|
ຕາມຂ່າວCRI：ວັນທີ 12 ມີນານີ້, ຢູ່ທີ່ປັກກິ່ງ, ທ່ານລິວຈິ້ງມິນ ຮອງເຈົ້າຄອງນະຄອນຫຼວງປັກກິ່ງ ຮອງປະທານບໍລິຫານຂອງຄະນະຈັດງານກິລາໂອລິມປິກປັກກິ່ງກ່າວວ່າ, ເມື່ອໄດ້ທຳຄວາມພະຍາຍາມມາ 6 ປີປາຍ, ປັດຈຸບັນ, ວຽກງານກະກຽມຕ່າງໆຂອງງານກິລາໂອລິມປິກປັກກິ່ງແລະໂອລິມປິກຄົນພິການໄດ້ດຳເນີນໄປຢ່າງສະດວກ, ໄດ້ສ້າງພື້ນຖານອັນໜາແໜ້ນເພື່ອຈັດງານກິລາໂອລິມປິກຢ່າງສຳເລັດຜົນ.
ໃນກອງປະຊຸມຂ່າວທີ່ຈັດຢູ່ກອງປະຊຸມເທື່ອທີໜຶ່ງຂອງສະພາປະຊາຊົນແຫ່ງຊາດຈີນຊຸດທີ 11, ທ່ານລິວຈິ້ງມິນກ່າວວ່າ, ການສ້າງສະໜາມກິລາຂອງງານກິລາໂອລິມປິກປັກກິ່ງໄດ້ດຳເນີນຢ່າງສະດວກ, ທັງໝົດ 37 ແຫ່ງ ໄດ້ສ້າງສຳເລັດ 36 ແຫ່ງແລ້ວ, ສິ່ງກໍ່ສ້າງທີ່ກ່ຽວຂ້ອງເຊັ່ນບ້ານໂອລິມປິກ ແລະບ້ານນັກຂ່າວເປັນຕົ້ນກໍ່ຈະສ້າງສຳເລັດໝົດໃນ 6 ເດືອນຕົ້ນປີນີ້.
ທ່ານກ່າວວ່າ, ປັດຈຸບັນ, ປັກກິ່ງພວມເລັ່ງລັດເຮັດວຽກການອະນຸລັກສິ່ງແວດລ້ອມແລະການຄົມມະນາຄົມຂອງງານກິລາໂອລິມປິກໃຫ້ດີ, ເພື່ອເລື່ອງນີ້, ປັກກິ່ງໄດ້ສ້າງໜ່ວຍປະສານວຽກງານກ່ຽວກັບການຮັບປະກັນຄຸນນະພາບຂອງອາກາດຂອງງານກິລາໂອລິມປິກປັກກິ່ງ, ໄດ້ວາງແຜນການປະກັນຄຸນນະພາບອາກາດໃນຍາມໄຂງານກິລາໂອລິມປິກ. ວຽກງານປັບປຸງການຄົມມະນາຄົມທີ່ແອອັດກໍ່ພວມດຳເນີນໄປຢ່າງຂຸ້ນຂ້ຽວ.
|
