|
|
 |
| (GMT+08:00)
2007-09-27 19:43:50
|
 |
|
ກອງປະຊຸມໄລຍະທີສອງຂອງການເຈລະຈາ 6 ຝ່າຍຮອບ 6 ໄຂຂຶ້ນ
cri
Author: mo
ຕາມຂ່າວCRI: ວັນທີ 27 ກັນຍານີ້, ກອງປະຊຸມໄລຍະທີສອງຂອງການເຈລະຈາ 6 ຝ່າຍຮອບ 6 ກ່ຽວກັບບັນຫານິວເຄຼຍແຫຼມເກົາຫລີໄດ້ໄຂຂຶ້ນທີ່ປັກກິ່ງ. ທ່ານອູຕ້າເວີຍ ຫົວໜ້າຄະນະຜູ້ແທນຈີນ ລັດຖະມົນຕີຊ່ວຍວ່າການກະຊວງການຕ່າງປະເທດຈີນໄດ້ຕາງໜ້າລັດຖະບານຈີນຕ້ອນຮັບຄະນະຜູ້ແທນຂອງບັນດາປະເທດມາປັກກິ່ງເຂົ້າຮ່ວມກອງປະຊຸມເທື່ອນີ້.
ທ່ານອູຕ້າເວີຍເວົ້າວ່າ:"ກອງປະຊຸມເທື່ອນີ້ແມ່ນກອງປະຊຸມສຳຄັນເທື່ອໜຶ່ງຂອງຂະບວນວິວັດການເຈລະຈາ 6 ຝ່າຍ. ໜ້າທີ່ສຳຄັນຂອງກອງປະຊຸມກໍແມ່ນຫາລືແລະຕົກລົງແຜນການດຳເນີນງານໃນໄລຍະຕໍ່ໄປ."
ທ່ານເວົ້າວ່າ, ເພື່ອໄຂກອງປະຊຸມເທື່ອນີ້ໃຫ້ດີ, ຝ່າຍຕ່າງໆໄດ້ເຮັດວຽກກະກຽມຢ່າງຕັ້ງໜ້າແລະບັງເກີດຜົນທີ່ສຸດ, ຝ່າຍຕ່າງໆໄດ້ຮັກສາການປຶກສາຫາລືຢ່າງໃກ້ຊິດກ່ຽວກັບບັນຫາທີ່ສົນໃຈນຳກັນ.
ກ່ອນໄຂກອງປະຊຸມ, ຄະນະຜູ້ແທນຂອງຈີນອາເມລິກາ ຈີນຣັດເຊຍ ແລະຈີນຍີ່ປຸ່ນໄດ້ຕິດຕໍ່ພົວພັນສອງຕໍ່ສອງ. ຕອນຄ່ຳ, ທ່ານອູຕ້າເວີຍໄດ້ຈັດງານລ້ຽງຮັບຮອງຄະນະຜູ້ແທນບັນດາຝ່າຍ.
ວັນທີ 27 ກັນຍານີ້ຢູ່ທີ່ປັກກິ່ງ, ນາງຈ່ຽງອີ ໂຄສົກກະຊວງການຕ່າງປະເທດຈີນກ່າວວ່າ, ການຊ່ອຍເຫຼືອຂອງຈີນທີ່ສະໜອງນ້ຳມັນໜັກ 5 ໝື່ນໂຕນໃຫ້ຝ່າຍສປປເກົາຫລີໄດ້ຂົນສົ່ງໄປຮອດສປປເກົາຫລີທັງໝົດໃນຫວ່າງມໍ່ໆນີ້. ຝ່າຍຈີນຍິນດີພ້ອມກັນກັບຝ່າຍຕ່າງໆທີ່ກ່ຽວຂ້ອງ, ປະຕິບັດຄຳຖະແຫຼງການຮ່ວມຢ່າງຮອບດ້ານ, ຊຸກຍູ້ໃຫ້ການເຈລະຈາ 6 ຝ່າຍກ່ຽວກັບບັນຫານິວເຄຼຍແຫຼມເກົາຫລີກ້າວໄປໜ້າຢ່າງບໍ່ຢຸດຢັ້ງ.
ຕໍ່ກອງປະຊຸມໄລຍະທີສອງຂອງການເຈລະຈາ 6 ຝ່າຍຮອບ 6 ທີ່ໄຂຂຶ້ນໃນ
ຕອນບ່າຍມື້ນີ້, ນາງຈ່ຽງອີກ່າວວ່າ, ຈຸດໝາຍຂອງກອງປະຊຸມເທື່ອນີ້ກໍແມ່ນລົງເລິກຫາລືການເຄື່ອນໄຫວໃນໄລຍະຕໍ່ໄປ. ນາງຫວັງໃຫ້ຝ່າຍຕ່າງໆທີ່ກ່ຽວຂ້ອງສືບຕໍ່ສະແດງທ່າທີຢ່າງຕັ້ງໜ້າ, ທຳຄວາມພະຍາຍາມ, ພ້ອມກັນເຮັດໃຫ້ກອງປະຊຸມໄດ້ຮັບໝາກຜົນຢ່າງຕັ້ງໜ້າ.
|
|
|
