|
ທ່ານຫູຈິນທາວກ່າວວ່າ,ການຈະໄປຢ້ຽມຢາມຍິ່ປຸ່ນຂອງທ່ານແມ່ນການເດີນທາງໃນປັນຍາກາດທີ່ອົບອຸ່ນ
cri
Author: d
ຕາມຂ່າວCRI: ວັນທີ4ພຶດສະພານີ້ ຢູ່ປັກກິ່ງ ໃນເວລາໃຫ້ສຳພາດຮ່ວມຕໍ່ສື່ມວນຊົນ16ແຫ່ງຂອງຍິ່ປຸ່ນປະຈຳຢູ່ປັກກິ່ງ ທ່ານຫູຈິນທາວ ປະທານປະເທດຈີນກ່າວວ່າ,ການຈະໄປຢ້ຽມຢາມຍິ່ປຸ່ນທາງລັດຖະກິດຂອງທ່ານແມ່ນການເດີນທາງໃນປັນຍາກາດທີ່ອົບອຸ່ນ.
ທ່ານຫູຈິນທາວກ່າວວ່າ,ຈຸດປະສົງການຢ້ຽມຢາມເທື່ອນີ້ແມ່ນເພື່ອເພີ່ມຄວາມໄວ້ເນື້ອເຊື່ອໃຈກັນ,ເພີ່ມມິດຕະພາບ,ລົງເລິກຂະຫຍາຍການຮ່ວມມື,ວາງແຜນສຳລັບອະນາຄົດ,ຊຸກຍູ້ການພົວພັນຍຸດທະສາດທີ່ຕ່າງຝ່າຍຕ່າງມີຜົນປະໂຫຍດລະຫວ່າງຈີນກັບຍິ່ປຸ່ນຢ່າງຮອບດ້ານ.ທ່ານເຊື່ອວ່າ ພາຍໃຕ້ຄວາມພະຍາຍາມຂອງທັງສອງຝ່າຍ,ການຢ້ຽມຢາມເທື່ອນີ້ຍ່ອມຈະໄດ້ຮັບໝາກຜົນຕາມຄາດໝາຍຢ່າງແນ່ນອນ.
ໃນເວລາກ່າວເຖິງງານກິລາໂອລິມປິກປັກກິ່ງ,ທ່ານຫູຈິນທາວກ່າວວ່າ,ວຽກງານກະກຽມຕ່າງໆກ່ຽວກັບງານກິລາໂອລິມປິກປັກກິ່ງພວມດຳເນີນຢ່າງເຄັ່ງຮ້ອນແລະເປັນລະບົບ,ຈີນເຊີນຊວນນັກກິລາຂອງປະເທດແລະເຂດແຄວ້ນຕ່າງໆໃນໂລກມາເຂົ້າຮ່ວມງານກິລາໂອລິມປິກປັກກິ່ງຢ່າງສຸດອົກສຸດໃຈ,ເຊີນຊວນເພື່ອນມິດປະເທດຕ່າງໆມາຊົມງານກິລາໂອລິມປິກປັກກິ່ງ.ທ່ານເຊື່ອວ່າ,ຈະມີປະຊາຊົນທົ່ວໂລກຊຶ່ງລວມທັງປະຊາຊົນຍິ່ປຸ່ນເຂົ້າຮ່ວມຢ່າງຫຼວງຫຼາຍ,ຈະໄດ້ຮັບການສະໜັບສະໜູນຈາກວົງຄະນາຍາດໂອລິມປິກສາກົນ,ງານກິລາໂອລິມປິກປັກກິ່ງຈະເປັນງານກິລາມະໂຫລານທີ່ມີສີສັນພິເສດແລະລະດັບສູງ.
|
|
