|
ໄຕມາດທຳອິດປີນີ້ຈີນໄດ້ຮັບຄວາມຄືບໜ້າໃໝ່ໃນການປະຢັດພະລັງງານແລະຫຼຸດການລະບາຍມົນລະພິດແຕ່ສະພາບກໍ່ຍັງໜັກໜ່ວງຢູ່
cri
ຕາມຂ່າວສານຊິນຮວາ,ວັນທີ29ເມສານີ້,ຢູ່ທີ່ປັກກິ່ງ,ທ່ານຈູຫົງເຢິນ ຮອງຫົວໜ້າກົມເສດຖະກິດຂອງຄະນະກຳມະການການພັດທະນາແລະການປະຕິຮູບແຫ່ງລັດຈີນກ່າວວ່າ,ໃນໄຕມາດທຳອິດປີນີ້, ຂະແໜງການທີ່ສິ້ນເປືອງພະລັງງານຫຼາຍຂອງຈີນໄດ້ຂະຫຍາຍຕົວຊ້າລົງ,ການປະຢັດພະລັງງານແລະຫຼຸດການລະບາຍມົນລະພິດໄດ້ຮັບຄວາມຄືບໜ້າໃໝ່.
ໃນງານຖະແຫຼງຂ່າວກ່ຽວກັບສະພາບໝູນເດີນຂອງເສດຖະກິດໃນໄຕມາດທຳອິດປີນີ້,ທ່ານຈູຫົງເຢິນກ່າວວ່າ,ການຜະລິດຜະລິດຕະພັນທີ່ສິ້ນເປືອງພະລັງງານຫຼາຍຈຳນວນໜຶ່ງເພີ່ມຂຶ້ນຊ້າລົງ,ການສົ່ງອອກກໍ່ຫຼຸດລົງຕໍ່ມາ.ໄຕມາດທຳອິດປີນີ້,ປະລິມານການຜະລິດເຫຼັກກ້າຫຍາບແລະອາລູມີນຽມວິເຄາະດ້ວຍໄຟຟ້າຂອງຈີນເພີ່ມຂຶ້ນຫຼາຍກວ່າເວລາດຽວກັນຂອງປີກາຍ8%,ແຕ່ຈັງຫວະເຕີບໂຕໄດ້ຫຼຸດລົງ.ອັດຕາສິ້ນເປືອງພະລັງງານຕໍ່ເຫຼັກກ້າແຕ່ລະໂຕນຂອງວິສາຫະກິດຂາງແລະເຫຼັກກ້າທີ່ສຳຄັນໄດ້ຫຼຸດລົງ0,2%.
ພ້ອມກັນນັ້ນ,ທ່ານຈູຫົງເຢິນຍັງກ່າວວ່າ,ຍ້ອນວ່າຄວາມຂັດແຍ່ງດ້ານໂຄງປະກອບມີມາດົນນານໂດຍສະເພາະແມ່ນບໍ່ໄດ້ປ່ຽນແປງສະພາບທີ່ການພັດທະນາເສດຖະກິດອີງອາໃສການສິ້ນເປືອງຊັບພະຍາກອນຫຼາຍເກີນໄປໃນດ້ານກົກຮາກ,ສະນັ້ນ,ສະພາບປະຢັດພະລັງງານແລະຫຼຸດການລະບາຍມົນລະພິດຈິ່ງຍັງໜັກໜ່ວງຢູ່.
|
|
