|
|
 |
| (GMT+08:00)
2008-05-12 10:03:56
|
 |
|
ເງື່ອນໄຂທີ່ມີຜົນດີຂອງພາກພື້ນອາຊີຕາເວັນອອກຕໍ່ຕ້ານຄວາມສ່ຽງເສດຖະກິດພາຍນອກເພີ່ມຂຶ້ນຢ່າງເດັ່ນຊັດ
cri
ຕາມຂ່າວສານຊິນຮວາ,ວັນທີ11ພຶດສະພານີ້,ຢູ່ທີ່ປັກກິ່ງ ທ່ານເຮີຢ້າເຟີຍ ຜູ່ຊ່ວຍລັດຖະມົນຕີວ່າການກະຊວງການຕ່າງປະເທດຈີນກ່າວວ່າ,ປັດຈຸບັນ,ເງື່ອນໄຂທີ່ມີຜົນດີຂອງທົ່ວພາກພື້ນອາຊີຕາເວັນອອກຕໍ່ຕ້ານຄວາມສ່ຽງເສດຖະກິດພາຍນອກໄດ້ເພີ່ມຂຶ້ນຢ່າງເດັ່ນຊັດ.
ທ່ານເຮີຢ້າເຟີຍໄດ້ກ່າວ ໃນເວລາເຂົ້າຮ່ວມເວທີປຶກສາຫາລືການລົງທຶນອາຊີຕາເວັນອອກ2008ໂດຍມີສະມາຄົມວິຊາການການພົວພັນລະຫວ່າງຊາດຂອງຈີນເປັນເຈົ້າພາບຈັດຂຶ້ນ.
ທ່ານກ່າວວ່າ,ໂດຍໄດ້ຖືກຜົນກະທົບຈາກເສດຖະກິດໂລກບໍ່ໝັ້ນທ່ຽງ,ປະເທດອາຊີຕາເວັນອອກກໍ່ມີແຮງກົດດັນຫຼາຍຂຶ້ນໃນດ້ານເສດຖະກິດເຕີບໂຕແລະສັງຄົມພັດທະນາ.ແຕ່ກໍ່ຕ້ອງຮັບຮູ້ວ່າ,ເວົ້າໃນປັດຈຸບັນແລ້ວ,ເງື່ອນໄຂທີ່ມີຜົນດີຂອງທົ່ວພາກພື້ນອາຊີຕາເວັນອອກຕໍ່ຕ້ານຄວາມສ່ຽງເສດຖະກິດພາຍນອກມີຫຼາຍກວ່າໄລຍະວິກິດການດ້ານການເງິນໃນອາຊີປີ1997ຢ່າງເດັ່ນຊັດ.
ທ່ານເຮີຢ້າເຟີຍກ່າວວ່າ,10ປີມານີ້,ເສດຖະກິດອາຊີຕາເວັນອອກເຕີບໂຕຢ່າງຕໍ່ເນື່ອງ ໝັ້ນທ່ຽງແລະວ່ອງໄວ,ການປັບປຸງອົງປະກອບເສດຖະກິດກໍ່ໄດ້ຮັບໝາກຜົນອັນເດັ່ນຊັດ, ເງິນຕາຕ່າງປະເທດໃນຄັງສຳຮອງມີຢ່າງພຽງພໍທີ່ສຸດ,ຄວາມສາມາດໃນການເອົາຊະນະກັບຄວາມສ່ຽງດ້ານການທະນາຄານກໍ່ໄດ້ເພີ່ມຂຶ້ນຢ່າງເດັ່ນຊັດ.ນອກນີ້,ການປັບປຸງແລະປະສານງານດ້ານນະໂຍບາຍມະຫາພາກລະຫວ່າງບັນດາປະເທດອາຊີຕາເວັນອອກກໍ່ພວມດຳເນີນຢູ່,ຄວາມສາມາດທີ່ເຮັດໃຫ້ເສດຖະກິດພັດທະນາຢ່າງໝັ້ນທ່ຽງນັ້ນກໍ່ໄດ້ເພີ່ມທະວີຂຶ້ນຢ່າງເດັ່ນຊັດ.
|
|
|
