ຕາມ​ຂ່າວ CRI: ຕອນ​ຄ່ຳ​ວັນ​ທີ 31 ທັນວາ​ປີ 2007, ກິດຈະກຳ "ຕ້ອນຮັບ​ງານ​ກິລາ​ໂອ​ລິມ​ປິກ ອວຍພອນ​ປັກ​ກິ່ງ" ​ເຊິ່ງ​ແມ່ນກິດຈະກຳ​ຂະໜາດ​ໃຫຍ່​ຕ້ອນຮັບ​ປີ​ກິລາ​ໂອ​ລິມ​ປິກ 2008 ທີ່​ຈັດ​ຂຶ້ນ​ໂດຍຄະນະ​ກຳມະການ​ຈັດຕັ້ງງານ​ກິລາ​ໂອ​ລິ​ມປິກ​ປັກ​ກິ່ງ​ ​ໄດ້​ຈັດ​ຂຶ້ນຢູ່​ແທ່ນ​ຈົ່ງ​ຮວາ​ສຶ​ຈີ້​ທີ່​ປັກ​ກິ່ງ.

ພວກເຮົາກຽມພ້ອມແລ້ວ

​ເວລາ​ຮອດ 24 ​ໂມງ, ​ໃນ​ທ່າມກາງ​ສຽງ​ຮ້ອງ​ໂຮ​ຂອງ​ຜູ້​ຊົມ​ເກືອບ 4000 ຄົນ, ​ແທ່ນ​ຈົ່ງ​ຮວາ​ສຶຈີ້​ໄດ້​ເປີດ​ໄຟ​ແສງ​ສີ​ທີ່​ຂຽນ​ເປັນ​ປະ​ໂຫຍ​ກ "We Are Ready" ໝາຍ​ຄວາມ​ວ່າ "ພວກ​ເຮົາ​ໄດ້​ກຽມພ້ອມ​ແລ້ວ". ທັນ​ໃດ​ນັ້ນ, ຢູ່​ເທິງ​ສິ່ງ​ກໍ່ສ້າງ​ທີ່ຢູ່​ອ້ອມ​ຂ້າງ​ນັ້ນ ​ໄດ້​ປະ​ກົດ​ມີ​ໄຟ​ແສງ​ສີ​ທີ່​ຂຽນ​ເປັນ​ປະ​ໂຫຍ​ກ "ຕ້ອນ​ຮັບ​ງານ​ກິລາ​ໂອ​ລິ​ມ​ປິກ ອວຍ​ພອນ​ປັກ​ກິ່ງ" ຢ່າງ​ຂະໜາດ​ໃຫຍ່, ຜູ້​ຊົມ​ທັງຫຼາຍ​ຮ້ອງ​ໂຮ​ມ່ວນ​ຊື່ນ, ບັນຍາກາດ​ຟົດ​ຟື້ນ​ທີ່​ສຸດ.

ຂະນະ​ດຽວ​ກັນ, ບຸກຄົນ​ທີ່​ມີ​ຊື່​ສຽງ ​ເຊັ່ນ ທ່ານ​ຢາງ​ລີ​ເວີຍ ວິລະ​ຊົນນັກ​ການ​ບິນ​ອະ​ວະ​ກາດ​ຈີນ ​ເປັນຕົ້ນ ​ໄດ້​ຮ່ວມ​ກັນ​ຕີ​ລະຄັງ​ຕ້ອນຮັບ​ປີ​ໃໝ່ສາກົນ, ປະກາດ​ວ່າ ປັກ​ກິ່ງ​ໄດ້​ກ້າວ​ເຂົ້າສູ່​ປີ​​ກິລາ​ໂອ​ລິມ ປິກຢ່າງ​ເປັນ​ທາງ​ການ.