|
ຈີນຈະສືບຕໍ່ໃຊ້ມາດຕະການຢ່າງຕັ້ງໜ້າເພື່ອອະນຸລັກຊີວະນາໆພັນແລະຮັບມືກັບການປ່ຽນແປງຂອງດິນຟ້າອາກາດ
cri
ຕາມຂ່າວສານຊິນຮວາ,ວັນທີ6ມີນານີ້,ທ່ານອູສ້ຽວຊິງ ຮອງຫົວໜ້າກົມໃຫຍ່ອະນຸລັກສິ່ງແວດລ້ອມແຫ່ງຊາດຈີນໄດ້ເຂົ້າຮ່ວມງານສຳມະນາສາກົນກ່ຽວກັບຊີວະນາໆພັນກັບການປ່ຽນແປງຂອງດິນຟ້າອາກາດທີ່ຈັດຂຶ້ນຢູ່ປັກກິ່ງ,ທ່ານກ່າວວ່າ,ຈີນຈະສືບຕໍ່ໃຊ້ມາດຕະການຢ່າງຕັ້ງໜ້າເພື່ອອະນຸລັກຊີວະນາໆພັນ,ຮັບມືກັບການປ່ຽນແປງຂອງດິນຟ້າອາກາດ.
ທ່ານອູສ້ຽວຊິງກ່າວວ່າ,ນັບມາຮອດທ້າຍປີ2006,ເຂດສະຫງວນທຳມະຊາດຂອງທົ່ວປະເທດຈີນໄດ້ກວມເນື້ອທີ່ດິນ 15,2%.ພ້ອມກັນນັ້ນ, ຜ່ານການປູກໄມ້ໃຫ້ເປັນປ່າ,ປະຕິບັດນະໂຍບາຍຄວບຄຸມມົນລະພິດ,ປະຕິບັດໂຄງການກົນໄກພັດທະນາຢ່າງມີການອະນຸລັກສິ່ງແວດລ້ອມແລະອື່ນໆ,ຈີນໄດ້ປະກອບສ່ວນອັນຕັ້ງໜ້າເພື່ອຄວບຄຸມການລະບາຍອາຍພິດເຮືອນແກ້ວແລະສະກັດກັ້ນການສູນເສຍຂອງຊີວະນາໆພັນ.
ທ່ານອູສ້ຽວຊິງກ່າວວ່າ,ໃນຕໍ່ໜ້າ,ຈີນຈະໃຊ້ມາຕະການຕ່າງໆເຊັ່ນວາງແຜນການແຫ່ງລັດ,ເພີ່ມທະວີບົດບາດຂອງວິທະຍາສາດເຕັກໂນໂລຊີ,ເພີ່ມທະວີການຮ່ວມມືແລະການແລກປ່ຽນກັບຕ່າງປະເທດ,ຊຸກຍູ້ທົ່ວສັງຄົມເຂົ້າຮ່ວມຢ່າງກວ້າງຂວາງເພື່ອອະນຸລັກຊີວະນາໆພັນແລະຮັບມືກັບການປ່ຽນແປງຂອງດິນຟ້າອາກາດໃຫ້ດີ.
|
|
