|
ຕາມຂ່າວສານຊິນຮວາ,ວັນທີ30ເມສາແລ້ວນີ້,ທ່ານເຈຍຊິ້ງລິນ ກຳມະການປະຈຳກົມການເມືອງສູນກາງພັກກອມມູນິດຈີນ ປະທານສະພາປຶກສາການເມືອງປະຊາຊົນແຫ່ງຊາດຈີນ ທ່ານລີສາງຊຸນ ກຳມະການປະຈຳກົມການເມືອງສູນກາງພັກກອມມູນິດຈີນ ທ່ານໂຈ່ວຢົງຄ່າງ ກຳມະການປະຈຳກົມການເມືອງສູນກາງພັກກອມມູນິດຈີນ ເລຂາຄະນະກຳມະການການເມືອງແລະກົດໝາຍສູນກາງຈີນໄດ້ໄປຫໍວັດທະນະທຳຊົນເຜົ່າປັກກິ່ງເພື່ອຊົມເບິ່ງການວາງສະແດງຂະໜາດໃຫຍ່ທີ່ມີຫົວຂໍ້ວ່າ"ປັດຈຸບັນແລະອະດີດຂອງຕິເບດ"
ໃນເວລາຊົມເບິ່ງການວາງສະແດງ,ທ່ານເຈຍຊິ້ງລິນກ່າວວ່າ,ນັບແຕ່ຕິເບດໄດ້ຮັບການປົດປ່ອຍໂດຍສັນຕິເປັນເວລາ50ກວ່າປີມານີ້,ໂສມໜ້າຂອງສັງຄົມໄດ້ມີການປ່ຽນແປງປານໜ້າມືກັບຫຼັງມື,ປັດຈຸບັນ,ເສດຖະກິດຕິເບດມີການພັດທະນາ,ການເມືອງມີຄວາມໝັ້ນຄົງ,ສັງຄົມມີຄວາມກ້າວໜ້າ,ປະຊາຊົນບັນດາເຜົ່າມີຄວາມສາມັກຄີ,ປະຊາຊົນຢູ່ເຢັນເປັນສຸກ,ລະດັບຊີວິດການເປັນຢູ່ໄດ້ຍົກສູງຂຶ້ນເລື້ອຍໆ,ຕິເບດພວມຢູ່ໃນໄລຍະດີທີ່ສຸດໃນປະຫວັດສາດ.
ທ່ານລີສາງຊຸນກ່າວວ່າ,ງານວາງສະແດງໄດ້ປຽບທຽບຕິເບດເກົ່າແລະໃໝ່,ສ່ອງແສງໃຫ້ເຫັນປະຫວັດການອັນສະຫງ່າລາສີທີ່ພັກກອມມູນິດຈີນນຳພາປະຊາຊົນຕິເບດດັບສູນລະບອບຂ້າທາດກະສິກອນສັກດິນາ ບັນລຸການເປັນເຈົ້າບ້ານຄອງເມືອງແລະສ້າງສາຊີວິດອັນດີງາມ.
ທ່ານໂຈ່ວຢົງຄ່າງກ່າວວ່າ,ຂໍ້ມູນປະຫວັດສາດຢັ້ງຢືນໃຫ້ເຫັນວ່າ,ຕັ້ງແຕ່ສະໄໝບູຮານມານີ້,ຕິເບດກໍ່ແມ່ນພາກສ່ວນໜຶ່ງທີ່ຕັດແຍກອອກຈາກດິນແດນຈີນບໍ່ໄດ້,ລັດຖະບານກາງທຸກສະໄໝໄດ້ມີອະທິປະໄຕແລະດຳເນີນການປົກຄອງຕິເບດຢ່າງບັງເກີດຜົນ,ເລື່ອງອະທິປະໄຕຂອງຕິເບດແມ່ນໂຕ້ຖຽງກັນບໍ່ໄດ້.
|
