ​ກວ່າ​ເກົ່າ.