|
ມາດຕະການຕ່າງໆທີ່ມີຜົນດີຕໍ່ປະຊາຊົນຂອງຈີນປີ 2007 ໄດ້ບັງເກີດຜົນສັກສິດ
cri
Author: mo
ຕາມຂ່າວສານຊີນຮວາ: ປີ 2007, ຈີນໄດ້ໃຊ້ມາດຕະການຕ່າງໆໃນຂົງເຂດທີ່ພົວພັນເຖິງຜົນປະໂຫຍດຕົວຈິງຂອງປະຊາຊົນເຊັ່ນການສຶກສາ ການປະກອບອາຊີບ ການປິ່ນປົວ ແລະການປະກັນການອອກແຮງງານເປັນຕົ້ນ, ໄດ້ເຮັດໃຫ້ປະຊາຊົນໄດ້ຮັບຜົນປະໂຫຍດຕົວຈິງ.
ໃນດ້ານການສຶກສາ, ປີ 2007, ນອກຈາກໄດ້ຍົກເວັ້ນຄ່າຮຽນແລະຄ່າອື່ນໆທັງໝົດໃຫ້ນັກຮຽນໄລຍະການສຶກສາພາກບັງຄັບແລ້ວ. ຍັງໄດ້ປະຕິບັດລະບົບນະໂຍບາຍໃໝ່ກ່ຽວກັບລັດຊ່ອຍເຫຼືອນັກຮຽນທີ່ຄອບຄົວຫຍຸ້ງຍາກ, ລັດຖະບານໄດ້ໃຊ້ງົບປະມານ 15 ຕື້ກວ່າຢວນ. ໃນດ້ານປະກອບອາຊີບ, ຈີນປະຕິບັດນະໂຍບາຍຊຸກຍູ້ການປະກອບອາຊີບຢ່າງຕັ້ງໜ້າໃນດ້ານອຸດສາຫະກຳ, ການເງິນ, ສ່ວຍສາອາກອນ, ແລະການເງິນເປັນຕົ້ນ. ນອກນີ້, ລັດຖະບານຍັງໃຊ້ມາດຕະການປັບປຸງການປະກັນບຳນານຂັ້ນພື້ນຖານໃຫ້ສົມບູນຂຶ້ນ, ນັບແຕ່ວັນທີ 1 ກໍລະກົດປີນີ້ເປັນຕົ້ນໄປ, ເພີ່ມເງິນບຳນານຂັ້ນພື້ນຖານໃຫ້ຜູ້ອອກກິນເບ້ຍບຳນານຂອງວິສາຫະກິດ, ຕັ້ງໜ້າຊຸກຍູ້ໃຫ້ຊາວກະສິກອນທີ່ເຮັດວຽກໃນເມືອງເຂົ້າຮ່ວມການປະກັນໄພສັງຄົມ, ອອກແຮງສະໜັບສະໜູນທ້ອງຖິ່ນຕ່າງໆເຮັດວຽກປະກັນຄ່າຄອງຊີບຂັ້ນຕ່ຳສຸດໃນຕົວເມືອງໃຫ້ດີ, ຮັບປະກັນຊີວິດພື້ນຖານຂອງປະຊາຊົນຜູ້ທຸກຍາກຢ່າງແທ້ຈິງ.
ຈີນຍັງເລັ່ງລັດສ້າງລະບອບສາທາລະນະສຸກການປິ່ນປົວຂັ້ນພື້ນຖານ, ເລັ່ງລັດສ້າງຕາໜ່າງບໍລິການສາທາລະນະສຸກຂອງຊຸມຊົນຢູ່ໃນເມືອງ, ຕັ້ງໜ້າຊຸກຍູ້ການປິ່ນປົວແບບມີສ່ວນຮ່ວມຂອງຊົນນະບົດ, ມີຊາວກະສິກອນປະມານ 700 ລ້ານຄົນເຂົ້າຮ່ວມ, ກວມປະຊາກອນໃນຊົນນະບົດ 80% ຂຶ້ນໄປ.
|
|
