|
ຕາມຂ່າວCRI:ວັນທີ 26 ກຸມພານີ້,ຢູ່ປັກກິ່ງ,ທ່ານຫູຈີນທ່າວ ປະທານປະເທດຈີນໄດ້ພົບປະກັບທ່ານນາງໂຄນໂດລີຊາ ໄລສ໌ ລັດຖະມົນຕີວ່າການກະຊວງການຕ່າງປະເທດອາເມລິກາທີ່ມາຢ້ຽມຢາມຈີນ,ໃນການພົບປະ,ທ່ານຫູຈີນທ່າວກ່າວວ່າ,ປີນີ້ແມ່ນປີໜຶ່ງທີ່ສຳຄັນທີ່ສຸດໃນການຂະຫຍາຍການພົວພັນລະຫວ່າງຈີນອາເມລິກາ,ຈີນອາເມລິກາຄວນຍຶດໝັ້ນທິດໃຫຍ່ທີ່ຂະຫຍາຍການຮ່ວມມືທີ່ມີລັກສະນະສ້າງສັນ.
ທ່ານຫູຈີນທ່າວກ່າວວ່າ,ຈີນຍິນດີພ້ອມກັນກັບອາເມລິກາ,ທຳຄວາມພະຍາຍາມກຳກັບການພົວພັນລະຫວ່າງສອງປະເທດຈາກດ້ານຍາວໄກແລະລະດັບຍຸດທະສາດຢ່າງສະເໝີຕົ້ນສະເໝີປາຍ,ເປີດກວ້າງຄວາມເຫັນທີ່ເປັນເອກະພາບກັນແລະການຮ່ວມມື,ແກ້ໄຂຄວາມສົນໃຈດ້ານຜົນປະໂຫຍດທີ່ສຳຄັນຂອງໃຜລາວຢ່າງເໝາະສົມ,ໂດຍສະເພາະແມ່ນແກ້ໄຂບັນຫາໄຕ້ຫວັນຢ່າງລະມັດລະວັງ,ຮັກສາສັນຕິພາບແລະສະຖຽນລະພາບຂອງຊ່ອງແຄບໄຕ້ຫວັນແລະພາກພື້ນອາຊີປາຊີຟິກ.
ທ່ານນາງໄລສ໌ກ່າວວ່າ,ອາເມລິກາໄດ້ສະແດງຫຼັກໝັ້ນຫຼາຍເທື່ອໃນບັນຫາເຈົ້າໜ້າທີ່ໄຕ້ຫວັນຊຸກຍູ້"ການປ່ອນບັດທົ່ວປວງຊົນກ່ຽວກັບການເຂົ້າເປັນສະມາຊິກສະຫະປະຊາຊາດ",ເຫັນວ່າ,ບໍ່ຄວນຈັດການປ່ອນບັດດັ່ງກ່າວ.ທ່ານນາງຍັງກ່າວວ່າ,ການພົວພັນລະຫວ່າງອາເມລິກາກັບຈີນມີພື້ນຖານທີ່ດີ,ການຮ່ວມມືລະຫວ່າງສອງຝ່າຍແລະຫຼາຍຝ່າຍໄດ້ຮັບຜົນຫຼາຍ.ອາເມລິກາຂອບໃຈນຳຈີນທີ່ໄດ້ພະຍາຍາມຢ່າງຕັ້ງໜ້າໃນບັນຫາສາກົນແລະພາກພື້ນເຊັ່ນບັນຫາດາຟູເປັນຕົ້ນ,ຫວັງໃຫ້ຈີນສືບຕໍ່ເສີມຂະຫຍາຍບົດບາດອັນຕັ້ງໜ້າໃນການແກ້ໄຂບັນຫາທີ່ກ່ຽວຂ້ອງ.
|
