|
ຈີນເພີ່ມທະວີການດັດສົມຄຸ້ມຄອງມະຫາພາກເພື່ອໃຫ້ເສດຖະກິດພັດທະນາທັງດີທັງໄວ
cri
ຕາມໜັງສືພິມເຢິນມິນຢື້ປ້າວ,ນັບແຕ່ກອງປະຊຸມໃຫຍ່ຄັ້ງທີ17ຂອງພັກກອມມູນິດຈີນມານີ້,ເພື່ອບັນລຸເປົ້າໝາຍທີ່ປ້ອງກັນບໍ່ໃຫ້ເສດຖະກິດຈາກການພັດທະນາອ່າວໄວຫັນເປັນການພັດທະນາໄວເກີນໄປ,ປ້ອງກັນບໍ່ໃຫ້ລາຄາສິນຄ້າຈາກການຖີບຕົວສູງຂຶ້ນ ຫັນເປັນໄພເງິນເຟີ້ຢ່າງເດັ່ນຊັດ, ລັດຖະບານຈີນໄດ້ເພີ່ມຄວາມແຮງໃນການດັດສົມຄຸ້ມຄອງທາງມະຫາພາກ,ອັນໄດ້ຊຸກຍູ້ໃຫ້ເສດຖະກິດພັດທະນາທັງດີທັງໄວ.
ນັບແຕ່ກອງປະຊຸມໃຫຍ່ຄັ້ງທີ17ຂອງພັກກອມມູນິດຈີນມານີ້,ເພື່ອຄວບຄຸມບໍ່ໃຫ້ການລົງທຶນດ້ານອະສັງຫາລິມະຊັບແລະການປ່ອຍເງິນກູ້ສິນເຊື່ອເພີ່ມຂຶ້ນໄວເກີນໄປ,ລັດຖະບານຈີນໄດ້ສືບຕໍ່ຄວບຄຸມໂຄງການທີ່ກໍ່ສ້າງໃໝ່ຢ່າງເຄັ່ງຄັດ,ເພີ່ມຄວາມແຮງຕື່ມອີກໃນການດັດສົມຄວບຄຸມການປ່ອຍເງິນກູ້ສິນເຊື່ອ,ແລະເພີ່ມທະວີການຄຸ້ມຄອງທີ່ດິນ.
ພ້ອມກັນນັ້ນ,ເພື່ອຫຼີກລ້ຽງບໍ່ໃຫ້ລະດັບລວມຂອງລາຄາສິນຄ້າຖີບສູງຂຶ້ນໄວເກີນໄປ,ລັດຖະບານຈີນສືບຕໍ່ໃຊ້ນະໂຍບາຍແລະມາດຕະການທີ່ເພີ່ມການສະໜອງສິນຄ້າໂດຍກຳນົດວ່າ,ໃນອະນາຄົດໃກ້ໆນີ້,ບໍ່ໃຫ້ຂຶ້ນລາຄານ້ຳມັນສຳເລັດຮູບ,ອາຍແກັສທຳມະຊາດ,ແລະໄຟຟ້າ.ສ່ວນລາຄາເຄື່ອງສາທາລະນະປະໂຫຍດຄືແກັສ,ນ້ຳປະປາ, ອາຍອຸ່ນ,ພ້ອມດ້ວຍຄ່າຮຽນ,ຄ່າຫໍພັກໃນໂຮງຮຽນບໍ່ໃຫ້ຂຶ້ນ.ພ້ອມທັງກວດກາແລະລົງໂທດຢ່າງເຂັ້ມງວດຕໍ່ການກະທຳຜິດກົດໝາຍຕ່າງໆເຊັ່ນຄວບຄຸມລາຄາສິນຄ້າໃນຕະຫຼາດເປັນຕົ້ນ.
|
|
