|
|
 |
| (GMT+08:00)
2007-11-20 09:32:20
|
 |
|
ຈີນກາຍເປັນປະເທດສົ່ງອອກຜະລິດຕະພັນກະສິກຳໃຫຍ່ອັນດັບ 5 ຂອງໂລກ
cri
Author: mo
ຕາມຂ່າວຈາກໜັງສືພິມເຢິນມິນຢື້ປ້າວສະບັບຕ່າງປະເທດ: ໃນຫຼາຍປີມານີ້, ຜະລິດຕະພັນກະສິກຳທີ່ຜະລິດຢູ່ຈີນໄດ້ປະກົດຕົວຢູ່ເທິງໂຕະອາຫານຂອງປະຊາຊົນປະເທດຕ່າງໆໃນໂລກນັບມື້ນັບຫຼາຍ. ຕົວເລກສະແດງໃຫ້ເຫັນວ່າ, ຈີນໄດ້ກາຍເປັນປະເທດສົ່ງອອກຜະລິດຕະພັນກະສິກຳໃຫຍ່ອັນດັບ 5 ຂອງໂລກ, ຍອດມູນຄ່າການຄ້າຜະລິດຕະພັນກະສິກຳເປັນອັນດັບ 4 ຂອງໂລກ.
ໃນງານຕະຫຼາດນັດຜະລິດຕະພັນກະສິກຳສາກົນຄັ້ງທີ 5 ທີ່ຈັດຂຶ້ນຢູ່ເມືອງຈີນານແຂວງຊ່ານຕົ່ງຈີນໃນຫວ່າງມໍ່ໆນີ້, ນັກທຸລະກິດທີ່ມາຈາກ 36 ປະເທດແລະເຂດແຄວ້ນເຊັ່ນອາເມລິກາແລະອັງກິດເປັນຕົ້ນໄດ້ເຊັນສັນຍາມູນຄ່າປະມານ 4 ຕື້ 400 ລ້ານຢວນ. ທ່ານກ່າວຫົງປິນ ລັດຖະມົນຕີຊ່ອຍວ່າການກະຊວງກະສິກຳຈີນກ່າວວ່າ, ອາດເວົ້າໄດ້ວ່າ, ຜະລິດຕະພັນກະສິກຳຈີນໄດ້ຮັບຄວາມນິຍົມຢ່າງກວ້າງຂວາງຈາກນັກທຸລະກິດຕ່າງປະເທດ.
ໃນງານສຳມະນາຄວາມປອດໄພຂອງອາຫານທີ່ຈັດຂຶ້ນຢູ່ຕະຫຼາດນັດ, ນັກທຸລະກິດຕ່າງປະເທດໄດ້ໃຫ້ການຢັ້ງຢືນຕໍ່ຄຸນນະພາບຂອງຜະລິດຕະພັນກະສິກຳຈີນ. ນັກທຸລະກິດຍີ່ປຸ່ນຜູ້ໜຶ່ງກ່າວວ່າ, ຜະລິດຕະພັນກະສິກຳແລະອາຫານຂອງຈີນແມ່ນປອດໄພດີ.
ນອກນີ້, ຕາມເອກະສານການຮ່ວມມືທີ່ກະຊວງກະສິກຳຈີນກັບອົງການອາຫານແລະການກະເສດຂອງສະຫະປະຊາຊາດຫຼືFAOໄດ້ເຊັນກັນ, ໃນ 5 ປີແຕ່ປີ 2006 ເປັນຕົ້ນໄປ, ຈີນຈະສົ່ງຜູ້ຊ່ຽວຊານແລະນັກວິຊາການກະສິກຳ 3000 ຄົນໄປປະເທດພວມພັດທະນາທີ່ກ່ຽວຂ້ອງ, ເພື່ອຊຸກຍ້ວຽກງານູກະສິກຳຂອງປະເທດທີ່ໄດ້ຮັບການຊ່ອຍເຫຼືອໃຫ້ໄດ້ຮັບການພັດທະນາແລະມີຄວາມປອດໄພດ້ານທັນຍາຫານ.
|
|
|
