|
ທ່ານຫູຈີນທາວ ເວີ່ນເຈ່ຍປາວສົ່ງໂທລະເລກອວຍພອນດາວທຽມຊາງເອີເລກໜຶ່ງຫຼຸດຜ່ອນຄວາມໄວລົງໃກ້ດວງຈັນເທື່ອທຳອິດຢ່າງສຳເລັດຜົນ
cri
ຕາມຂ່າວ CRI: ວັນທີ 5 ພະຈິກນີ້, ທ່ານຫູຈີນທາວ ເລຂາທິການໃຫຍ່ສູນກາງພັກກອມມູນິດຈີນ, ປະທານປະເທດຈີນ, ປະທານຄະນະກຳມະການທະຫານສູນກາງພັກກອມມູນິດຈີນ, ແລະທ່ານເວີ່ນເຈ່ຍປາວ ນາຍົກລັດຖະມົນຕີຈີນຕ່າງກໍ່ໄດ້ສົ່ງໂທລະເລກ, ອວຍພອນດາວທຽມຊາງເອີເລກໜຶ່ງສຳຫຼວດດວງຈັນຫຼຸດຜ່ອນຄວາມໄວລົງໃກ້ດວງຈັນເທື່ອທຳອິດຢ່າງສຳເລັດຜົນ.
ໃນໂທລະເລກອວຍພອນ, ທ່ານທັງສອງໄດ້ສະແດງຄວາມອວຍພອນແລະຄວາມຢື້ຢາມຖາມຂ່າວອັນອົບອຸ່ນໄປຍັງພະນັກງານຄົ້ນຄວ້າຜະລິດ, ບັນຊາ, ຕິດຕາມຄວບຄຸມໝົດທຸກຄົນ, ຫວັງວ່າເຂົາເຈົ້າຈະສືບຕໍ່ທຳຄວາມພະຍາຍາມ, ເຮັດໃຫ້ດີຂຶ້ນໄປເລື້ອຍໆ, ຕາມຄວາມຮຽກຮ້ອງທີ່ມີມາດຕະຖານສູງ, ແລະປະສິດທິພາບສູງ, ຮັບປະກັນໃຫ້ໂຄງການສຳຫຼວດດວງຈັນໄດ້ຮັບຜົນສຳເລັດເຕັມເມັດເຕັມໜ່ວຍ.
ເວລາ 11 ໂມງ 37 ນາທີວັນທີ 5 ພະຈິກນີ້, ດາວທຽມຊາງເອີເລກໜຶ່ງເຊິ່ງເປັນດາວທຽມສຳຫຼວດດວງຈັນໜ່ວຍທຳອິດຂອງຈີນໄດ້ຫຼຸດຜ່ອນຄວາມໄວລົງໃກ້ດວງຈັນເທື່ອທຳອິດ, ເຂົ້າສູ່ວົງໂຄຈອນອ້ອມດວງຈັນຢ່າງສຳເລັດຜົນ. ການຫຼຸດຜ່ອນຄວາມໄວລົງໃກ້ດວງຈັນຢ່າງສຳເລັດຜົນເທື່ອນີ້, ໄດ້ສ້າງພື້ນຖານອັນໜາແໜ້ນໃຫ້ແກ່ການສຳຫຼວດທາງດ້ານວິທະຍາສາດ. ພ້ອມກັນນັ້ນ, ກໍ່ສະແດງໃຫ້ເຫັນວ່າ, ຈີນມີຄວາມສາມາດດຳເນີນການຄວບຄຸມແມ່ນຢຳທີ່ສຸດຕໍ່ດາວທຽມທີ່ໄກຈາກໜ່ວຍໂລກ 3 ແສນ 8 ໝື່ນກິໂລແມັດ.
|
|
