ຕາມຂ່າວCRI: ໜັງສືພິມເຢີນມິນຢື້ປ້າວສະບັບວັນທີ 6 ພຶດສະພານີ້ພິມບົດຄວາມຊີ້ອອກວ່າ, "ບັນຫາຕິເບດ"ແມ່ນບັນຫາອະທິປະໄຕ.
ບົດຄວາມຂຽນວ່າ, ຫວ່າງກ່ອນນີ້ບໍ່ດົນໃນເວລາເວົ້າເຖິງ"ບັນຫາຕິເບດ", ກຸ່ມດາໄລລາມະກ່າວວ່າຈະໄປຕາມ"ເສັ້ນທາງສາຍກາງ"ຢ່າງເດັດດ່ຽວ. ເນື້ອໃນຂອງມັນມີສອງຄື: ໜຶ່ງແມ່ນ"ເຂດຕິເບດໃຫຍ່" ສອງແມ່ນ"ປົກຄອງຕົນເອງໃນລະດັບສູງ". ອັນທີ່ເອີ້ນວ່າ"ເຂດຕິເບດໃຫຍ່"ກໍຄືເອົາເຂດຕິເບດ, ແຂວງຊິງໄຫ ແຂວງກາງຊູ ແຂວງເຊສວນແລະແຂວງຢຸນນານເຊິ່ງເປັນບ່ອນດຳລົງຊີວິດຢູ່ຂອງເຜົ່າຕິເບດຮ່ວມກັນເຂົ້າ, ສ້າງ"ເຂດປົກຄອງຕົນເອງເຜົ່າຕິເບດໃຫຍ່"ທີ່ບໍ່ເຄີຍມີໃນປະຫວັດສາດ, ເນື້ອທີ່ທັງໝົດຂອງເຂດຕິເບດໃຫຍ່ກວມ 1 ສ່ວນ 4 ຂອງຜືນແຜ່ນດິນທົ່ວປະເທດຈີນ. "ການປົກຄອງຕົນເອງໃນລະດັບສູງ"ໝາຍເຖິງລັດຖະບານກາງບໍ່ສາມາດສົ່ງທະຫານປະຈຳເຂດຕິເບດ, ເຂດຕິເບດສາມາດຮັກສາການພົວພັນການຕ່າງປະເທດກັບປະເທດອື່ນໆຫຼືອົງການສາກົນ. ເບິ່ງຈາກເລື່ອງນີ້ໄດ້ເຫັນວ່າ, ທາດແທ້ຂອງ"ເສັ້ນທາງສາຍກາງ"ແມ່ນ"ເຂດຕິເບດເປັນເອກະລາດ".
ບົດຄວາມຊີ້ອອກວ່າ, ອະທິປະໄຕກ່ຽວພັນເຖິງກຽດສັກສີຂອງປະເທດໜຶ່ງ, ກ່ຽວພັນເຖິງຜົນປະໂຫຍດພື້ນຖານຂອງປະຊາຊົນຈີນ. ບໍ່ວ່າ"ບັນຫາຕິເບດ"ຈະສັບສົນຫຼາຍປານໃດ, ຫຼືບໍ່ວ່າຈະມີອິດທິກຳລັງຫຼາຍເທົ່າໃດທີ່ຢາກແຊກແຊງເຂົ້າເລື່ອງນີ້ກໍຕາມ, ຈີນຈະບໍ່ຜ່ອນສັ້ນຜ່ອນຍາວ, ປະຊາຊົນຈີນກໍ່ຈະບໍ່ເຫັນດີ.
|