|
ກະຊວງການຕ່າງປະເທດຈີນເຫັນວ່າ, ຜູ້ນຳອາເມລິກາພົບປະພະດາໄລລາມະແມ່ນການແຊກແຊງວຽກງານພາຍໃນຂອງຈີນຢ່າງຮ້າຍແຮງ
cri
Author: MO
ຕາມຂ່າວCRI: ວັນທີ 17 ຕຸລານີ້, ໃນເວລາຕອບຄຳຖາມນັກຂ່າວຢູ່ທີ່ປັກກິ່ງ, ທ່ານລິວຈ້ຽນຊ່າວ ໂຄສົກກະຊວງການຕ່າງປະເທດຈີນກ່າວວ່າ, ຜູ້ນຳອາເມລິກາພົບປະພະດາໄລລາມະແມ່ນການແຊກແຊງວຽກງານພາຍໃນຂອງຈີນຢ່າງຮ້າຍແຮງ, ຝ່າຍຈີນຄັດຄ້ານຢ່າງເດັດດ່ຽວ.
ມື້ດຽວກັນ, ມີນັກຂ່າວຖາມວ່າ, ວັນທີ 16 ຕຸລານີ້, ທ່ານຈອດ ບຸສ ປະທານາທິບໍດີອາເມລິກາໄດ້ພົບປະພະດາໄລລາມະຢູ່ທຳນຽບຂາວ, ຝ່າຍຈີນມີການວິຈານແນວໃດຕໍ່ເລື່ອງນີ້.
ທ່ານລິວຈ້ຽງຊ່າວກ່າວວ່າ, ກິລິຍາວາຈາຂອງພະດາໄລລາມະໃນຫຼາຍສິບປີມານີ້ໄດ້ສະແດງໃຫ້ເຫັນວ່າ, ເຂົາແມ່ນຜູ້ພັດຖິ່ນການເມືອງທີ່ຖືຄັນຕາລະບັດຂອງສາດສະໜາ, ເພື່ອເຄື່ອນໄຫວແບ່ງແຍກປະເທດຊາດເປັນເວລາຍາວນານ. ຜູ້ນຳອາເມລິກາພົບປະພະດາໄລລາມະໄດ້ຝ່າຝືນຫຼັກການພື້ນຖານຂອງການພົວພັນລະຫວ່າງຊາດຢ່າງໜັກໜ່ວງ, ເຮັດໃຫ້ປະຊາຊົນຈີນບໍ່ພໍໃຈຢ່າງຮ້າຍແຮງ, ຝ່າຍຈີນບໍ່ພໍໃຈທີ່ສຸດຕໍ່ເລື່ອງນີ້, ແລະໄດ້ສະແດງຄວາມບໍ່ພໍໃຈຢ່າງເຂັ່ງຂືມຫຼາຍເທື່ອຕໍ່ອາເມລິກາ. ຝ່າຍຈີນໄດ້ເຕືອນຫຼາຍເທື່ອໃຫ້ຝ່າຍອາເມລິກາແກ້ຄວາມຜິດພາດແລະເຊົາແຊກແຊງວຽກງານພາຍໃນຂອງຈີນດ້ວຍວິທີຕ່າງໆ.
ທ່ານລີວຈ້ຽນຊ່າວກ່າວວ່າ, ເຂດຕິເບດແມ່ນພາກສ່ວນໜຶ່ງຂອງດິນແດນຈີນທີ່ຕັດແຍກບໍ່ໄດ້, ວຽກງານເຂດຕິເບດແມ່ນວຽກງານພາຍໃນຂອງຈີນລ້ວນໆ, ຝ່າຍຈີນເດັດດ່ຽວຄັດຄ້ານປະເທດໃດໆແລະໃຜກໍ່ຕາມທີ່ໃຊ້ບັນຫາພະດາໄລລາມະມາແຊກແຊງວຽກງານພາຍໃນຂອງຈີນ.
|
|
