ທ່ານຖາງເຈຍສວນ ທີ່ປຶກສາແຫ່ງລັດຈີນພົບປະທ່ານນາງໄລສ໌ ລັດຖະມົນຕີວ່າການກະຊວງການຕ່າງປະເທດອາເມລິກາ
cri
Author: cai
ຕາມຂ່າວCRI:ວັນທີ 26 ກຸມພານີ້,ຢູ່ປັກກິ່ງ,ທ່ານຖາງເຈຍສວນ ທີ່ປຶກສາແຫ່ງລັດຈີນໄດ້ພົບປະກັບທ່ານນາງໂຄນໂດລີຊາ ໄລສ໌ ລັດຖະມົນຕີວ່າການກະຊວງການຕ່າງປະເທດອາເມລິກາ.
ທ່ານຖາງເຈຍສວນກ່າວວ່າ,ຈີນກັບອາເມລິກາຄວນເບິ່ງໄປທາງໄກ,ພະຍາຍາມເພີ່ມຄວາມໄວ້ເນື້ອເຊື່ອໃຈກັນທາງດ້ານຍຸດທະສາດ,ແກ້ໄຂບັນຫາໄຕ້ຫວັນຢ່າງເໝາະສົມ,ລົງເລິກການຮ່ວມມືທີ່ຕ່າງຝ່າຍຕ່າງມີຜົນປະໂຫຍດຢ່າງບໍ່ຢຸດຢັ້ງ,ຊຸກຍູ້ໃຫ້ການພົວພັນລະຫວ່າງສອງປະເທດຂະຫຍາຍໄປໜ້າຢ່າງຕໍ່ເນື່ອງ ປອດໄສແລະໜັກແໜ້ນ.
ທ່ານນາງໄລສ໌ກ່າວວ່າ,ການພົວພັນລະຫວ່າງອາເມລິກາກັບຈີນມີທ່ວງທ່າພັດທະນາທີ່ຕັ້ງໜ້າ,ອາເມລິກາຍິນດີເພີ່ມທະວີການຮ່ວມມືກັບຈີນ,ຊຸກຍູ້ການແກ້ໄຂບັນຫາຕ່າງໆໃນໂລກ.
ມື້ດຽວກັນ,ທ່ານຢາງເຈຍຊື ລັດຖະມົນຕີວ່າການກະຊວງການຕ່າງປະເທດຈີນໄດ້ເຈລະຈາກັບທ່ານນາງໄລສ໌,ສອງຝ່າຍໄດ້ແລກປ່ຽນຄວາມເຫັນຢ່າງເລິກເຊິ່ງກ່ຽວກັບການພົວພັນລະຫວ່າງຈີນອາເມລິກາແລະບັນຫາສາກົນແລະພາກພື້ນທີ່ສົນໃຈນຳກັນ,ແລະໄດ້ບັນລຸຄວາມເປັນເອກະພາບຢ່າງກວ້າງຂວາງ.ທ່ານນາງໄລສ໌ກ່າວຢ້ຳວ່າ,ອາເມລິກາຍຶດໝັ້ນນະໂຍບາຍຈີນດຽວ,ຄັດຄ້ານເຈົ້າໜ້າທີ່ໄຕ້ຫວັນຈັດ"ການປ່ອນບັດທົ່ວປວງຊົນກ່ຽວກັບການເຂົ້າຮ່ວມສະຫະປະຊາຊາດ".ຍ້ອງຍໍຈີນທີ່ໄດ້ເສີມຂະຫຍາຍບົດບາດໃນບັນຫາດາຟູແລະອື່ນໆ,ແລະຄັດຄ້ານການເອົາງານກິລາໂອລິມປິກປັກກິ່ງຫັນເປັນບັນຫາການເມືອງ.ກ່ຽວກັບບັນຫານີວເຄຼຍແຫຼມເກົາຫຼີ,ທ່ານນາງໄລສ໌ກ່າວວ່າ,ອາເມລິກາຮູ້ສຶກດີໃຈຕໍ່ການຄືບໜ້າທີ່ໄດ້ຮັບໃນຂະບວນການປອດນີວເຄຼຍຢູ່ແຫຼມເກົາຫຼີ,ແລະຈະສືບຕໍ່ຮ່ວມກັນກັບຈີນ ສ.ປ.ປ.ເກົາຫຼີແລະຝ່າຍອື່ນໆຊຸກຍູ້ຂະບວນການດັ່ງກ່າວ.
|
|