|
ນາຍົກລັດຖະມົນຕີຜູ້ໃໝ່ຂອງຍີ່ປຸ່ນລົມໂທລະສັບກັບນາຍົກລັດຖະມົນຕີຈີນ, ກ່າວວ່າຍິນດີມາຢ້ຽມຢາມຈີນໂດຍໄວ
cri
Author: MO
ຕາມຂ່າວCRI: ວັນທີ 28 ກັນຍານີ້, ທ່ານເວີນເຈ່ຍປາວ ນາຍົກລັດຖະມົນຕີຈີນໄດ້ລົມໂທລະສັບກັບທ່ານຟູຄູດາ ຢາຊູໂອ ນາຍົກລັດຖະມົນຕີຜູ້ໃໝ່ຂອງຍີ່ປຸ່ນຕາມນັດ. ໃນໂທລະສັບ, ທ່ານຟູຄູດາ ຢາຊູໂອກ່າວວ່າ, ຍິນດີຢ້ຽມຢາມຈີນໂດຍໄວ, ເພື່ອແລກປ່ຽນຄວາມເຫັນກັບຜູ້ນຳຈີນກ່ຽວກັບການຂະຫຍາຍການພົວພັນລະຫວ່າງສອງປະເທດຕື່ມອີກ.
ທ່ານຟູຄູດາ ຢາຊູໂອສະແດງຄວາມດີໃຈຕໍ່ການໂທລະສັບລົມກັບທ່ານນາຍົກລັດຖະມົນຕີເວີນເຈ່ຍປາວກ່ຽວກັບການພົວພັນຍີ່ປຸ່ນຈີນແລະບັນຫາຕ່າງໆໃນເວລາຫາກໍ່ຂຶ້ນຮັບຕຳແໜ່ງ. ທ່ານກ່າວວ່າ, ການພົວພັນຍີ່ປຸ່ນຈີນແມ່ນໜຶ່ງໃນການພົວພັນສອງຕໍ່ສອງທີ່ສຳຄັນກວ່າໝູ່ຂອງຍີ່ປຸ່ນ, ຝ່າຍຍີ່ປຸ່ນເອົາໃຈໃສ່ນຳການຂະຫຍາຍການພົວພັນກັບຈີນ, ຍິນດີສ້າງການຮ່ວມມືຢ່າງແໜ້ນແຟ້ນກວ່າເກົ່າກັບຝ່າຍຈີນ, ພ້ອມກັນທຳຄວາມພະຍາຍາມເພື່ອສັນຕິພາບ ສະຖຽນລະພາບແລະການພັດທະນາຂອງພາກພື້ນນີ້.
ທ່ານເວີນເຈ່ຍປາວກ່າວເນັ້ນວ່າ, ຝ່າຍຈີນເອົາໃຈໃສ່ນຳການພົວພັນຈີນຍີ່ປຸ່ນ, ຍຶດໝັ້ນນະໂຍບາຍໄມຕີຈິດລະຫວ່າງຈີນຍີ່ປຸ່ນ, ອອກແຮງຂະຫຍາຍການພົວພັນຮ່ວມມືທີ່ເປັນເພື່ອນບ້ານໃກ້ຄຽງທີ່ດີແລະມີໄມຕີຈິດຢ່າງໝັ້ນທ່ຽງຍາວນານກັບຝ່າຍຍີ່ປຸ່ນ, ຍິນດີພ້ອມກັນກັບຝ່າຍຍີ່ປຸ່ນພະຍາຍາມຊຸກຍູ້ໃຫ້ການພົວພັນສອງປະເທດໄດ້ຮັບການຂະຫຍາຍຕົວໃໝ່ຢ່າງບໍ່ຢຸດຢັ້ງ. ທ່ານເວີນເຈ່ຍປາວຊົມເຊີຍທ່ານຟູຄູດາ ຢາຊູໂອຢ້ຽມຢາມຈີນໂດຍໄວ.
ສອງຝ່າຍຍັງໄດ້ແລກປ່ຽນຄວາມເຫັນກ່ຽວກັບບັນຫາສາກົນແລະພາກພື້ນທີ່ສົນໃຈນຳກັນ.
|
|
